ଛତ୍ରପୁର ହସ୍ପିଟାଲ ରୋଗୀ କଲ୍ୟାଣ ସମିତି ବୈଠକ :ମୃତଦେହ ରଖିବାକୁ ନୂଆ ଫ୍ରିଜର, ଜେନେରେଟର ପ୍ରସ୍ତାବ
21 ଛତ୍ରପୁର,୨୪ା୯(ଡି.ଏନ.ଏ) -ଛତ୍ରପୁର ହସ୍ପିଟାଲ ରୋଗୀ କଲ୍ୟାଣ ସମିତି ବୈଠକ ସୋମବାର ସନ୍ଧ୍ୟାରେ ସମ୍ମିଳନୀ ଗୃହରେ ଅନୁଷ୍ଠିତ ହୋଇଥିଲା। ଏଥିରେ ଛତ୍ରପୁର ହସ୍ପିଟାଲରେ ଚାଲିଥିବା ବିଭିନ୍ନ କୋଠା ନିର୍ମାଣ କାମ ଏବଂ ଅନ୍ୟାନ୍ୟ ଖର୍ଚ୍ଚ ଓ ସମସ୍ୟା ଉପରେ ବିସୃତ ଭାବେ ଆଲୋଚନା ହୋଇଥିଲା। ଏଥିରେ ଛତ୍ରପୁର ବିଧାୟକ ସୁବାସ ଚନ୍ଦ୍ର ବେହେରା, ବ୍ଲକ ଅଧ୍ୟକ୍ଷ ଏମ୍ ଧଞ୍ଜଜୟ ରେଡ୍ଡୀ, ଉପଜିଲାପାଳ ପ୍ରିୟ ରଞ୍ଜନ ପୃଷ୍ଟି, ସୁପରିଟେଣ୍ଡଣ୍ଟ ଡା. କାହ୍ନୁ ଚରଣ ପାତ୍ର, ହସ୍ପିଟାଲ ମ୍ୟାନେଜର ସନ୍ତୋଷ କୁମାର ପଣ୍ଡା, ସିଡିପିଓ କ୍ରିଷ୍ଣା କୁମାରୀ ନନ୍ଦ, ଏନ୍ଏସି ଭାରପ୍ରାପ୍ତ ନିର୍ବାହୀ ଅଧିକାରୀ ଲିଲନ ପ୍ରସାଦ ସାହୁ, ଗ୍ରାମ୍ୟ ଜଳ ଯେଗାଣ ବିଭାଗର କନିଷ୍ଠ ଯନ୍ତ୍ରୀ ମଳୟ ନାୟକ ପ୍ରମୁଖ ଉପସ୍ଥିତ ଥିଲେ। ପୋଲିସ ହସ୍ପିଟାଲକୁ ଏଠାରୁ ଜଣେ ଫାର୍ମାସିଷ୍ଟଙ୍କୁ ଡେପୁଟେସନରେ ପଠାଯାଇଛି। ଏଥିଲାଗି ଏଠାରେ ନିରାମୟ ଯୋଜନାରେ ଚାଲିଥିବା ଓଷଧ ବିତରଣ କେନ୍ଦ୍ରର ପରିଚାଳନାରେ ଅସୁବିଧା ହେଉଥିବା ସୁପରିଟେଣ୍ଡେଣ୍ଟ ଡା. ପାତ୍ର କହିଥିଲେ। ଏସମ୍ପର୍କରେ ସିଡିଏମ୍ଓଙ୍କୁ ଅବଗତ କରାଯାଇଛି। ମାତ୍ର କୌଣସି ପଦକ୍ଷେପ ନିଆଯାଇନି। ଡାକ୍ତର ଓ ନର୍ସ ଅଭାବରୁ କାଜୁଆଲିଟିର ପରିଚାଳନାରେ ମଧ୍ୟ ଘୋର ଅସୁବିଧା ହେଉଛି। ହସ୍ପିଟାଲ ପରିସରରେ ଥିବା ଓମ୍ଫେଡ୍ ବୁଥର ଅବଧି ସରିଥିବାବେଳେ ଆସନ୍ତା ମାର୍ଚ୍ଚ ପର୍ଯ୍ୟନ୍ତ ସର୍ତ୍ତରଖି ଏକ୍ସଟେନସନ୍ କରାଯାଇଛି। ପାର୍କିଂ, ଗାର୍ଡେନ ଓ ସୌନ୍ଦର୍ଯ୍ୟକରଣ ଉପରେ ଆଲୋଚନା ହୋଇଥିଲା। ହସ୍ପିଟାଲ ପାଇଁ ଆଉ ୨ ଜଣ ଡାକ୍ତର ଓ ୪ ଜଣ ନର୍ସ ପୋଷ୍ଟିଂ ଦେଲେ ରୋଗୀ ସେବା ଆହୁରି ଭଲ ହୋଇପାରିବ ବୋଲି ଡା. ଜେ ଏମ୍. ବେବର୍ତ୍ତା କହିଥିଲେ। କ୍ୱାର୍ଟରରେ ରହି ଛତ୍ରପୁର ହସ୍ପିଟାଲର ଜଣେ ଡାକ୍ତର ଘରୋଇ ଚିକିତ୍ସା କରୁଥିବା ବ୍ଲକ ଅଧ୍ୟକ୍ଷ ରେଡ୍ଡୀ ବୈଠକରେ କହିଥିଲେ। ଏହା ଉପରେ ପଦକ୍ଷେପ ନେବାକୁ ସେ ସୁପରିଟେଣ୍ଡେଣ୍ଟଙ୍କ ଦୃଷ୍ଟି ଆକର୍ଷଣ କରିଥିଲେ। ଏଥିସହ ରାତିରେ ଆମ୍ବୁଲାନ୍ସ ଚାଳକଙ୍କ ଘରେ ରହୁଛି। ଏଥିସହ ଚାଳକ ମଧ୍ୟ ହସ୍ପିଟାଲରେ ରହୁ ନ ଥିବା ବୈଠକରେ ଆଲୋଚନା ହୋଇଥିଲା। ହସ୍ପିଟାଲରେ ମୃତଦେହ ରଖିବାକୁ ଥିବା ଫ୍ରିଜର ଖରାପ ଅଛି। ନୂଆ ଫ୍ରିଜର ୟୁଥ ମାସ ସେବା ସଂଘ ପକ୍ଷରୁ ଦିଆଯିବ ବୋଲି ସମ୍ପାଦକ ସୟଦ ମୁକ୍ତାର କହିଥିଲେ। ଏହାକୁ ସମସ୍ତେ ସ୍ବାଗତ କରିଥିଲେ। ହସ୍ପିଟାଲର ଥିବା ଗୋଟିଏ ଜେନେରେଟର ଖରାପ ଅଛି। ନୂଆ ଜେନେଟର କିଣିବାକୁ ବୈଠକରେ ନିଷ୍ପତି ହୋଇଛି। ଏହି ବୈଠକରେ ରୋଗୀ କଲ୍ୟାଣ ସମିତିର ସଭ୍ୟ ବସନ୍ତ ମହାରଣା, ବିଜୟ କୃଷ୍ଣ ପଟ୍ଟନାୟକ, କୃପାସିନ୍ଧୁ ପଣ୍ଡାଙ୍କ ସମେତ ବିଭିନ୍ନ ବିଭାଗୀୟ ଅଧିକାରୀ ଉପସ୍ଥିତ ଥିଲେ।