କୁଆମରା,୫ା୧୧(ଡି.ଏନ୍.ଏ.)- ଗୋପବନ୍ଧୁ ନଗର ବ୍ଲକ ପୁରୁଣା ବାରିପଦା ଆଞ୍ଚଳିକ ଡିଗ୍ରୀ ମହାବିଦ୍ୟାଳୟର ଅଧ୍ୟକ୍ଷ ଓ ଛାତ୍ରୀଛାତ୍ରଙ୍କ ବିବାଦ ଜଟିଳ ହେବାରେ ଲାଗିଛି। ଏଥିନେଇ କଲେଜରେ ଦିନକୁ ଦିନ ଅଶାନ୍ତି ବଢିବାରେ ଲାଗିଛି। ଘଟଣାର୧୮ ଦିନ ପରେ ବି ଅଦ୍ୟାବଧି କୌଣସି ସମାଧାନର ରାସ୍ତା ବାହାରୁ ନାହିଁ। ଅଧ୍ୟକ୍ଷଙ୍କ ଇସ୍ତଫା ଦାବି କରି ଛାତ୍ରୀଛାତ୍ରମାନେ କଲେଜ ଗେଟରେ ତାଲା ପକାଇ ପ୍ରତିଦିନ ସକାଳ ୯ଟାରୁ ଅପରାହ୍ନ ୪ଟା ପର୍ଯ୍ୟନ୍ତ ଧାରଣାରେ ବସୁଛନ୍ତି। ଅନ୍ୟପକ୍ଷେ ପରିଚାଳନା କମିଟି ଛାତ୍ରୀଛାତ୍ରମାନଙ୍କୁ ବୁଝାସୁଝା କରିବାରେ ମଧ୍ୟ ବିଫଳ ହୋଇଛନ୍ତି। ଅଧ୍ୟକ୍ଷ କଲେଜ ନ ଆସି ଛୁଟିରେ ରହିବା ଯୋଗୁଁ ଅଧିକ ଉତ୍ତେଜନା ବଢିବାରେ ଲାଗିଛି। କଲେଜ ଭିତରକୁ ଅଧ୍ୟାପକ ଓ ଅଧ୍ୟାପିକାମାନେ ପଶି ନ ପାରି ନିକଟସ୍ଥ ଗଛ ମୂଳେ ବସି ସମୟ କାଟୁଛନ୍ତି। ତେବେ ଘଟଣାର ୧୮ ଦିନ ପରେ ସୋମବାର କଲେଜ ପରିଚାଳନା କମିଟିର ସଭାପତି ଗୋଲକ ବିହାରୀ ନାୟକ ପହଞ୍ଚି ଦିନ ତମାମ ଛାତ୍ରୀଛାତ୍ର ଓ ଅଭିବାବକମାନଙ୍କ ସହ ଆଲୋଚନା କରିଥିଲେ ମଧ୍ୟ ସମାଧାନର ରାସ୍ତା ବାହାରି ପାରି ନାହିଁ। ମଙ୍ଗଳବାର ପୁଣି ବୈଠକ ବସିବ ଓ ଆଲୋଚନା ହେବ ବୋଲି ଜଣାପଡ଼ିଛି।