ଲଣ୍ଡନ,୨୬।୭(ଏଏଫ୍ପି)- ଉତ୍ତର ଲଣ୍ଡନରେ ଆର୍ସେନାଲ ଫୁଟବଲର ମେସୁଟ ଓଜିଲ ଓ ସଇଦ କୋଲାସିନାକ ଛୁରା ମାଡ଼ରୁ ବର୍ତ୍ତି ଯାଇଛନ୍ତି। ସେଠାରେ ଗୁରୁବାର ସନ୍ଧ୍ୟାରେ ଦୁଇ ଜଣ ଦୁର୍ବୃତ୍ତ ସେମାନଙ୍କୁ ଛୁରିରେ ଆକ୍ରମଣ କରିବାକୁ ଉଦ୍ୟମ କରିଥିଲେ। କିନ୍ତୁ କୋଲାସିନାକ ଦୁର୍ବୃତ୍ତଙ୍କ ସହ ଲଢ଼େଇ କରିଥିଲେ। ସିସିଟିଭିରେ କଏଦ ହୋଇଥିବା ଫୁଟେଜ ଏବେ ସୋସିଆଲ ମିଡିଆରେ ଭାଇରାଲ ହୋଇସାରିଛି। ଉକ୍ତ ଭିଡିଓରେ ଦୁଇ ଦୁର୍ବୃତ୍ତ ବୋସନିଆନ ଡିଫେଣ୍ଡର କୋଲାସିନାକଙ୍କୁ ଛୁରି ଦେଖାଇଥିଲେ। ଏହାପରେ ୨୬ ବର୍ଷୀୟ ଖେଳାଳି ହେଲମେଟ ପିନ୍ଧିଥିବା ଦୁର୍ବୃତ୍ତଙ୍କ ସହ ଫାଇଟ୍ କରୁଥିବାର ଭିଡିଓରେ ଦେଖିବାକୁ ମିଳୁଛି। ତେବେ ଦୁର୍ବୃତ୍ତମାନେ ଲୁଟ୍ କରିବା ପାଇଁ ଆକ୍ରମଣ କରିଥିବା ସ୍ଥାନୀୟ ପୋଲିସ କହିଛି। ଏହି ଘଟଣାରେ ଏପର୍ଯ୍ୟନ୍ତ କାହାକୁ ଗିରଫ କରାଯାଇ ନାହିଁ। ତଦନ୍ତ ଚାଲିଛି। ତେବେ ଫୁଟବଲରଙ୍କୁ ଆକ୍ରମଣ କରାଯିବାର ଏହା ପ୍ରଥମ ଘଟଣା ନୁହେଁ। ୨୦୧୬ରେ ପୂର୍ବତନ ଓ୍ବେଷ୍ଟହାମ ଖେଳାଳି ଆଣ୍ଡି କାରୋଲଙ୍କୁ ବନ୍ଧୁକ ମୁନରେ ଧମକ ଦିଆଯାଇଥିଲା।