ଅନୁଗୋଳ ଅଫିସ/କଣିହାଁ, ୮।୫ – ଅନୁଗୋଳ ଜିଲା ରେଙ୍ଗାଲି ଥାନା ଲୋଧାଝରି ଶାଳ ଜଙ୍ଗଲରେ ଭାଟି କରାଯାଇ ଦେଶୀ ମଦ ରନ୍ଧା ଯାଉଥିବା ବେଳେ ଅବକାରୀ କର୍ମଚାରୀମାନେ ଚଢ଼ାଉ କରି ବିପୁଳ ପରିମାଣର ମଦ ଜବତ କରିଛନ୍ତି। ଏଥିସହ ସେଠାରୁ ୮ ଜଣଙ୍କୁ ଗିରଫ ପରେ କୋର୍ଟ ଚାଲାଣ କରାଯାଇଥିବା ସୂଚନା ମିଳିଛି।
ମଦ ରନ୍ଧାଯାଉଥିବା ସମ୍ପର୍କରେ ଏସ୍ପି କ୍ରୀଷ୍ଣା ନାୟକ ବିଶ୍ୱସ୍ତ ସୂତ୍ରରୁ ଖବର ପାଇବା ପରେ ଜିଲା ଅବକାରୀ ମୋବାଇଲ ସ୍କ୍ବାଡ୍ ସହ ତାଳଚେର ରେଞ୍ଜ ଅବକାରୀ ଅଧିକାରୀମାନେ ସେଠାରେ ଚଢ଼ାଉ କରିଥିଲେ। ଘଟଣାସ୍ଥଳରୁ ୮ ଜଣ ହାଡିବନ୍ଧୁ ବେହେରା, ସନାତନ ପ୍ରଧାନ, ଦୀପକ ଗୋଛାୟତ, ବିଷ୍ଣୁ ଭୋଇ, ବିଶ୍ୱନାଥ ମୂର୍ତ୍ତି, ପ୍ରବୀଣ ଗୋଛାୟତ, ରାଜୁ ଗୋଛାୟତ ଓ ମୁନା ନାୟକଙ୍କୁ କାବୁ କରାଯାଇଥିବାବେଳେ ୬ ଜଣ ଫେରାର ହୋଇଯାଇଥିବା ଅବକାରୀ ଏସ୍ପି ନାୟକ ସୂଚନା ଦେଇଛନ୍ତି। ଉକ୍ତ ଭାଟିରୁ ୩୨୫ ଲିଟର ଦେଶୀ ମଦ ଓ ୫ ହଜାର କେଜି ପୋଚ, ୫ଟି ମୋଟର ସାଇକେଲ ଜବତ କରାଯାଇଥିବା ଅବକାରୀ ଏସ୍ପି ସୂଚନା ଦେଇଛନ୍ତି। ସେହିପରି ଆଠମଲ୍ଲିକ ଅଞ୍ଚଳରୁ ହିମାଂଶୁ ମେହେର ନାମକ ଜଣେ ବ୍ୟକ୍ତିଙ୍କଠାରୁ ମଦ ଜବତ ପରେ ତାଙ୍କୁ ଗିରଫ କରାଯାଇଛି। କଣିହଁା ବ୍ଲକ ସମଲ ଥାନା ଅଞ୍ଚଳରେ ଥିବା ଡେରାଗୋଳାର ଏକ ଢାବାରେ ପୋଲିସ ଚଢ଼ାଉ କରି ବିଦେଶୀ ମଦ ସହ ଚୋରାରେ ବିକ୍ରି କରାଯାଉଥିବା ଡିଜେଲ ଜବତ କରିଛି ବୋଲି ଥାନା ଅଧିକାରିଣୀ ଚାରୁଲତା ବେହେରା ସୂଚନା ଦେଇଛନ୍ତି। ଅନୁଗୋଳ ଏସ୍ପିଙ୍କ ନିର୍ଦ୍ଦେଶକ୍ରମେ ସମଲ ପୋଲିସର ଏକ ଟିମ୍ ଏହି ଚଢ଼ାଇ କରିଥିଲା। ଏହି ଘଟଣାରେ ୩ ଜଣଙ୍କୁ ଅଟକ ରଖାଯାଇ ଅଧିକ ଖୋଳତାଢ଼ କରାଯାଉଛି।