ଜଗତ୍ସିଂହପୁର ଅଫିସ,୧୮ା୩: ଓଡ଼ିଶାରେ ଜଣେ କରୋନା ଭୂତାଣୁ ଆକ୍ରାନ୍ତ ଚିହ୍ନଟ ହୋଇଥିବାରୁ ରାଜ୍ୟ ସରକାର ସଚେତନତା ଓ ସତର୍କତା ଉପରେ ଗୁରୁତ୍ୱ ଦେଇଛନ୍ତି। ଏହି ପରିପ୍ରେକ୍ଷୀରେ ଜଗତ୍ସିଂହପୁର ଜିଲାବାସୀଙ୍କୁ ସମ୍ଭାବ୍ୟ ପରିସ୍ଥିତିରୁ ରକ୍ଷା କରିବା ପାଇଁ ପ୍ରଶାସନ ତରଫରୁ ସୋମବାର ରାତିରୁ ସାରା ଜିଲାରେ ୧୪୪ ଧାରା ଜାରି କରାଯାଇଛି। କୌଣସି ସ୍ଥାନରେ ୫ ଜଣରୁ ଅଧିକ ଏକାଠି ହେବା ଉପରେ ରୋକ ଲଗାଯାଇଛି। ଏପରି କି ମଠ, ମନ୍ଦିର ଓ ମସଜିଦ୍ ଆଦିରେ ମଧ୍ୟ ଗହଳି ହୋଇପାରିବ ନାହିଁ। କୌଣସି ସାଂସ୍କୃତିକ କାର୍ଯ୍ୟକ୍ରମ, ସାଧାରଣ ସଭା, ସେମିନାର, କର୍ମଶାଳା ଓ ସମାବେଶ ପାଇଁ ଅନୁମତି ମିଳିବ ନାହିଁ। ଗେଷ୍ଟ ହାଉସ୍, ମଣ୍ଡପ, ଯାତ୍ରୀନିବାସ, ହୋଟେଲ, ଧର୍ମଶାଳା, ମଲ୍, ଜିମ୍, ସାମାଜିକ ଓ ଧାର୍ମିକ ଉତ୍ସବ ଉପରେ କଟକଣା ଲଗାଯାଇଛି। ଶାରଳା ମନ୍ଦିର, ଗୋରେଖନାଥ ପୀଠ, ଧ୍ୟାନକୁଦ, ଶିଆଳି ବେଳାଭୂମି, ପାରାଦୀପର ବାଲିଯାତ୍ରା ପଡିଆ, ନେହେରୁ ବଙ୍ଗଳା ଓ ସମୁଦ୍ର ବେଳାଭୂମି ଅଞ୍ଚଳରେ ୧୪୪ ଧାରା ଜାରି କରାଯାଇଛି। ଏ ପରିସ୍ଥିତିରେ ଲୋକେ ସାମାଜିକ ଦୂରତା ଅର୍ଥାତ୍ ଲୋକଙ୍କ ଠାରୁ ଦୂରତ୍ୱ ଅବଲମ୍ବନ କରିବା ଉପରେ ସଚେତନ ରହିବାକୁ ପରାମର୍ଶ ଦିଆଯାଇଛି। ମଙ୍ଗଳବାର ଜିଲାପାଳଙ୍କ କାର୍ଯ୍ୟାଳୟ ପରିସର ସଦ୍ଭାବନା ସଭାଗୃହରେ ଅନୁଷ୍ଠିତ ଖବରଦାତା ସମ୍ମିଳନୀରେ ଜିଲାପାଳ ସଂଗ୍ରାମ କେଶରୀ ମହାପାତ୍ର ଏହି ସୂଚନା ଦେଇଛନ୍ତି। ସେ କହିଛନ୍ତି, ବାହାରେ ରହୁଥିବା ଜିଲାର ୨୭ ଜଣ ସେମାନଙ୍କ ଘରକୁ ଫେରିଛନ୍ତି ବୋଲି ସୂଚନା ମିଳିଛି। ସେମାନଙ୍କ ମଧ୍ୟରୁ ୪ଜଣ ୨୮ଦିନ କାଟି ସାରିଥିବାରୁ ବିପଦମୁକ୍ତ ହୋଇ ସାରିଲେଣି। ସୋମବାର ଆସିଥିବା ୯ ଜଣଙ୍କ ସମେତ ମୋଟ ୧୧ ଜଣଙ୍କୁ ଅବଜରଭେଶନ୍ରେ ରଖାଯାଇଛି। କିନ୍ତୁ ୩ ଜଣଙ୍କ ସନ୍ଧାନ ମିଳୁନି। ସେମାନେ ଦେଇଥିବା ଠିକଣା ଭୁଲ୍ ଥିବାରୁ ଅସୁବିଧା ହେଉଛି। ତଥାପି ସେମାନଙ୍କ ସନ୍ଧାନ ପାଇଁ ଉଦ୍ୟମ ଚାଲିଛି। ଅନ୍ୟପଟେ ଏବେ ପୁରୀ ଓ କୋଣାର୍କ ନ ଯିବା ପାଇଁ ଜିଲାପାଳ ଜିଲାବାସୀଙ୍କୁ ପରାମର୍ଶ ଦେଇଛନ୍ତି। ଯେହେତୁ ଏହିସବୁ ସ୍ଥାନକୁ ବିଦେଶୀ ଓ ଅନ୍ୟ ରାଜ୍ୟର ପର୍ଯ୍ୟଟକମାନେ ଆସିଛନ୍ତି ତେଣୁ ସମ୍ଭାବ୍ୟ ପରିସ୍ଥିତିକୁ ଏଡାଇବା ପାଇଁ ଲୋକେ ସେ ସ୍ଥାନକୁ ନ ଯିବା ଉଚିତ ବୋଲି କୁହାଯାଇଛି। ଗୁଜବ ପ୍ରଚାର କଲେ ବନ୍ଧାହେବେ ବୋଲି ସୂଚନା ଦିଆଯାଇଛି। ଖବରଦାତା ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ ଅତିରିକ୍ତ ଜିଲାପାଳ ସଚିଦାନନ୍ଦ ସାହୁ, ଏସ୍ପି ପ୍ରକାଶ ଆର୍, ଜିଲା ମୁଖ୍ୟ ଚିକିତ୍ସା ଅଧିକାରୀ ଡ. ବିଜୟା ପଣ୍ଡା ଏବଂ ଜିଲା ସୂଚନା ଓ ଲୋକ ସମ୍ପର୍କ ଅଧିକାରୀ ଉପସ୍ଥିତ ଥିଲେ।