ଦିଗପହଣ୍ଡି,୨୧।୧୨(ଡି.ଏନ୍.ଏ.): ଗଞ୍ଜାମ ଜିଲା ଚିକିଟି ବ୍ଲକ ଅଞ୍ଚଳର ଜଣେ ଅଷ୍ଟମ ଶ୍ରେଣୀ ଛାତ୍ରୀଙ୍କୁ ଅସଦାଚରଣ କରାଯାଇଥିବା ଅଭିଯୋଗ ହୋଇଛି। ଛାତ୍ରୀଙ୍କ ମାଆ ଏନେଇ କେ. ନୂଆଗାଁ ଥାନାରେ ଏତଲା ଦେବା ପରେ ଆଇଆଇସି ମାଧବାନନ୍ଦ ନାୟକ ଘଟଣାର ତଦନ୍ତ କରି କେସ୍ ନଂ. ୨୬୩/୧୯ରେ ଅଭିଯୁକ୍ତମାନଙ୍କ ବିରୋଧରେ ମକଦ୍ଦମା ରୁଜୁ କରିଥିଲେ। ଘଟଣାରେ ଜଡ଼ିତ ଥିବା ଅଭିଯୋଗରେ ଜି. ସୋମେଶ ରେଡ୍ଡୀ,ଜି. ଲୋକେଶ ରେଡ୍ଡୀ ଏବଂ ଜି. ରମେଶ ରେଡ୍ଡୀଙ୍କୁ ତଦନ୍ତକାରୀ ପୋଲିସ ଅଧିକାରୀ ରୀତାଞ୍ଜଳି ନାୟକ ଗିରଫ କରି ବ୍ରହ୍ମପୁର କୋର୍ଟକୁ ଶନିବାର ଚାଲାଣ କରିଥିବା ଜଣାପଡ଼ିଛି। ଗତ ବୁଧବାର ପୂର୍ବାହ୍ନରେ ଛାତ୍ରୀ ଜଣକ ସ୍କୁଲ ଯାଉଥିବା ବେଳେ ଅଭିଯୁକ୍ତମାନେ ତାଙ୍କୁ ରାସ୍ତାରେ ଅଟକାଇ କମେଣ୍ଟ ମାରିବା ସହ ଅସଦାଚରଣ କରିଥିଲେ। ଘଟଣାର ଆପୋଷ ସମାଧାନ ପାଇଁ ଗାଁରେ ଉଦ୍ୟମ କରାଯାଇଥିଲେ ମଧ୍ୟ ଅଭିଯୁକ୍ତମାନଙ୍କ ଅସହଯୋଗ କାରଣରୁ ପୀଡ଼ିତା ଛାତ୍ରୀଙ୍କ ମାଆ ଓ ପରିବାର ଲୋକେ ଗୁରୁବାର ଥାନାରେ ପହଞ୍ଚି ଏତଲା ଦେଇଥିଲେ।