ଅନୁଗୋଳ ଅଫିସ, ୨୬।୯ – ଅନୁଗୋଳ ଓ ତାଳଚେର ଅଞ୍ଚଳର ଜଗନ୍ନାଥ ଟ୍ରକ୍ ଓନର ଆସୋସିଏଶନ୍ କର୍ମକର୍ତ୍ତାମାନେ ଲୋଡିଂ ବ୍ୟବସ୍ଥାକୁ ନେଇ ଖୁସି ନୁହନ୍ତି। ତାଳଚେର ବିଧାୟକ ଏଥିରେ ବାଧା ସୃଷ୍ଟି କରିବାକୁ ଷଡ଼ଯନ୍ତ୍ର କରୁଥିବା ଆସୋସିଏଶନ୍ର କର୍ମକର୍ତ୍ତାମାନେ ବୁଧବାର ସ୍ଥାନୀୟ ଏକ ହୋଟେଲରେ ଆୟୋଜିତ ଖବରଦାତା ସମ୍ମିଳନୀରେ ଅଭିଯୋଗ କରିଛନ୍ତି।
ଆସୋସିଏଶନ ସଭାପତି କରୁଣାକର ସାହୁ, ସମ୍ପାଦକ ରାମଚନ୍ଦ୍ର ସାହୁ, ସହ-ସମ୍ପାଦକ ସୁନୀଲ ବିଶ୍ୱାଳ, ସଦସ୍ୟ ଆରବ୍ୟ ସାହୁ, ଦୁଃଶାସନ ସାହୁ ପ୍ରମୁଖ ଟ୍ରକ୍ ଲୋଡିଂ ସମସ୍ୟା ସମ୍ପର୍କରେ ମତାମତ ରଖିଥିଲେ। ସଭାପତି ସାହୁ କହିଥିଲେ, ଘଣ୍ଟପଡ଼ା, ରୋଢ଼ାଶର, ଚାଳଗଡ଼, ବଇଣ୍ଡା, ପଦ୍ମାବତୀପୁର, ବାହାଳ ଆଦି ଗ୍ରାମ କୋଇଲା ଖଣି ଦ୍ୱାରା ପ୍ରଭାବିତ ହୋଇଥିବାରୁ କେତେଜଣ ବେକାର ଯୁବକ ଟ୍ରକ୍ ଦ୍ୱାରା କୋଇଲା ପରିବହନ କରି କିଛି ରୋଜଗାର କରୁଛନ୍ତି। କିନ୍ତୁ କିଛି ଦିନ ହେବ କୋଇଲା ଲୋଡିଂରେ ବହୁ ପ୍ରକାରର ବାଧାବିଘ୍ନ ଘଟୁଛି। ଲୋଡିଂ ଯେଉଁ ପରିମାଣର ହେବା କଥା ତାହା ହୋଇପାରୁ ନାହିଁ। ୧୦୩ ମାଲିକଙ୍କ ୧୮୦ ଟ୍ରକ୍ ମଧ୍ୟରୁ ୮୦ରୁ ୧୦୦ ଟ୍ରକ୍ରେ ମାଲ ପରିବହନ କରାଯାଉଛି। ଏହି ସମୟରେ ସେରାବାଲି କମ୍ପାନୀ ନାମକ ଏକ ଠିକା ସଂସ୍ଥା ସ୍ଥାନୀୟ କୋଇଲା ଖଣିରୁ ପରିବହନ ପାଇଁ ଅନୁମତି ପାଇଛି। ଏହି କମ୍ପାନୀ ନିଜର ୩୦ଟି ଟ୍ରକ୍କୁ ଆଣି ଖଣି ନିକଟରେ ରଖିଛି। ଆଗକୁ କମ୍ପାନୀ ସମସ୍ତ କୋଇଲା ନିଜ ଟ୍ରକ୍ ଦ୍ୱାରା ପରିବହନ କରିବ ବୋଲି ସାହୁ କହିଛନ୍ତି। ଏପରି କି ତାଳଚେର ଅଞ୍ଚଳର କେତେଜଣ ଯୁବକଙ୍କୁ ସୁପରଭାଇଜର କରି ଏପରି କାର୍ଯ୍ୟ କରାଯାଉଛି। ସ୍ଥାନୀୟ ଜଗନ୍ନାଥ କୋଇଲା ଖଣିରୁ ଦୈନିକ ୩ ହଜାର ଟନ୍ କୋଇଲା ଉପତ୍ାଦନ ହେଉଛି। ଅନ୍ୟସ୍ଥାନରୁ କୋଇଲା ପରିବହନ ପାଇଁ ଆମେମାନେ ସ୍ଥାନୀୟ ବିଧାୟକଙ୍କ ନିକଟକୁ ୧୫ ଦିନ ପୂର୍ବରୁ ଯାଇଥିଲୁ। କିନ୍ତୁ ସେ ଆମକୁ ସହଯୋଗ କରିବା ପରିବର୍ତ୍ତେ ମାନସିକ ଚାପ ଦେଇଥିଲେ। ଏ ନେଇ ତାଳଚେର ବିଧାୟକ ବ୍ରଜକିଶୋର ପ୍ରଧାନଙ୍କ ସହ ଯୋଗାଯୋଗ ସମ୍ଭବ ନ ହେବାରୁ ମତାମତ ମିଳିପାରି ନାହିଁ। ତେବେ ତାଳଚେର ଉପଜିଲାପାଳଙ୍କ ଜରିଆରେ ଏମ୍ପି, ବିଧାୟକ, ଥାନା ଅଧିକାରୀ ଓ ଏମ୍ସିଏଲ୍ କର୍ତ୍ତୃପକ୍ଷଙ୍କୁ ସମସ୍ୟା ସମ୍ପର୍କରେ ଅବଗତ କରାଯାଇଥିବା ଆସୋସିଏଶନ ପକ୍ଷରୁ କୁହାଯାଇଛି। ଏହି ଘଟଣାରେ ପ୍ରଶାସନ ଓ ରାଜନୈତିକ ବ୍ୟକ୍ତିମାନେ ହସ୍ତକ୍ଷେପ କରି ସମାଧାନ କରିବାକୁ ଆସୋସିଏଶନ କର୍ମକର୍ତ୍ତାମାନେ ଦାବି କରିଛନ୍ତି।