ଯଶୀପୁର,୧୬ା୩(ଡି.ଏନ୍.ଏ.)-ଶିମିଳିପାଳ ଅଭୟାରଣ୍ୟ ସଂଲଗ୍ନ ଅସ୍ତକୁମାର ପଞ୍ଚାୟତର ବଳାରାମପୁରଠାରେ ଶନିବାର ବନବାସୀଙ୍କୁ ନେଇ ବୈଠକ ଅନୁଷ୍ଠିତ ହୋଇଥିଲା। ଜଙ୍ଗଲ ଇଲାକାରେ ବସବାସ କରୁଥିବା ଆଦିବାସୀଙ୍କୁ ଉଚ୍ଛେଦ କରାଯିବା ସଂକ୍ରାନ୍ତ ନିଷ୍ପତ୍ତିକୁ ସେମାନେ ବିରୋଧ କରିଥିଲେ। ଏହାଦ୍ୱାରା ବନବାସୀ ତଥା ଆଦିବାସୀଙ୍କ ଜୀବନଜୀବିକା ପ୍ରଭାବିତ ହେବ ବୋଲି ଦର୍ଶାଇଥିଲେ। ଜଙ୍ଗଲ ଅଧିବାସୀଙ୍କୁ ଉଚ୍ଛେଦ କରାଯିବା ସଂକ୍ରାନ୍ତରେ ସୁପ୍ରିମକୋର୍ଟଙ୍କ ନିର୍ଦ୍ଦେଶର ପୁନଃବିଚାର ଓ କେନ୍ଦ୍ରୀୟ ଜଙ୍ଗଲ ଆଇନ ପ୍ରତ୍ୟାହର ଦାବିରେ ଆସନ୍ତା ୩୦ ତାରିଖରେ ରାଜଧାନୀ ଦିଲ୍ଲୀରେ ବିକ୍ଷୋଭ ପ୍ରଦର୍ଶନ ଡାକରା ଦିଆଯାଇଛି। ଏହି ପରିପ୍ରେକ୍ଷୀରେ ସ୍ଥାନୀୟ ବନବାସୀ ସଂଗଠିତ ହୋଇ ପ୍ରତିବାଦ ଜଣାଇଛନ୍ତି। ଉକ୍ତ ସଭାରେ ବହୁ ସଂଖ୍ୟାରେ ଜଙ୍ଗଲ ବାସିନ୍ଦା ଓ ସେମାନଙ୍କ ପ୍ରତିନିଧି ଯୋଗ ଦେଇଥିଲେ।
ବର୍ଷିୟାନ ଆଦିବାସୀ ନେତା କାଲିୟାନ ବିରୁଆ ସଭାରେ ଅଧ୍ୟକ୍ଷତା କରିଥିଲେ। ଏସୟୁସିଆଇ (କମ୍ୟୁନିଷ୍ଟ) ରାଜ୍ୟ କମିଟି ସଦସ୍ୟ ତଥା ପୂର୍ବତନ ବିଧାୟକ ଶମ୍ଭୁନାଥ ନାଏକ ମୁଖ୍ୟବକ୍ତା ଭାବେ ଯୋଗ ଦେଇଥିଲେ। ଅନ୍ୟତମ ବକ୍ତାଭାବେ ସାଦ ଚରଣ ବଦ୍ରା, ମାଥୁରାମ ହେମ୍ବ୍ରମ, ଇସାଦ ବଦ୍ରା, ଚରଣ ତିରିଆ, ଲୋଧା ପିଙ୍ଗୁଆ ପ୍ରମୁଖ ଯୋଗ ଦେଇ ବକ୍ତବ୍ୟ ରଖିଥିଲେ। ଶିମିଳିପାଳ ଅଭୟାରଣ୍ୟରେ ଥିବା ଅସ୍ତକୁମାର, ବରେଇପାଣି ପଞ୍ଚାୟତ ସମେତ ବଳରାମପୁର, ଗଡ଼ଶିମିଳିପାଳ, କୁକୁର ଭୁକା, ମକାବାଳି,ସାରୁଦା, ବୁଢ଼ାବଳଙ୍ଗ ଆଦି ଗ୍ରାମର ଶତାଧିକ ମହିଳାପୁରୁଷ ଏଥିରେ ଯୋଗଦେଇ ଆଲୋଚନାରେ ଭାଗ ନେଇଥିଲେ। ପୂର୍ବତନ ବିଧାୟକ ନାଏକ କହିଥିଲେ, ଜଙ୍ଗଲ ଅଞ୍ଚଳରୁ ଆଦିବାସୀଙ୍କୁ ବିସ୍ଥାପିତ କରାଗଲେ ସାରାଦେଶରେ ୧୧ ଲକ୍ଷ ଆଦିବାସୀ ପରିବାର କ୍ଷତିଗ୍ରସ୍ତ ହେବେ। କେନ୍ଦ୍ର ସରକାର ନୂତନ ଜଙ୍ଗଲ ଆଇନ ପ୍ରତ୍ୟାହାର କରି ବନବାସୀଙ୍କୁ ସୁରକ୍ଷା ଦେବା ଦରକାର। ତା’ ନ ହେଲେ ଆନ୍ଦୋଳନକୁ ଜୋରଦାର କରାଯିବ ବୋଲି ବକ୍ତାମାନେ ଚେତାବନୀ ଦେଇଥିଲେ।