ଅନୁଗୋଳ ଅଫିସ/ଛେଣ୍ଡିପଦା/ପାଲଲହଡ଼ା, ୯।୫- ଅନୁଗୋଳ ଜିଲାର ବିଭିନ୍ନ ବ୍ଲକରେ କ୍ବାରାଣ୍ଟାଇନ୍ ଅବଧି ସମାପ୍ତ କରିଥିବା ଛତିଶଗଡ଼ର ୭୫ ଜଣ ଶ୍ରମିକଙ୍କୁ ଏକ ସ୍ବତନ୍ତ୍ର ବସ୍ ଯୋଗେ ତାଙ୍କ ଅଞ୍ଚଳକୁ ପଠାଯାଇଛି। ସେମାନଙ୍କ ମଧ୍ୟରୁ ଅନୁଗୋଳ ବ୍ଲକରେ ୨୪ ଜଣ, ବଅଁରପାଳ ବ୍ଲକରେ ୨୦ ଓ ଛେଣ୍ଡିପଦା ବ୍ଲକରେ ୩୧ ଜଣ କ୍ୱାରାଣ୍ଟାଇନରେ ଥିଲେ। ସେହିପରି ପାଲଲହଡ଼ା, କଣିହଁା ଓ ଅନୁଗୋଳ ବ୍ଲକରେ କ୍ୱାରାଣ୍ଟାଇନରେ ଥିବା ଝାଡ଼ଖଣ୍ଡର ୩୧ ଜଣ ଶ୍ରମିକଙ୍କୁ ଏକ ବସ୍ ଯୋଗେ ପଠାଇ ଦିଆଯାଇଛି। ସମସ୍ତ ଶ୍ରମିକମାନଙ୍କୁ ଖାଦ୍ୟ ସହ ପାନୀୟ ଜଳ ଦିଆଯାଇଥିଲା। ଜିଲାପାଳ ମନୋଜ କୁମାର ମହାନ୍ତି, ଏସ୍ପି ଜଗମୋହନ ମୀନା, ପିଡି ଅତୁଲ୍ୟ କୁମାର ଚମ୍ପତିରାୟ, ଉପଜିଲାପାଳ ବାସୁଦେବ ଶତପଥୀଙ୍କ ପ୍ରତ୍ୟକ୍ଷ ତତ୍ତ୍ବାବଧାନରେ ଡେପୁଟି କଲେକ୍ଟର ବଇତୁରା ଦୀପ୍, ଏପିଡି ଅବିନାଶ ମହାନ୍ତି, ଏପିଡି ରାକେଶ କୁଣ୍ଡ ପ୍ରମୁଖ ଶ୍ରମିକମାନଙ୍କୁ ପଠାଇବାରେ ସହାୟତା କରିଥିଲେ।