ଭୋଗରାଇ, ୨୯।୯(ଡି.ଏନ.ଏ.)-ଦାରିଦ୍ର ସୀମାରେଖା ତଳେ ଥିବା ଗରିବ ଲୋକଙ୍କୁ କେନ୍ଦ୍ର ଓ ରାଜ୍ୟ ସରକାର ସରକାରୀ ପକ୍କାଗୃହ ପାଇଁ ସହାୟତା ପ୍ରଦାନ କରୁଛନ୍ତି। ହେଲେ ପ୍ରଶାସନ ଓ ସ୍ଥାନୀୟ ଜନପ୍ରତିନିଧିଙ୍କ ଅବହେଳା ଯୋଗୁ ଗରିବ ଲୋକେ ଏହି ଯୋଜନାରୁ ବଞ୍ଚତ୍ତ ହେଉଛନ୍ତି। ବାଲେଶ୍ୱର ଜିଲା ଭୋଗରାଇ ବ୍ଲକ ବାରବାଟିଆ ଗ୍ରାମ ୧ ନମ୍ବର ୱାର୍ଡ଼ର ସୁଧାଂଶୁ କାମିଳା (୫୫) ଏଭଳି ଅବହେଳାର ଶିକାର ହୋଇଛନ୍ତି। ସୁଧାଂଶୁ ଜଣେ ଗରିବ ଚାଷୀ ହୋଇଥିବା ବେଳେ ସ୍ତ୍ରୀ ରେବତୀ ରୋଗିଣା। ଦୁଇପୁଅ କାତ୍ତିର୍ର୍କ ଓ ଗଣେଶ। ଜମିବାଡ଼ି ନ ଥିବାରୁ ପରିବାର ଚଳାଇବା ପାଇଁ ବାପ ଓ ପୁଅଙ୍କୁ ସଂଘର୍ଷ କରିବାକୁ ପଡୁଛି। ୫ବର୍ଷ ହେଲା ତାଙ୍କର ନଡ଼ାଛପର ଘର ଭାଙ୍ଗିଯାଇଛି। ବହୁ କଷ୍ଟରେ ସେମାନେ ଘର ଉପରେ ପଲିଥିନ ପକାଇ କଷ୍ଟେମଷ୍ଟେ ୪ ପ୍ରାଣୀ ରହୁଛନ୍ତି। ଚଳିତବର୍ଷ ଝଡ଼ବର୍ଷାରେ ପଲିଥିନ୍ ଚିରିଯାଇ ପାଣି ଗଳୁଛି। ବର୍ଷା ଓ ଘଡ଼ ଘଡ଼ି ସମୟରେ ପରିବାର ଲୋକେ ଭୟଭୀତ ଅବସ୍ଥାରେ ରହୁଛନ୍ତି। ସୁଧାଂଶୁ ଏବଂ ତାଙ୍କ ପୁଅ କାର୍ତ୍ତିକ ପର ଘରେ ମୂଲ ଲାଗି ଯାହା ରୋଜଗାର କରନ୍ତି ତାହା ରେବତୀଙ୍କ ଚିକିତ୍ସା ପାଇଁ ଖର୍ଚ୍ଚ ହୁଏ। ସୀମିତ ଅର୍ଥରେ ଦିନକୁ ଦୁଇ ଓଳି ପେଟପୂରା ଖାଇବାକୁ କଷ୍ଟକର ହୋଇପଡୁଥିବା ବେଳେ ଘର ସଜାଡ଼ିବା ସେମାନଙ୍କ ପାଇଁ ସ୍ବପ୍ନ। ସରକାରୀ ଗୃହ ଯୋଗାଇ ଦେବା ପାଇଁ ଏହି ପରିବାର ପଞ୍ଚାୟତ କାର୍ଯ୍ୟନିର୍ବାହୀ, ସରପଞ୍ଚ, ବିଡ଼ିଓଙ୍କୁ ନିବେଦନ କରିଛନ୍ତି। ପ୍ରତିଶ୍ରୁତି ମଧ୍ୟ ମିଳିଛି। ହେଲେ ସରକାରଙ୍କ ଏହି ଯୋଜନା ସାତସପନ ପରି ଲାଗୁଛି ବୋଲି କୁହନ୍ତି ସୁଧାଂଶୁ। ତଥାପି ଆଶାରେ ଅଛନ୍ତି।