ସୁନ୍ଦରଗଡ,୧୩।୪(ଡି.ଏନ.ଏ.): ଛେଳି ବେପାରୀଙ୍କୁ ଗୁଳିକରି ହତ୍ୟା କରିବା ପରେ ଲୁଟିନେଲେ ୯ ଲକ୍ଷ ଟଙ୍କା। ଏମସିଏଲ ରାସ୍ତାର ଲେଫ୍ରିପଡା ଥାନା ଅନ୍ତର୍ଗତ ଛଟେନପାଲି ତାରିଣୀ ମନ୍ଦିର ନିକଟରେ ଗୁରୁବାର ସକାଳେ ଏହି ଘଟଣା ଘଟିଥିବା ଜଣାପଡିଛି।
ସୂଚନାଯୋଗ୍ୟ, ସୁନ୍ଦରଗଡ ଭଷ୍ମା ଥାନା ଶରଧାପାଲି ଗ୍ରାମରୁ ୩ଜଣ ବ୍ୟବସାୟୀ ବାଇକ ଯୋଗେ ଲେଫ୍ରିପଡା ଥାନା ହାଣ୍ଡି ପାନିକୁ ଛେଳି କିଣିବାକୁ ଯାଉଥିଲେ। ଏହି ସମୟରେ ଛଟେନପାଲି ନିକଟରେ ପଛପାଖରୁ ହେଲମେଟ ପିନ୍ଧିଥିବା ୩ଜଣ ଦୁର୍ବୃତ୍ତ ବାଇକ୍ରେ ଆସି ତାଙ୍କ ବାଇକ୍କୁ ଧକ୍କା ଦେଇଥିଲେ। ଫଳରେ ସେମାନେ ତଳେ ପଡି ଯାଇଥିଲେ। ଏହାପରେ ଦୁର୍ବୃତ୍ତମାନେ ବ୍ୟବସାୟୀମାନେ ଧରିଥିବା ଟଙ୍କା ମୁଣିଟି ଛଡାଇବାକୁ ଚେଷ୍ଟା କରିଥିଲେ। ଏହା ଦେଖି ଟଙ୍କା ଧରିଥିବା ବ୍ୟବସାୟ ଜଣଙ୍କ ଦୌଡ଼ି ଯିବାକୁ ଚେଷ୍ଟା କରୁଥିଲା ବେଳେ ଦୁର୍ବୃତ୍ତମାନେ ଗୁଳି ଚଳାଇଥିଲେ। ଫଳରେ ବ୍ୟବସାୟୀ ଜଣଙ୍କ ସେଠାରେ ଟଳି ପଡିଥିଲେ ଏବଂ ସେ ଧରିଥିବା ୯ଲକ୍ଷ ଟଙ୍କା ମୁଣିଟିକୁ ଧରି ଦୁର୍ବୃତ୍ତମାନେ ଫେରାର୍ ହୋଇଯାଇଥିଲେ। ତେବେ ଘଟଣାସ୍ଥଳରେ ହିଁ ବ୍ୟବସାୟୀଙ୍କ ମୃତ୍ୟୁ ଘଟିଥିଲା। ଖବରପାଇ ଘଟଣାସ୍ଥଳରେ ପୋଲିସ ପହଞ୍ଚି ସାଇଣ୍ଟିଫିକ ଟିମ ସହାୟତାରେ ତଦନ୍ତ ଆରମ୍ଭ କରିବାସହ ମୃତ ବ୍ୟବସାୟୀଙ୍କ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ସୁନ୍ଦରଗଡ ଜିଲା ମୁଖ୍ୟ ଡାକ୍ତରଖାନାକୁ ପଠାଇଛି। ଫେରାର୍ ଦୁର୍ବୃତ୍ତମାନେ ହେମଗିର ପଟକୁ ଫେରାର୍ ହୋଇଯାଇଥିବା ବେଳେ ପୋଲିସ ସେମାନଙ୍କୁ ଧରିବା ପାଇଁ ତନାଘନା ଉଦ୍ୟମ ଚଳାଇଛି। ମୃତ ବ୍ୟବସାୟୀ ଜଣଙ୍କ ହେଲେ ପ୍ରଭାତ ନାଏକ। ତାଙ୍କ ଘର ଝାରସୁଗୁଡା ଜିଲା ତାଲମୁଣ୍ଡା ରେ ବୋଲି ଜଣାଯାଇଛି। ସେ କିଛି ବର୍ଷ ହେବ ସୁନ୍ଦରଗଡ ଜିଲା ଶରଧାପାଲିରେ ରହି ଛେଳି ବ୍ୟବସାୟ କରିଆସୁଥିଲେ। ଅନ୍ୟ ୨ବ୍ୟବସାୟୀ ସାମାନ୍ୟ ଆହତ ହୋଇଛନ୍ତି।