ସମ୍ବଲପୁର,୧୪।୬(ବ୍ୟୁରୋ)-ସମ୍ବଲପୁର ଜିଲା ରେଢ଼ାଖୋଲ ବନଖଣ୍ଡ ଅଧୀନ ବଣିଆବନ୍ଧ ଗାଁ ଜଙ୍ଗଲରେ ରବିବାର ସନ୍ଧ୍ୟାରେ ଏକ ଅଘଟଣ ଘଟିଛି। ରଜ ସଂକ୍ରାନ୍ତି ଅବସରରେ ଜଙ୍ଗଲକୁ ମହୁ ସଂଗ୍ରହ କରିବାକୁ ଯିବା ୩ ଜଣ ଲୋକଙ୍କୁ କାଳ ହୋଇଛି। ଭାଲୁ ଆକ୍ରମଣରେ ଦୁଇ ଜଣଙ୍କ ଜଙ୍ଗଲରେ ହିଁ ମୃତ୍ୟୁ ଘଟିଛି। ଜଣେ ଆହତ ହୋଇଛନ୍ତି। ସେହିଭଳି ଗଛରେ ଚଢ଼ି ଦୁଇ ଜଣ ଯୁବକ ଭାଲୁ କବଳରୁ ଅଳ୍ପକେ ବର୍ତ୍ତି ଯାଇଛନ୍ତି। ତେବେ ମୃତକ ଦ୍ୱୟ ହେଲେ ବଣିଆଁବନ୍ଧ ଗାଁର ଚେରୁ ମୁଣ୍ଡା (୫୫), କୃଷ୍ଣ ମୁଣ୍ଡା (୪୮)। ସେହିପରି ଆହତ ବ୍ୟକ୍ତି ଜଣକ ହେଲେ ଅଷାଢୁ ମୁଣ୍ଡା (୪୦)। ତାଙ୍କୁ ରେଢ଼ାଖୋଲ ଡାକ୍ତରଖାନାରେ ପ୍ରାଥମିକ ଚିକିତ୍ସା ପରେ ବୁର୍ଲା ଭିମ୍ସାର ପଠାଯାଇଛି। ସୁବନ ମୁଣ୍ଡା (୨୦) ଓ ସୁବଳ ମୁଣ୍ଡା (୨୦) ଅଳ୍ପକେ ବର୍ତ୍ତି ଯାଇଛନ୍ତି। ରାତିସୁଦ୍ଧା ମୃତଦେହ ଉଦ୍ଧାର ହୋଇ ପାରିନାହିଁ। ବନ ବିଭାଗ କର୍ମଚାରୀ ଘଟଣା ସ୍ଥଳରେ ଜଗି ରହିଛନ୍ତି। ଅନ୍ୟପକ୍ଷେ ରେଢାଖୋଲ ଡିଏଫଓ ସଂଗ୍ରାମ କେଶରୀ ବେହେରା ସୂଚନା ଦେଇଛନ୍ତି ଯେ, ଭାଲୁ ଆକ୍ରମଣରୁ ବର୍ତ୍ତିବାକୁ ଦୁଇ ମୃତକ ମଧ୍ୟ ଭାଲୁ ସହ ଲଢେଇ କରିଥିଲେ। ଏଣୁ ଘଟଣାସ୍ଥଳରେ ମଧ୍ୟ ଭାଲୁର ମୃତ୍ୟୁ ଘଟିଛି।