ମାଲକାନଗିରି,୧୩ା୧୨ (ଡି.ଏନ୍.ଏ.): ମାଲକାନଗିରି ଜିଲାରେ ପ୍ରାକୃତିକ ଜଙ୍ଗଲର ଅବକ୍ଷୟ, ମୂଲ୍ୟବାନ ଗଛସବୁ ବିଲୁପ୍ତ ହେବାରେ ଲାଗିଛି। ଏଥିସହ ବନ୍ୟଜନ୍ତୁଙ୍କ ସଂଖ୍ୟା ଦିନକୁ ଦିନ ଲୋପ ପାଉଛି। ଏହାକୁ ନେଇ ମାଲକାନଗିରି ଜିଲାର ୬ଟି ବନ ସଂରକ୍ଷଣ ସମିତି ଉଦ୍ବେଗ ପ୍ରକାଶ କରିଛନ୍ତି। ବର୍ଷ ବର୍ଷ ଧରି ଜିଲାର ଗ୍ରାମାଞ୍ଚଳରେ ବସବାସ କରୁଥିବା ଆଦିବାସୀ ଏବଂ ଅନ୍ୟାନ୍ୟ ବର୍ଗର ଲୋକମାନେ ଜଙ୍ଗଲ ଉପରେ ନିର୍ଭର କରି ଆସୁଛନ୍ତି। ଜଙ୍ଗଲ ନଷ୍ଟ ଏବଂ ବନ୍ୟଜନ୍ତୁଙ୍କ ବିଲୁପ୍ତି ଯୋଗୁ ଏହାର ପ୍ରଭାବ ପରିବେଶ ଉପରେ ପଡୁଛି। ଫଳରେ ଆଦିବାସୀମାନଙ୍କ ଜୀବନ ଜୀବିକା ଉପରେ ବିପଦ ସୃଷ୍ଟି ହୋଉଛି। ଏହାକୁ କିପରି ରୋକାଯାଇପାରିବ। ଜଙ୍ଗଲ ଓ ବନ୍ୟଜନ୍ତୁଙ୍କ ଅଭିବୃଦ୍ଧି ଘଟିବ ସେନେଇ ଜିଲାର ଜଦୁଗୁଡା, କଣ୍ଡେଲି, ତଣ୍ଡାପାଲି, ଉଡୁପା, ମୁରିଆପାଲି, ଝରାପାଲିର ୬ଟି ବନ
ସଂରକ୍ଷଣ ସମିତିର ୬ଶହରୁ ଊର୍ଦ୍ଧ୍ୱ ଗ୍ରାମବାସୀ ଶୁକ୍ରବାର କଣ୍ଡେଲିଠାରେ ଏକାଠି ହୋଇଥିଲେ। ରାଜ୍ୟ ବନ ଉନ୍ନୟନ ସଂସ୍ଥା ଏବଂ ମାଲକାନଗିରି ବନାଞ୍ଚଳ ପକ୍ଷରୁ ଆୟୋଜିତ ଏକ ସଚେତନତା କାର୍ଯ୍ୟକ୍ରମରେ ସମସ୍ତେ ଏକାଠି ହୋଇଥିଲେ। ଏଥିରେ ମାଲକାନଗିରି ବନଖଣ୍ଡର ସହକାରୀ ବନ ସଂରକ୍ଷକ ଶ୍ରୀକାନ୍ତ ନାୟକ, ବନାଞ୍ଚଳ ଅଧିକାରୀ ବାସୁଦେବ ନାୟକ, ବନ ଉନ୍ନୟନର ଜିଲା ସଂଯୋଜକ ପି. କିଶୋର କୁମାର, ସଦସ୍ୟ ଶ୍ରୀନିବାସ ପାତ୍ର, ପଦ୍ମଗିରିର ପୂର୍ବତନ ସରପଞ୍ଚ ଲକ୍ଷ୍ମଣ ନାୟକ, କୃଷ୍ଣ ମାଡକାମିଙ୍କ ସହ ୬ଟି ବନ ସଂର କ୍ଷଣ ସମିତିର ସଭାପତି ଏବଂ ସଦସ୍ୟମାନେ ଉପସ୍ଥିତ ଥିଲେ। ବର୍ତ୍ତମାନ ସ୍ଥିତିରେ କିପରି ଜଙ୍ଗଲର ସୁରକ୍ଷା ଅଭିବୃଦ୍ଧି ହୋଇପାରିବ, ବନ୍ୟଜନ୍ତୁମାନେ ସୁରକ୍ଷିତ ରହିପାରିବେ, ବୃକ୍ଷରୋପଣ ସହ ଜଙ୍ଗଲ ଉପରେ ନିର୍ଭର କରୁଥିବା ଲୋକଙ୍କ ଜୀବନଜୀବିକା ଉପରେ ସହକାରୀ ବନ ସଂରକ୍ଷକ ନାୟକ ଆଲୋକପାତ କରିଥିଲେ ା ଜଙ୍ଗଲରେ ନିଆଁ ଲାଗିଲେ ବନ ସଂରକ୍ଷଣ ସମିତିର ଭୂମିକା, ଲଘୁ ବନଜାତ ଦ୍ରବ୍ୟ ସଂଗ୍ରହ, ବିକ୍ରି, ବାଉଁଶ ଜଙ୍ଗଲର ଅଭିବୃଦ୍ଧି, ବାଉଁଶ କାରିଗରଙ୍କୁ ପ୍ରୋତ୍ସାହନ ସମ୍ପର୍କରେ ବନ ଉନ୍ନୟନ ସଂଯୋଜକ ପି. କିଶୋର କୁମାର ବକ୍ତବ୍ୟ ରଖିଥିଲେ।