ବ୍ରହ୍ମପୁର ଅଫିସ,୧୫।୨: ଗଞ୍ଜାମ ଜିଲା ବୈଦ୍ୟନାଥପୁର ଥାନା ଅନ୍ତର୍ଗତ ଏକ ଘରୋଇ ସ୍କୁଲରେ ଅଭାବନୀୟ ଘଟଣା ଘଟିଛି। ଶ୍ରେଣୀଗୃହରେ ଜଣେ ଶିକ୍ଷୟିତ୍ରୀ ଜଣେ ଛାତ୍ରୀଙ୍କ ପ୍ୟାଣ୍ଟ ଖୋଲିଦେବାରୁ ହରଡ଼ଘଣାରେ ପଡ଼ିଛନ୍ତି। ଫଳରେ ଛାତ୍ରୀଙ୍କ ଅଭିଭାବକ ସ୍କୁଲ ପ୍ରିନ୍ସପାଲଙ୍କ ଦୃଷ୍ଟି ଆକର୍ଷଣ କରିଥିଲେ। ଏନେଇ ସ୍କୁଲ ପରିସରରେ ଉତ୍ତେଜନା ଦେଖାଦେଇଥିଲା। ଖବର ପାଇ ପୋଲିସ ସ୍କୁଲରେ ପହଞ୍ଚି ସଂପୃକ୍ତା ଶିକ୍ଷୟିତ୍ରୀଙ୍କୁ ଥାନାକୁ ଆଣିଥିଲା ।
ସୂଚନାଯୋଗ୍ୟ, ଶନିବାର ସ୍କୁଲରେ ଧଳା ୟୁନିଫର୍ମ ପିନ୍ଧି ଆସିବା ପରିବର୍ତ୍ତେ ଛାତ୍ରୀ ଜଣକ କଳା ଲେଗ୍ଇନ୍ସ ପିନ୍ଧି ଆସିଥିଲେ । କ୍ଲାସ ଆରମ୍ଭ ବେଳେ ସଂପୃକ୍ତା ଛାତ୍ରୀଙ୍କ ପ୍ୟାଣ୍ଟକୁ ଶିକ୍ଷୟିତ୍ରୀ ଜଣକ କାଢ଼ି ଦେଇଥିଲେ। ଭୟରେ ଛାତ୍ରୀ ଜଣଙ୍କ କାହାକୁ କିଛି ନ କହି ଚୁପ୍ ହୋଇ କ୍ଲାସରେ ବସିଥିଲେ । ସ୍କୁଲ ଛାଡ଼ିବା ବେଳେ ସେ ତାଙ୍କ ପିତାଙ୍କୁ ଘଟଣା ସମ୍ପର୍କରେ କହିଥିଲେ। ପରେ ଏନେଇ ଛାତ୍ରୀଙ୍କ ପିତା ଥାନାରେ ଅଭିଯୋଗ କରିଥିଲେ । ତେବେ ଶିକ୍ଷୟିତ୍ରୀ ଜଣଙ୍କ ଥାନାରେ ନିଜର ଭୁଲ ସ୍ବୀକାର କରିଥିଲେ। ଭବିଷ୍ୟତରେ ଏଭଳି ଭୁଲ୍ କେବେ କରିବେ ନାହିଁ ବୋଲି ଥାନାରେ ଅଣ୍ଡରଟେକିଂ ଦେଇଥିଲେ। ଶେଷରେ ଆପୋସ ସମାଧାନ ହୋଇଥିଲା ବୋଲି ପୋଲିସ କହିଛି।