ଢେଙ୍କାନାଳ ଅଫିସ, ୨୬।୭-ଢେଙ୍କାନାଳ ଜିଲା କଙ୍କଡ଼ାହାଡ଼ ଥାନା ଅଞ୍ଚଳରେ ୨୦୧୫ରେ ଘଟିଥିବା ନାବାଳିକା ଛାତ୍ରୀ (୧୬ବର୍ଷ) ବଳାତ୍କାର ଘଟଣାର ରାୟ ଶୁକ୍ରବାର ପ୍ରକାଶ ପାଇଛି। ସ୍ବତନ୍ତ୍ର ପୋକ୍ସୋ ଅଦାଲତ ବିଚାରପତି ରାଜକିଶୋର ମହାପାତ୍ର ମାମଲାର ଅଭିଯୁକ୍ତ ସୁଦାମ ସାହୁଙ୍କୁ ଦୋଷୀ ସାବ୍ୟସ୍ତ କରିବା ସହ ୫ବର୍ଷ ସଶ୍ରମ କାରାଦଣ୍ଡ ଶୁଣାଇଛନ୍ତି। ଏଥିସହ ୧୦ ହଜାର ଟଙ୍କା ଜରିମାନା ଏବଂ ଅନାଦାୟେ ୩ ମାସ ଅଧିକ ଜେଲଦଣ୍ଡ ଭୋଗିବାକୁ ରାୟରେ ଉଲ୍ଲେଖ କରିଛନ୍ତି। ସରକାରଙ୍କ ପକ୍ଷରୁ ସ୍ବତନ୍ତ୍ର ପବ୍ଲିକ୍ ପ୍ରସିକ୍ୟୁଟର (ପୋକ୍ସୋ) ସୁଲେମାନ ଖଁା ମାମଲା ପରିଚାଳନା କରିଥିଲେ।
୨୦୧୫ ମେ ୧୩ରେ ସମ୍ପୃକ୍ତା ଛାତ୍ରୀ ଡିପ୍ଲୋମା ଏଣ୍ଟ୍ରାନ୍ସ ପରୀକ୍ଷା ଦେବାକୁ ଢେଙ୍କାନାଳ କଲେଜ ସେଣ୍ଟରକୁ ଯିବାପାଇଁ ଘରୁ ବାହାରିଥିଲେ। ଉକ୍ତ ସମୟରେ ଯାତାୟାତ ସୁବିଧା ନ ଥିଲା। ସୁଦାମ ବାଇକ୍ରେ ଢେଙ୍କାନାଳ ଯାଉଥିବା ଦେଖି ଝିଅକୁ ଛାଡ଼ିଦେବାକୁ ତାଙ୍କ ବାପା କହିଥିଲେ। ଫେରିବା ବେଳେ ଘରକୁ ଆଣିଦେବାକୁ କହି ଖର୍ଚ୍ଚ ବାବଦକୁ ୫୦୦ ଟଙ୍କା ଦେଇଥିଲେ। ଫେରିବା ବାଟରେ ଦଣ୍ଡାଧାର ଜଳଭଣ୍ଡାର ନିକଟରେ ଛାତ୍ରୀଙ୍କୁ ସୁଦାମ ବଳାତ୍କାର ଉଦ୍ୟମ କରିଥିଲେ। ଛାତ୍ରୀଜଣକ କୌଶଳକ୍ରମେ ସେଠାରୁ ଖସିଆସିବାରେ ସଫଳ ହୋଇଥିଲେ। ଘରେ ପହଞ୍ଚତ୍ ପରିବାର ଲୋକଙ୍କୁ ଘଟଣା କହିଥିଲେ। ଏ ନେଇ ନଂ. ୨୯/୧୫, ଦଫା ୩୬୩, ୩୫୪(ଏ), ୩୭୬, ୫୧୧, ୫୦୬, ୩ ଏସ୍ସିଏସ୍ଟି, ପିଓଏ ଆକ୍ଟ ଓ ୮,୧୦,୧୮ ପୋକ୍ସୋ ଆକ୍ଟରେ ମାମଲା ରୁଜୁ କରାଯାଇଥିଲା। ଅଭିଯୁକ୍ତଙ୍କୁ ଗିରଫ ପରେ ପୋଲିସ କୋର୍ଟ ଚାଲାଣ କରିଥିଲା। ମାମଲାର ସିଟି ସ୍ପେଶାଲ କେସ ନଂ. ୧୨/୧୫ର ବିଚାର କରି କୋର୍ଟ ଏହି ରାୟ ଶୁଣାଇଛନ୍ତି।