ନୂଆଗାଁ,୧୮ା୯ (ଡି.ଏନ.ଏ.): ନୟାଗଡ଼ ଜିଲା ମହିପୁର ବନାଞ୍ଚଳ ଅଧୀନରେ ଥିବା ବିଭିନ୍ନ ଜଙ୍ଗଲରୁ ମୂଲ୍ୟବାନ ଗଛ କାଟି ମାଫିଆମାନେ ତାହାକୁ ବାହାରକୁ ଚାଲାଣ କରୁଛନ୍ତି। ଏହା ଜାଣି ସୁଦ୍ଧା ବନ ବିଭାଗ ଅଧିକାରୀ ଓ କର୍ମଚାରୀ ନୀରବଦ୍ରଷ୍ଟା ସାଜୁଛନ୍ତି। ଏ ସଂକ୍ରାନ୍ତରେ ଫଟୋ ସମ୍ବଳିତ ଖବର ଧରିତ୍ରୀରେ ପ୍ରକାଶ ପାଇବା ପରେ ବିଭାଗ ପକ୍ଷରୁ ତତ୍ପରତା ପ୍ରକାଶ ପାଇଛି । ମଙ୍ଗଳବାର ନୟାଗଡ଼ ଡିଏଫ୍ଓ ଧନରାଜ ଏଚ୍ଡି, ମହିପୁର ରେଞ୍ଜର ସୁଧାଂଶୁ ଶେଖର ପଣ୍ଡା ଓ ସ୍ଥାନୀୟ ବନପାଳ କାଠ କଟାଯାଉଥିବା ସ୍ଥାନ ଗୁମୀ ସେକ୍ସନର ଲତାଦେଈ ଜଙ୍ଗଲକୁ ଯାଇ ତଦନ୍ତ କରିଛନ୍ତି। ସାଇଜ କାଟିବା ଉଦ୍ଦେଶ୍ୟରେ ରଖାଯାଇଥିବା ୪ ଗୋଟି ବିଶାଳ ଶାଳ ଗଣ୍ଡିକୁ ଦେଖି ଡିଏଫ୍ଓ କ୍ଷୋଭ ପ୍ରକାଶ କରିବା ସହ ଏଥ୍ରପ୍ରତି ଦୃଷ୍ଟି ଦେବାକୁ ବନପାଳଙ୍କୁ ନିର୍ଦ୍ଦେଶ ଦେଇଛନ୍ତି। ଏହାସହ ଗଛକାଟି ପଦା କରାଯାଇଥିବା ଜଙ୍ଗଲ ଜାଗା କାହାର ତାହା ଚିହ୍ନଟ କରିବା ପାଇଁ ନୂଆଗାଁ ତହସିଲଦାର ଓ ରେଞ୍ଜରଙ୍କୁ ନିର୍ଦ୍ଦେଶ ଦେଇଛନ୍ତି। ସେହି ଜାଗା ଯଦି ବନ ବିଭାଗର ହୋଇଥିବ ତେବେ ସମ୍ପୃକ୍ତ ଲୋକଙ୍କ ପ୍ରତି ଦୃଢ କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ କହିଛନ୍ତି। ବିଶାଳ ଶାଳ ଗଛର ୫ଟି ଗଣ୍ଡି ମଧ୍ୟରୁ କାଠ ମାଫିଆ ମୂଳଗଣ୍ଡିକୁ କାଟି ସାଇଜ କରି ନେଇଯାଇଥିବା ବେଳେ ଗଚ୍ଛିତ ଥିବା ଅନ୍ୟ ୪ଟିକୁ ବନ ବିଭାଗ ଜବତ କରିଛି।