ବଇଣ୍ଡା, ୬। ୪(ଡି.ଏନ.ଏ.)- ଆଠମଲ୍ଲିକ ବ୍ଲକ ସାପଘରା ପଞ୍ଚାୟତ ଲକ୍ଷ୍ମୀପୁର ଜଙ୍ଗଲରେ କିଛି ଦିନ ହେଲା ନିଆଁ ଲାଗିଛି। ଜଙ୍ଗଲ ଜଳୁଥିବାରୁ ନିକଟରେ ଥିବା ସାପଘରା, ଟେଣ୍ଟୁଲି, ରାଇନାଳୀ, ଖମାର, ବାତ୍ରାଖୋଳ, ଗ୍ରାମବାସୀ ଭୟଭୀତ ହୋଇପଡିଛନ୍ତି। ଗ୍ରାମବାସୀଙ୍କ କହିବା ମୁତାବକ, ଜଙ୍ଗଲରେ ଅନେକ ମହୁଲ ଗଛ ରହିଛି। ଗ୍ରାମର କେତେଜଣ ଗାଈ ଚରାଳୀ ଜଙ୍ଗଲକୁ ଯାଇ ମହୁଲ ଫୁଲ ସଂଗ୍ରହ କରୁଛନ୍ତି। ହେଲେ ଜଙ୍ଗଲରେ ପତ୍ରଗୁଡିକ ଝଡି ପଡିଥିବାରୁ ସେମାନଙ୍କୁ ମହୁଲ ଫୁଲ ସଂଗ୍ରହରେ ବାଧା ଉପୁଜୁଛି। ଫଳରେ ସେମାନେ ସେଥିରେ ନିଆଁ ଲଗାଇଦେଉଛନ୍ତି। ଏବେ ପ୍ରବଳ ଖରା ହେଉଥିବାରୁ ନିଆଁ ଦ୍ରୁତଗତିରେ ଜଙ୍ଗଲ ସାରା ଖେଳିଯାଉଛି। ଏଥିଯୋଗୁ ବହୁ ମୂଲ୍ୟବାନ ଗଛ ପୋଡିଯିବା ସହ କୀଟ ପତଙ୍ଗ ଜଳିଯାଉଛନ୍ତି। ପବନରେ ନିଆଁ ଉଡି ