ଜଙ୍ଗଲ ଜମିରେ ଲଜିଷ୍ଟିକ ପାର୍କ: ତଦନ୍ତ ରିପୋର୍ଟ ମାଗିଲା ଏନ୍ଜିଟି
41 ଯାଜପୁର ଅଫିସ,୧୨ା୧୦: କଳିଙ୍ଗନଗର ଶିଳ୍ପାଞ୍ଚଳ ଅନ୍ତର୍ଗତ ଦାନଗଦୀ ତହସିଲ ଯଖପୁରା ମୌଜାର ଏକ ଶାଳ କିସମ ଜମିରେ ସାଇଜର ଲିମିଟେଡ ନାମକ ସଂସ୍ଥା ଗତ ଏକ ବର୍ଷ ହେବ ବେଆଇନ ଭାବେ ମଲ୍ଟି ମୋଡାଲ ଲଜିଷ୍ଟିକ ପାର୍କ ନିର୍ମାଣ କରୁଛି। ଏହାର ପ୍ରତିବାଦ କରି କଳିଙ୍ଗନଗର ପରିବେଶ ସୁରକ୍ଷା ସମିତି ଜାତୀୟ ଗ୍ରୀନ ଟ୍ରିବ୍ୟୁନାଲ(ଏନ୍ଜିଟି)ରେ ୪୨/୨୦୧୯ରେ ଏକ ମାମଲା ରୁଜୁ କରିଥିଲା। ଏହି ମାମଲା ଉପରେ ଏନ୍ଜିଟି ୯।୧୦।୨୦୧୯ରେ ଶୁଣାଣି କରି ଯାଜପୁର ଜିଲାପାଳ, ଡିଭିଜନାଲ ଫରେଷ୍ଟ ଅଫିସର(ଡିଏଫ୍ଓ) ଏବଂ ଓଡ଼ିଶା ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ (ଏସ୍ପିସିବି)ଙ୍କୁ ଯୁଗ୍ମ ଭାବେ ତଦନ୍ତ କରି ୩ ସପ୍ତାହ ମଧ୍ୟରେ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ହୋଇଛି। ଏହାସହ ଏସ୍ପିସିବିକୁ ଯୁଗ୍ମ ତଦନ୍ତର ପରିଚାଳନା ପାଇଁ ନୋଡାଲ ସଂସ୍ଥା ଭାବେ ନିଆଯାଇଛି। ଯଦି ଅଭିଯୋଗର ତଦନ୍ତରେ ସତ୍ୟତା ରହିଥାଏ ତେବେ ଆଇନ ଅନୁସାରେ ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଏନ୍ଜିଟି ପକ୍ଷରୁ ଜଷ୍ଟିସ ଏସ.ପି. ୱାଙ୍ଗଡି ଓ ଜୁଡିସିଆଲ ମେମ୍ବର ଡ. ସତ୍ୟୱନ ସିଂ ଗାରବ୍ୟାଲଙ୍କୁ ନେଇ ଗଠିତ ଖଣ୍ଡପୀଠ ନିର୍ଦ୍ଦେଶ ଜାରି କରିଛନ୍ତି। ଅଭିଯୋଗକାରୀଙ୍କ ପକ୍ଷରୁ ରାହୁଲ ଚୌଧୁରୀ ଓ ଶଙ୍କର ପାଣି ମାମଲାକୁ ପରିଚାଳନା କରିଛନ୍ତି।
