ମାଲକାନଗିରି,୧୪ା୭(ଡି.ଏନ.ଏ./ସ୍ବ.ପ୍ର.)-ସତୀଗୁଡା କ୍ଷୁଦ୍ର ଜଳସେଚନ ବିଭାଗ ଅଧୀନରେ ଥିବା ୫ କିଲୋମିଟର ରାସ୍ତା ବିଭାଗ ମରାମତି ନ କରିବାରୁ ଗ୍ରାମବାସୀମାନେ ରାସ୍ତା ଉପରେ ଧାନ ତଳି ରୋଇ ଏହାର ପ୍ରତିବାଦରେ ଜଣାଇଥିଲେ। ପରେ ପ୍ରଶାସନ ଏ ଦିଗରେ ପଦକ୍ଷେପ ନେଇଥିଲା। ପ୍ରଶାସନିକ ଅଧିକାରୀମାନେ ଘଟଣା ସ୍ଥଳ ପରିଦର୍ଶନ କରିଥିଲେ। ଏହାର ମାତ୍ର ଗୋଟିଏ ସପ୍ତାହ ପରେ ଏବେ ଛାତ୍ରୀଛାତ୍ରମାନେ ଏପରି ପନ୍ଥା ଆପଣାଇଛନ୍ତି। ସେମାନେ ଚାଲି ଚାଲି ସ୍କୁଲକୁ ଯାଉଥିବା ନିତିଦିନିଆ ରାସ୍ତା ମରାମତି ହେଉ ନ ଥିବାରୁ ହଇରାଣ ହେଉଛନ୍ତି। ବିଶେଷ କରି ବର୍ଷା ଦିନେ ସେମାନେ କାଦୁଅ ଭିତରେ ପଶି ଯାତାୟାତ କରୁଛନ୍ତି। ଏବେ ସେମାନେ ଏହି କାଦୁଅ ରାସ୍ତାରେ ଧାନତଳି ରୋଇ ପ୍ରଶାସନ ନିଷ୍କ୍ରିୟତାର ପ୍ରତିବାଦ କରିଛନ୍ତି। ଏପରି ଘଟଣା ଘଟିଛି ମାଲକାନଗିରି ଜିଲା ଖଇରପୁଟ ବ୍ଲକର ମାଡ଼କାପଦର ପଞ୍ଚାୟତରେ।
ଖବରୁ ଜଣାପଡିଛି ମାଡକାପଦର ପଞ୍ଚାୟତ ସ୍କୁଲରେ କନ୍ଧଗୁଡା, ଧଉଡାକୁଟ, ବାଘଖଦ୍ରା ଗ୍ରାମର ଛାତ୍ରୀଛାତ୍ରମାନେ ପଢନ୍ତି। ବର୍ଷା ଦିନ ଆସିଲେ ସେମାନଙ୍କ ଚିନ୍ତା ବଢେ। ସ୍କୁଲ ଯିବା ରାସ୍ତା ମରାମତି ହୋଇ ନ ଥିବାରୁ ବର୍ଷା ହେଲେ ଏହି ରାସ୍ତା କାଦୁଅ ହୋଇଯାଏ। ସେମାନଙ୍କୁ କାଦୁଅ ଭିତରେ ପଶି ଯାତାୟାତ କରିବାକୁ ପଡେ। ଏବେ ଛାତ୍ରୀଛାତ୍ରମାନେ ଅଭିନବ ଉପାୟରେ ପ୍ରତିବାଦ କରିଛନ୍ତି। ଏହି କାଦୁଅ ରାସ୍ତାରେ ସେମାନେ ଧାନ ତଳି ରୋଇ ନିଜ ଅସନ୍ତୋଷ ପ୍ରକାଶ କରିଛନ୍ତି। ଛାତ୍ରୀଛାତ୍ରଙ୍କ ଏପରି କାର୍ଯ୍ୟକୁ ଗ୍ରାମବାସୀ ଏବଂ ଅଭିଭାବକ ସମର୍ଥନ ଜଣାଇଛନ୍ତି। ସୂଚନାଯୋଗ୍ୟ ଯେ, ଏହି ରାସ୍ତା ମରାମତି ଲାଗି କାର୍ଯ୍ୟ ଆରମ୍ଭ ହୋଇଥିଲେ ମଧ୍ୟ ବର୍ଷା ଆସିଯିବାରୁ କାର୍ଯ୍ୟ ହୋଇପାରି ନ ଥିବା କୁହାଯାଉଛି।