ପୁରୀ,୩୦ା୧୧(ଅଜିତ ମହାନ୍ତି): ଜଗନ୍ନାଥ ସଡ଼କକୁ ଜାତୀୟ ରାଜପଥ ମାନ୍ୟତା ଦାବିରେ ସାମାଜିକ ଅନୁଷ୍ଠାନ ‘ପ୍ରୟାସ’ ପକ୍ଷରୁ ଜାତୀୟ ରାଜପଥ ଆଞ୍ଚଳିକ ମୁଖ୍ୟ ବୀରେନ୍ଦ୍ର ସିଂହଙ୍କୁ ଭେଟି ଏକ ଦାବିପତ୍ର ଦିଆଯାଇଛି। ଦାବିପତ୍ରରେ ଉଲ୍ଲେଖ ହୋଇଛି ଯେ, ପୁରୀକୁ ଦକ୍ଷିଣ ଓଡ଼ିଶା ଓ ପଶ୍ଚିମ ଓଡ଼ିିଶା ସହିତ ସଂଯୋଗ କରୁଥିବା ଅବିଭକ୍ତ ପୁରୀ ଜିଲାର ଜୀବନରେଖା ନୂଆ ଜଗନ୍ନାଥ ସଡ଼କ। ତେଣୁ ଉକ୍ତ ସଡ଼କକୁ ଔପଚାରିକ ଭାବେ ଜାତୀୟ ରାଜପଥ ମାନ୍ୟତା ପ୍ରଦାନ କରିବା ସହ ରାସ୍ତା କାର୍ଯ୍ୟ ଆରମ୍ଭ କରାଯାଉ। ଉକ୍ତ ସଡ଼କ ଜାତୀୟ ରାଜପଥ ମାନ୍ୟତା ପାଇବା ପାଇଁ ସମସ୍ତ ଆବଶ୍ୟକତା ପୂରଣ କରିସାରିଥିବାରୁ ଏବଂ ଏହାର ଡିପିଆର୍ ପ୍ରସ୍ତୁତ କରାଯାଇ ଭୂପୃଷ୍ଠ ପରିବହନ ମନ୍ତ୍ରଣାଳୟକୁ ୫ବର୍ଷ ପୂର୍ବରୁ ପ୍ରଦାନ କରାଯାଇ ସାରିଥିବାରୁ ଏ କ୍ଷେତ୍ରରେ ଅଗ୍ରଗତି ବିଳମ୍ବିତ ହେବା ଦୁର୍ଭାଗ୍ୟଜନକ ବୋଲି କୃଷ୍ଣଚନ୍ଦ୍ର ଜଗଦେବ ଆଲୋଚନା କାଳରେ କହିଥିଲେ। ସେହିପରି ପ୍ରୟାସ ରାଜ୍ୟ ସମ୍ପାଦକ କାମାକ୍ଷା ପ୍ରଧାନ ଜନସ୍ବାର୍ଥ ସମ୍ବଳିତ ଏହି ପ୍ରସଙ୍ଗକୁ ଯଦି ଆଉ ଅଣଦେଖା କରାଯିବ ତେବେ ଜନ ଆନ୍ଦୋଳନ କରାଯିବ ବୋଲି କହିଥିଲେ। ଉକ୍ତ ପ୍ରତିନିଧି ମଣ୍ଡଳୀରେ ଅନ୍ୟମାନଙ୍କ ମଧ୍ୟରେ ଶ୍ରୀନିବାସ ପାତ୍ର, ଜିଷ୍ଣୁଜୟ ମତଗଜ ସିଂ, ଅନନ୍ତ ନାରାୟଣ ମଙ୍ଗରାଜ, ରତିକାନ୍ତ ତ୍ରିପାଠୀ ଏବଂ ତରୁଣସେନ ସ୍ବାଇଁ ପ୍ରମୁଖ ସାମିଲ ଥିଲେ ।