ଏନ୍ଜିଟିରେ ହୋଇଥିବା ମାମଲାରେ ଦର୍ଶାଯାଇଛି ଯେ, ଯଖପୁରା ମୌଜାର ଖାତା ନମ୍ବର ୪୧୯, ଅନାବାଦୀ ପ୍ଲଟ ନମ୍ବର ୮୬୫ ଓ ୮୬୭, କିସମ ଶାଳ ଜଙ୍ଗଲର ୧୧.୯୭ ଏକର ଜମିରେ ଏକ ଲଜିଷ୍ଟିକ ହବ୍ ନିର୍ମାଣାଧୀନ ରହିଛି। ଜଙ୍ଗଲ ସଂରକ୍ଷଣ ଆଇନ -୧୯୮୦ର ମଞ୍ଜୁରୀ ଏବଂ ବାୟୁ ଓ ଜଳ ପ୍ରଦୂଷଣ ନିୟନ୍ତ୍ରଣ ଆଇନ ପାଳନ ବିନା ଏହି ନିର୍ମାଣ ଚାଲିଛି। ଏପରି କି ପରିବେଶ ଅନୁମତି ମଧ୍ୟ ନିଆଯାଇନାହିଁ। ସେଣ୍ଟ୍ରାଲ ଗ୍ରାଉଣ୍ଡ ୱାଟର ଅଥରିଟି (ସିଜିଡବ୍ଲୁଏ)ର ମଞ୍ଜୁରୀ ବିନା ଭୂତଳ ଜଳ ବ୍ୟବହାର କରାଯାଉଛି। ବିଡମ୍ବନା ଯେ, ନିର୍ମାଣ ସଂସ୍ଥା ସାଇଜର ବିଜୁ ପଟ୍ଟନାୟକ ମାର୍ଗସ୍ଥିତ ଐତିହାସିକ ବିଜୁ ପଟ୍ଟନାୟକ ପାର୍କ ନିକଟରେ ଥିବା ଏହି ଜମିର ଜଳାଶୟକୁ ମଧ୍ୟ ପୋତିଦେଇଛି। ଏହି ଜଳାଶୟ ଉପରେ ଆଖପାଖ ଅଞ୍ଚଳର ବହୁ ଚାଷୀ ନିର୍ଭର କରୁଥିଲେ। ମରୁଡ଼ି ସମୟରେ ଚାଷୀଙ୍କ ପାଣି ଅଭାବକୁ ଏହି ଜଳାଶୟ ପୂରଣ କରୁଥିଲା। ହେଲେ ସାଇଜର ସଂସ୍ଥା ପ୍ରାୟ ୨୦ହଜାର ଟ୍ରିପ୍ ପାଉଁଶ ଆଣି ଉକ୍ତ ଜଳାଶୟକୁ ପୋତିଦେଇଛି। ବିଜୁ ପଟ୍ଟନାୟକ ମାର୍ଗକୁ ଲାଗି ଏଭଳି ବେଆଇନ କାର୍ଯ୍ୟ ଚାଲିଥିଲେ ସୁଦ୍ଧା ପ୍ରଶାସନ ଏଥିପ୍ରତି ଦୃଷ୍ଟି ଦେଉ ନାହିଁ। ମାଟି ଉଠାଣ ପାଇଁ ପ୍ରଶାସନ ପକ୍ଷରୁ କୌଣସି ନିର୍ଦ୍ଦେଶନାମା ମଧ୍ୟ ନାହିଁ। ଜଙ୍ଗଲ ଜମି ହୋଇଥିବାରୁ ସ୍ଥାନୀୟ ତହସିଲଦାର ଅନୁମତି ଦେବାକୁ ମନା କରିଦେଇଥିବା ସୂଚନା ମିଳିଛି। ସ୍ଥାନୀୟ ପ୍ରଶାସନକୁ ହାତକରି ଜଙ୍ଗଲ ଜମିରେ ଏହି ନିର୍ମାଣ ଚାଲିଥିବା ଏନ୍ଜିଟିରେ ଅଭିଯୋଗ ହୋଇଥିଲା। ଏ ସଂକ୍ରାନ୍ତରେ ଏସ୍ପିସିବିର କଳିଙ୍ଗନଗର ଆଞ୍ଚଳିକ ଅଧିକାରୀ ପ୍ରମୋଦ କୁମାର ବେହେରାଙ୍କୁ ପଚାରିବାରେ, ଏନ୍ଜିଟି ନିର୍ଦ୍ଦେଶ ଏଯାଏ ତାଙ୍କର ହସ୍ତଗତ ହୋଇ ନାହିଁ। ଅଭିଯୋଗ ଉପରେ ଯୁଗ୍ମ ତଦନ୍ତ କରିବାକୁ ଏନ୍ଜିଟି ନିର୍ଦ୍ଦେଶ ଦେଇଥିବା ସେ ଶୁଣିଛନ୍ତି। ଯୁଗ୍ମ ତଦନ୍ତ ରିପୋର୍ଟ ଦାଖଲ କରିବା ପରେ ଏନ୍ଜିଟିର ନିର୍ଦ୍ଦେଶ ଅନୁଯାୟୀ ଆବଶ୍ୟକ ପଦକ୍ଷେପ ଗ୍ରହଣ କରାଯିବ ବୋଲି ବେହେରା କହିଛନ୍ତି।