ବ୍ରହ୍ମପୁର ଅଫିସ,୧୦।୧୧: ଗଞ୍ଜାମ ଜିଲା ଟାଉନ୍ଥାନା ଅନ୍ତର୍ଗତ ଗାନ୍ଧୀନଗରସ୍ଥିତ ଓଡ଼ିଶା ସେଲ୍ସ ଏକ୍ଜିକ୍ୟୁଟିଭ୍ ଆସୋସିଏଶନ (ଓସିଆ) ଛାତରୁ ପଡ଼ି ଜଣେ ବ୍ୟକ୍ତିଙ୍କ ମୃତ୍ୟୁ ଘଟିଛି। ମୃତ ବ୍ୟକ୍ତି ଜଣଙ୍କ କଲିକତାର ଟି.ମହମ୍ମଦ(୫୨)ବୋଲି ପୋଲିସ କହିଛି । ରବିବାର ମୃତଦେହ ଜବତ କରି ପୋଲିସ ୨୫/୧୯ରେ ଏକ ଅପମୃତ୍ୟୁ ମାମଲା ରୁଜୁ କରିଛି ।
ପ୍ରକାଶ ଯେ, ଟି. ମହମ୍ମଦ ଏକ ଔଷଧ କମ୍ପାନୀରେ ମ୍ୟାନେଜର ଭାବେ କାମ କରୁଥିଲେ। ସେ ଗତ ପ୍ରାୟ ୬ ବର୍ଷ ହେଲା ଗାନ୍ଧୀନଗରସ୍ଥିତ ଓସିଆ ମେସ୍ରେ ଭଡ଼ାରେ ରହୁଥିଲେ। ଗତ ୪ ତାରିଖରେ ସେ କୌଣସି କାରଣରୁ ଉକ୍ତ କମ୍ପାନୀ ଛାଡିଥିଲେ। ଶନିବାର ସନ୍ଧ୍ୟାରେ ଉକ୍ତ ମେସ୍ର ରୋଷେୟା ତାଙ୍କୁ ଚା ପିଇବାକୁ ଦେଇଥିଲେ । ସେ ଚା କପଟି ଧରି ଛାତକୁ ଯାଇଥିଲେ । କିଛି ସମୟ ପରେ ସେ ହଠାତ୍ ଛାତରୁ ଖସି ପଡିଥିଲେ। ଉକ୍ତ ମେସରେ ରହୁଥିବା ରୋଷେୟା ଓ ପଡ଼ୋଶୀଙ୍କ ସହାୟତାରେ ତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ଏମ୍କେସିଜି ମେଡିକାଲରେ ଭର୍ତ୍ତି କରାଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି।