ପର୍ଲା, ୩୧।୧ (ଡି.ଏନ୍.ଏ)-କଳାହାଣ୍ଡି ଜିଲା ଧର୍ମଗଡ଼ ବ୍ଲକ ଦଣ୍ଡପାଟ ଅଂଚଲ ଛଞ୍ଚାଣବାହାଲି ପଁଚେତ୍ ବେହେରାଗୁଡ଼ା ଗଁାର ମା’ବାପ୍ ଛେଉଁଡ୍ ଭାଇବହେନ୍କୁ ଜିଲା ଶିଶୁ ୟୁନିଟ କତୁରପକ୍ଷ ସାହାଯ୍ର ହାତ୍ ବଢ଼େଇଛନ୍। ଗୁରୁବାର ଜିଲା ଶିଶୁ ମଙ୍ଗଲ ୟୁନିଟର ନିରଦେଶକ ଗୋଲାପ ଅବ୍ବୁଲ୍ଲା ଖଁାକଁର ଦେଖ୍ରେଖରେ ଗୁଟେ ଦଲ ଗଁାକେ ଆସି ଛୁଆକର ଆଈବୁଢ଼ୀ ସୁଲୋଚନା(୬୫)କଁର ସଂଗେ ଆଲୋଚନା କରିଥିଲେ। ସୁଲୋଚନା ବି ପୁଓ ସୁବାସର ଶୁଧିକାଯ୍ ସଏଲେ ନାତିନାତେନ୍କେ ଥଇଥାନ ଲାଗି ଛାଡ଼ିଦେବେ ବଲି କଥା ଦେଇଥିବାର ଜନାଯାଇଛେ।
ସୂଚନା ଅନ୍ସାରେ ବେହେରାଗୁଡ଼ା ଗଁାର କୁଷ୍ଠ ରୋଗ୍ରେ ପୀଡ଼ିତ ସୁବାସ ଦୋରୁଆନକଁର ଗଲା ୧୭ ତାରିଖ୍ ମୁର୍ତୁ ହେଇଥିଲା। ସେନ୍ତା ବଛ୍ରେ ଆଗ୍ରୁ ତାକର ମାଏକିନା ଝି’ ଦିବ୍ୟାଭାରତୀ(୭) ଆର ପୁଓ ମାନସ(୪)କେ ଶାଶ୍ ପାସେ ଛାଡ଼ି ପଲେଇ ଯାଇଛନ୍। ଏନ୍ତାଥି ସୁବାସକଁର ବୁଢ଼ୀ ମା’ ସୁଲୋଚନା ନାତିନାତେନକେ ପାଲ୍ପୋଷ କରୁଥିଲେ। ହେଲେ ପରିବାରଟା ନିହାତି ଗରିବ୍ ହେଇଥିଲାବେଲେ ଟଁକା ପଏସା ଅଭାବୁ ସୁଲୋଚନା ପୁଓର ଶୁଧିକାଯ୍ ଲାଗି ନିଜର ରାଶନକାର୍ଡ ଗହନା କରିଥିଲେ। ସେନ୍ତା ସେ ନାତିନାତେନକଁର ଭବିଷତ୍କେ ନେଇ ସବୁବେଲେ ଚିନ୍ତାରେ ରହୁଥିଲେ। ଇ ବାବ୍ଦେ ଧରିତ୍ରୀ ସମ୍ବଲପୁର ସଂସ୍କରଣରେ ଖବର ବାହାରିଥିଲା। ଖବର ବାହାରଲା ଉତାରୁ ଇ ଦୁଖି ପରିବାରକେ ଅନେକ ସହୁରୁଦ୍ ଲୋକ୍, ସ୍ବେଚ୍ଛାସେବୀ ସଂଗଠନ ସାହାଯ୍ର ହାତ୍ ବଢ଼େଇଥିଲେ। ସେନ୍ତା ମା’ବାପ୍ ଛେଉଁଡ୍ ଭାଇବହେନ୍କର ଥଇଥାନ ଲାଗି ମୂଲ ନିବାସୀ ଯୁବ ଫେଡେରେଶନର ସଦସିଅମାନେ ଜିଲା ଶିଶୁ ୟୁନିଟ ସଂଗେ କଥା ହେଇଥିଲେ। ସେହିସାବେ ଗୁରୁବାର ଶିଶୁ ୟୁନିଟର ନିରଦେଶକ ଅବ୍ବୁଲ୍ଲା ଖଁା, ଆଇନ ପରୀବେକ୍ଷକ ଅଧିକାରୀ ସୁଧାଂଶୁ ମହାପାତ୍ର, ବିଜେଡି ସଭାନେତ୍ରୀ କଲ୍ୟାଣି ନାଏକ, ଶ୍ୟାମସୁନ୍ଦର ମାଝି, ଢଗମାଳିଆ ନାଏକ, ସୁରେନ୍ଦ୍ର ସୁନାନୀ ସଂଗେ ମୂଲ ନିବାସୀ ଯୁବ ଫେଡେରେଶନର ସଭାପତି କମଳାକାନ୍ତ ବିହାରୀ, ନିରଦେଶକ ଯୁଗେଶ ତାଣ୍ଡି, ଫକିର ନାରାୟଣ ଜାଲ ପରମୁଖ ସୁଲୋଚନାକଁର ସଂଗେ ଆଲୋଚନା କରିଛନ୍। ଆଏବାର ହପ୍ତେ ଭିତରେ ଦିବ୍ୟାଭାରତୀ ଆର ମାନସକୁଁ ଭବାନୀପାଟଣାରେ ଥିବାର ଶିଶୁ ୟୁନିଟକେ ନେବାର ସଂଗେ ସେଠାନେ ତାକର ଥଇଥାନର ବେବସ୍ତା କରାଯିବା ବଲି ୟୁନିଟ ତରଫୁ ସୂଚନା ମିଲିଛେ।