ଛତ୍ରପୁର, ୨୧।୫(ଡି.ଏନ୍.ଏ.)-ଗଞ୍ଜାମ ଜିଲା ଛତ୍ରପୁର ବିଡିଓ ଅମ୍ବିକା ପ୍ରସାଦ ଦାଶଙ୍କୁ ଆକ୍ରମଣ ଓ ହତ୍ୟା ଧମକ ମାମଲାରେ ସମ୍ପୃକ୍ତଙ୍କୁ ପୋଲିସ ଗିରଫ କରିବାରେ ସକ୍ଷମ ହୋଇଛି। ଗିରଫ ଅଭିଯୁକ୍ତ ହେଲେ ଗଞ୍ଜାମ ଥାନା ଅଗସ୍ତିନୂଆଗାଁ ପଞ୍ଚାୟତ ଅଧୀନ ତେଲୁଗୁନୂଆଗାଁର ବାପି ଦାସ ଓରଫ ସରୋଜ ଦାସ।
ଅପରପକ୍ଷରେ ଗୁରୁବାର ପୂର୍ବାହ୍ନରେ ଗଞ୍ଜାମ ଜ଼ିଲା ଓଏଏସ୍ ସଂଘର ଏକ ବୈଠକ ସଭାପତି ତଥା ଅତିରିକ୍ତ ଜ଼ିଲାପାଳ କବିନ୍ଦ୍ର କୁମାର ସାହୁଙ୍କ ଅଧ୍ୟକ୍ଷତା ରେ ଅନୁଷ୍ଠିତ ହୋଇଥିଲା। ବିଡିଓଙ୍କୁ ଆକ୍ରମଣ ନେଇ ପ୍ରତିବାଦ ସହ ସଂଘ ପକ୍ଷରୁ ନିନ୍ଦା କରାଯାଇଥିଲା ପରେ ଗଞ୍ଜାମ ଜିଲାପାଳ ବିଜୟ ଅମୃତା କୁଲାଙ୍ଗେ ଓ ଏସ୍ପି ବ୍ରିଜେଶ କୁମାର ରୟଙ୍କୁ ଭେଟି ସଂଘ ପକ୍ଷରୁ ସ୍ମାରକପତ୍ର ପ୍ରଦାନ କରାଯାଇଛି । ଏହି ମାମଲାରେ ସମ୍ପୃକ୍ତ ବ୍ୟକ୍ତିଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ, ଏନ୍ଏସ୍ଏ( ଜାତୀୟ ନିରାପତ୍ତା ଆଇନ ), ମହାମାରୀ ଆଇନ ୧୮୯୭, ଜାତୀୟ ବିପର୍ଯ୍ୟୟ ପରିଚାଳନା ଆଇନ ୨୦୦୫ ଓ କୋଭିଡ -୧୯ ନିୟମ ୨୦୨୦ ଲଗାଇବାକୁ ସଂଘ ପକ୍ଷରୁ ଦାବି ହୋଇଛି। ସେହିପରି ଛତ୍ରପୁର ବିଡିଓଙ୍କୁ ପିଏସ୍ଓ ପ୍ରଦାନ, କୋଭିଡ -୧୯ ସରିବା ପର୍ଯ୍ୟନ୍ତ ସମସ୍ତ ବିଡ଼ିଓ ଓ ତହସିଲଦାରଙ୍କୁ ପିଏସ୍ଓ ପ୍ରଦାନ, ବିଡ଼ିଓ ଏନେ୍ଫୋର୍ସମେଣ୍ଟରେ ଗଲାବେଳେ ଆବଶ୍ୟକୀୟ ପୋଲିସ ଫୋର୍ସ ବ୍ୟବସ୍ଥା ଏବଂ ଜଣେ ପ୍ରଶାସନିକ ଅଧିକାରୀଙ୍କ ନେତୃତ୍ୱରେ ପୋଲିସ ମୋବାଇଲ ଟିମ୍ କ୍ୱାରେଣ୍ଟାଇନ ସେଣ୍ଟର ପରିଦର୍ଶନ କରିବା ଦାବି ରହିଛି। ବିଡ଼ିଓଙ୍କ ଏତଲା କ୍ରମେ ଏକ ମାମଲା ( ନଂ. ୬୨/୨୦) ରୁଜୁ କରାଯିବା ସହ ମୁଖ୍ୟ ଅଭିଯୁକ୍ତଙ୍କୁ ଗିରଫ କରାଯାଇଛି। ଅନ୍ୟ ସମ୍ପୃକ୍ତଙ୍କୁ ଗିରଫ କରାଯିବ ବୋଲି ଏସ୍ପି କହିଛନ୍ତି।
ପ୍ରକାଶଯୋଗ୍ୟ, ଛତ୍ରପୁର ବିଡ଼ିଓ ଓ ତହସିଲଦାର ଅଗସ୍ତିନୂଆଗାଁ ପଂଚାୟତରେ ଥିବା କ୍ୱାରେଣ୍ଟାଇନ ସେଣ୍ଟର ପରିଦର୍ଶନ କରିବାକୁ ଯାଉଥିବାବେଳେ ନିକଟରେ ୨୦ ରୁ ଉର୍ଦ୍ଧ୍ୱ ଯୁବକ କ୍ରିକେଟ ଖେଳୁଥିବା ଦେଖିବାକୁ ପାଇଥିଲେ। ସେମାନେ କୋଭିଡ ନିୟମ ଉଲଂଘନ କରୁଥିବା, ମାସ୍କ ପିନ୍ଧି ନ ଥିବା ଓ ସାମାଜିକ ଦୂରତା ନ ଥିବା ଦେଖି ବିଡିଓ ତାଙ୍କୁ ତାଗିଦ କରିଥିଲେ । ହଠାତ ବାପି ଓ ଅନ୍ୟମାନେ ଅସଭ୍ୟ ଭାଷା କହି ଷ୍ଟମ୍ପରେ ବିଡ଼ିଓ ଙ୍କୁ ଆକ୍ରମଣ କରିଥିଲେ । ଏଥିସହ ଜୀବନରେ ମାରିଦେବାକୁ ଧମକ ଦେଇଥିଲେ। ନିକଟରେ ଥିବା ତହସିଲଦାର ଓ ବିଡ଼ିଓ ଙ୍କ ଡ୍ରାଇଭର ତାଙ୍କୁ ଉଦ୍ଧାର କରିଥିଲେ।