ପୁରୁଣା ଭୁବନେଶ୍ୱର,୨୦ା୨(ଡି.ଏନ.ଏ.): ମହାଶିବରାତ୍ରି ଉପଲକ୍ଷେ ଏକାମ୍ର କ୍ଷେତ୍ର ଚଳଚଞ୍ଚଳ ହୋଇ ଉଠିଛି। ପ୍ରଶାସନ ପକ୍ଷରୁ କଙ୍କ୍ରିଟ୍ ଟାଇଲ୍ ବିଛାଯାଇ ବିଭିନ୍ନ ସ୍ଥାନରେ ଅସ୍ଥାୟୀ ମଣ୍ଡପ ଓ ଟେଣ୍ଟ ବ୍ୟବସ୍ଥା କରାଯାଇଛି। ମାତ୍ର ମିଳିତ ଉଚ୍ଛେଦ ଟିମ୍ ପକ୍ଷରୁ ସୌନ୍ଦର୍ଯ୍ୟକରଣ ଓ ବିକାଶ ଆଳରେ ମନ୍ଦିର ଚତୁଃପାର୍ଶ୍ୱରେ ରହିଥିବା ବିଭିନ୍ନ ଛୋଟ ମନ୍ଦିର ପୁନରୁଦ୍ଧାର କରିବା ଦୂରେ ଥାଉ ଏଗୁଡିକ ନିକଟରେ ନିର୍ମାଣ ଓ ଖନନ କାର୍ଯ୍ୟ ଚାଲୁଛି। ହେଲେ ଏହି ସମୟରେ କୌଣସି ସରକାରୀ ଅଧିକାରୀ ଉପସ୍ଥିତ ନ ରହିବା ଶ୍ରଦ୍ଧାଳୁ ଓ ଏକାମ୍ରବାସୀଙ୍କୁ ଏହା ବ୍ୟଥିତ କରିଛି। ଦକ୍ଷିଣ ଦ୍ୱାର ନିକଟରେ ଶ୍ରୀଲିଙ୍ଗରାଜ ମନ୍ଦିର ସମସାମୟିକ ଗଡ଼ ଗଣେଶ ମନ୍ଦିର, ଯାହାକି ଭକ୍ତକବି ମଧୁସୂଦନ ଉଚ୍ଚ ବିଦ୍ୟାଳୟ ପରିସରରେ ରହିଥିଲା ଏବେ ବିଭାଗୀୟ ଅବହେଳା ଯୋଗୁ ଭୁଶୁଡି ପଡିବା ସ୍ଥିତିରେ। ଏହା ଦେଖି ବହୁ ସେବାୟତ ଓ ଶ୍ରଦ୍ଧାଳୁ ଏହି ଗଡ଼ ଗଣେଶ ସମେତ ହାଟସାହି ଅଞ୍ଚଳରେ ଏଭଳି ଅନୂ୍ୟନ ୧୦ଗୋଟିରୁ ଊର୍ଦ୍ଧ୍ୱ ମନ୍ଦିର ପୁନରୁଦ୍ଧାର କରିବାକୁ ଦାବି ହୋଇଛି। ଶହ ଶହ ବର୍ଷର ଐତିହ୍ୟ ନିକଟରେ ଶକ୍ତି ବିଭାଗ ପକ୍ଷରୁ ଟ୍ରାନ୍ସଫର୍ମର ବସାଇ ଯାଇଛି। ଏକ ପାଖରେ ନାଳ ନିର୍ମାଣ ପରେ ସାଧାରଣ ଲୋକେ ଶୌଚ ନିମନ୍ତେ ଓ ଅଳିଆଗଦା ପରି ଏଗୁଡିକୁ ବ୍ୟବହାର କରୁଛନ୍ତି ।