ଛତ୍ରପୁର,୧୬।୬(ଡି.ଏନ.ଏ)-ଗଞ୍ଜାମ ଜ଼ିଲା ଛତ୍ରପୁର ତହସିଲ ଅଧୀନ ଆର୍ଯ୍ୟପଲି ମୋଜାରେ କେନ୍ଦ୍ରୀୟ ବିଦ୍ୟାଳୟ ପ୍ରତିଷ୍ଠା ପାଇଁ ୧୦ ଏକର ଜମି ଲିଜ୍ ମଞ୍ଜୁୁର କରାଯାଇଛି। ରାଜ୍ୟ ସରକାରଙ୍କ ରାଜସ୍ବ ଓ ବିପର୍ଯ୍ୟୟ ପରିଚାଳନା ବିଭାଗ ଏହି ଲିଜ ନୂଆଦିଲ୍ଲୀ ସ୍ଥିତ କେନ୍ଦ୍ରୀୟ ବିଦ୍ୟାଳୟ ସଂଗଠନ ନାଁରେ ମଞ୍ଜୁର କରିଛି। କେନ୍ଦ୍ରୀୟ ବିଦ୍ୟାଳୟର ନୂତନ ବିଲଡିଂ ନିର୍ମାଣ ପର୍ଯ୍ୟନ୍ତ ଛତ୍ରପୁର ଅନସ୍ଲୋ ସରକାରୀ ହାଇସ୍କୁଲର ଏକ କୋଠାରେ ଅସ୍ଥାୟୀ କ୍ୟାମ୍ପସ ରେ କେନ୍ଦ୍ରୀୟ ବିଦ୍ୟାଳୟ ଚାଲିବ। ଏଥିପାଇଁ ପୂର୍ବରୁ ରାଜ୍ୟ ସ୍କୁଲ ଓ ଗଣଶିକ୍ଷା ବିଭାଗ ଅନୁମତି ଦେଇସାରିଛନ୍ତି। ଏହା ସ୍ବାଗତଯୋଗ୍ୟ ପଦକ୍ଷେପ। ଛତ୍ରପୁର ପାଇଁ ଭଲ ଖବର। ଛତ୍ରପୁର ଓକିଲ ସଂଘ, ପ୍ରେସ କ୍ଲବ, ୟୁନାଇଟେଡ଼ ସିଟିଜେନ ଫୋରମ, ଛତ୍ରପୁର ନାଗରିକ କମିଟି, ସ୍ଥାନୀୟ ଏମପି, ବିଧାୟକ, ଜ଼ିଲା ପ୍ରଶାସନ ର ଉଦ୍ୟମ ଯୋଗୁ ଏହା ସଫଳ ହୋଇଥିବା ଓକିଲ ସଂଘର ପୂର୍ବତନ ସଭାପତି ତଥା ୟୁନାଇଟେଡ଼ ସିଟିଜେନ ଫୋରମର ଆବାହକ କେ ଶିବରାମ ରେଡ୍ଡୀ କହିଛନ୍ତି। କେନ୍ଦ୍ର ସରକାର ଛତ୍ରପୁର କେନ୍ଦ୍ରୀୟ ବିଦ୍ୟାଳୟ ପ୍ରତିଷ୍ଠା ପାଇଁ ମଞ୍ଜୁରୀ ଦେଇଥିବାରୁ ଭାଜପା ନେତା ତଥା ଓକିଲ ପ୍ରଦୀପ ପାଢ଼ୀ କୃତଜ୍ଞତା ଜଣାଇଛନ୍ତି।
