ବାଲେଶ୍ୱର ଅଫିସ, ୨।୬-ବାଲେଶ୍ୱରର ଲୋକପର୍ବ ଜଉକଣ୍ଢେଇ ବାହାଘର ଅବସରରେ ବିଭିନ୍ନ କାର୍ଯ୍ୟକ୍ରମ ଗାନ୍ଧୀ ସ୍ମୃତି ଭବନରେ ଅନୁଷ୍ଠିତ ହେଉଛି। ଚତୁର୍ଥ ସନ୍ଧ୍ୟାରେ ଭଜନ ଓ ଲୋକସଙ୍ଗୀତ ପ୍ରତିଯୋଗିତା ସହ ବାଲେଶ୍ୱରର ଲୋକନୃତ୍ୟ ଚଢ଼େୟା ନାଚ ଦର୍ଶକଙ୍କୁ ଆକୃଷ୍ଟ କରିଥିଲା।
ବାଲେଶ୍ୱର ଗାନ୍ଧୀସ୍ମୃତି ଭବନରେ ଅନୁଷ୍ଠିତ ହେଉଥିବା ୯ମ ଜଉକଣ୍ଢେଇ ବାହାଘର ଉତ୍ସବର ଚତୁର୍ଥ ସନ୍ଧ୍ୟାକୁ ଆଇଟିଆର୍ର ଯୁଗ୍ମ ନିର୍ଦ୍ଦେଶକ ନୀଳାଦ୍ରି ରାୟ ଉଦ୍ଘାଟନ କରିଥିଲେ। ଅନୁଷ୍ଠାନ ଉପଦେଷ୍ଟା କେଶୁ ଦାସ ପୌରୋହିତ୍ୟ କରିଥିବା ବେଳେ ମୁଖ୍ୟଅତିଥି ଭାବେ ଫକୀରମୋହନ ସାହିତ୍ୟ ପରିଷଦର ସଭାପତି ଡ଼. ଶିରିଶ ଚନ୍ଦ୍ର ଜେନା, ମୁଖ୍ୟବକ୍ତା ଭାବେ ବରିଷ୍ଠ ଖବରଦାତା ବଳରାମ ପାଢ଼ୀ, ସମ୍ମାନନୀୟ ଅତିଥି ଭାବରେ ଇଂ. ଅଶୋକ କୁମାର ମହାପାତ୍ର, ଯାତ୍ରା କଳାକାର ବାପି ପଣ୍ଡା ଓ ଜଉକଣ୍ଢେଇ ବାହାଘର ଉତ୍ସବ କମିଟିର ଉପସଭାପତି ଅଞ୍ଜଳି ପଣ୍ଡା ଯୋଗ ଦେଇଥିଲେ। ଅତିଥିମାନେ ଜଉ କାରିଗରମାନଙ୍କୁ ପ୍ରୋତ୍ସାହିତ କରିବା ପାଇଁ ସବୁସ୍ତରରେ ପ୍ରୟାସ ହେବା ଦରକାର ବୋଲି କହିଥିଲେ। ଏହି ଅବସରରେ ଉତ୍ସବ କମିଟିର ମୁଖପତ୍ର ‘ଜଇକଣ୍ଢେଇ’କୁ ଅତିଥିମାନେ ଉନ୍ମୋଚନ କରିଥିଲେ। ସ୍କୁଲ ପିଲାମାନଙ୍କ ମଧ୍ୟରେ ଭଜନ ଓ ଲୋକଗୀତ ପ୍ରତିଯୋଗିତା ଅନୁଷ୍ଠିତ ହୋଇଥିଲା। ବିଚାରକ ଭାବେ ଉଜ୍ଜ୍ୱଳ ଚାନ୍ଦ, କଲ୍ୟାଣୀ ନନ୍ଦ, ପ୍ରମୋଦ କୁମାର ଦାସ ଯୋଗଦେଇଥିଲେ। କୁଳିଗାଁର ଗ୍ରାମ୍ୟ ସଂସ୍କୃତି କଳାକାର ସଂଘ ଦ୍ୱାରା ବାଲେଶ୍ୱରର ଲୋକନୃତ୍ୟ ଚଢ଼େୟା ନାଚ ପରିବେଷଣ ହୋଇଥିଲା। ଦର୍ଶକମାନେ ସମସ୍ତ କାର୍ଯ୍ୟକ୍ରମକୁ ଦେଖି ମୁଗ୍ଧ ହୋଇଥିଲେ।