ଜଗତ୍ସିଂହପୁର ଅଫିସ,୧୫ା୩: ଜଗତ୍ସିଂହପୁର ଜିଲା ମୁଖ୍ୟ ଚିକିତ୍ସାଳୟ ପରିସରରେ ଥିବା ଡାୟାଲିସିସ୍ ୟୁନିଟ୍ରେ ପୁଣି ୩ଟି ମେଶିନ୍ ବୃଦ୍ଧି ହୋଇଛି। ଏହାକୁ ଜଗତ୍ସିଂହପୁର ବିଧାୟକ ପ୍ରଶାନ୍ତ କୁମାର ମୁଦୁଲି ଏବଂ ଜିଲାପାଳ ସଂଗ୍ରାମ କେଶରୀ ମହାପାତ୍ର ଉଦ୍ଘାଟନ କରିଛନ୍ତି। ଆଗରୁ ୩ଟି ମେଶିନ୍ରେ କାର୍ଯ୍ୟ ହେଉଥିଲା। ଏବେ ଏହାକୁ ମିଶାଇ ୬ଟି ମେଶିନ୍କୁ ବୃଦ୍ଧି କରାଯାଇଛି। ଏହାଦ୍ୱାରା କିଡ୍ନୀ ସମସ୍ୟାଜନିତ ରୋଗୀଙ୍କ ସୁବିଧାରେ ଡାୟାଲିସିସ୍ ହୋଇପାରିବ। ଡାୟାଲିସିସ୍ ନିମନ୍ତେ ରୋଗୀଙ୍କୁ କଟକ ଯିବାକୁ ପଡିବ ନାହିଁ। ଏଥିସହିତ ମେଡିକାଲ ଲାବୋରେଟୋରୀର ଏକ ଅଟୋ ଆନାଲାଇଜରକୁ ମଧ୍ୟ ବିଧାୟକ ଓ ଜିଲାପାଳ ଉଦ୍ଘାଟନ କରିଛନ୍ତି। ଏହି ଅଟୋ ଆନାଲାଇଜର ମାଧ୍ୟମରେ ଗ୍ଲୁକୋଜ୍, ୟୁରିଆ, କ୍ରିଏଟିନାଇନ୍, ବିଲିରୁବିନ୍, ଆଲ୍କାଲାଇନ୍ ଫସଫେଟ୍, କୋଲେଷ୍ଟରଲ୍, ଟ୍ରାଇଗ୍ଲିସେରାଇଡ୍, ୟୁରିକ୍ ଏସିଡ୍ ପରୀକ୍ଷା କରାଯିବ। ଏହି କାର୍ଯ୍ୟକ୍ରମରେ ଜିଲା ମୁଖ୍ୟ ଚିକିତ୍ସା ଅଧିକାରୀ ଡ. ବିଜୟା ପଣ୍ଡା, ଏଡିଏମ୍ଓ (ମେଡିକାଲ) ଡ. ଲାଲମୋହନ ରାଉତରାୟ, ଡିପିଏଚ୍ଓ ଡ. ଶତୃଘ୍ନ ଦାସ, ଏଡିପିଏଚ୍ଓ (ଟିବି) ଡ. ବସନ୍ତ ବାରିକ, ଏଡିପିଏଚ୍ଓ (ଭିଭିଡି)ଡ. କ୍ଷେତ୍ରବାସୀ ଦାଶ ପ୍ରମୁଖ ଉପସ୍ଥିତ ଥିଲେ। ଏହାପରେ ଜିଲାପାଳ ଓ ବିଧାୟକ ନିର୍ମାଣ ହେବାକୁ ଥିବା ଏମ୍ସିଏଚ୍ ବିଲ୍ଡିଂ ସ୍ଥାନ ପରିଦର୍ଶନ କରି କିପରି ଏହା ଶୀଘ୍ର ଆରମ୍ଭ ହେବ ତା’ଉପରେ ଜିଲା ମୁଖ୍ୟ ଚିକିତ୍ସା ଅଧିକାରୀଙ୍କ ସହ ଆଲୋଚନା କରିଥିଲେ।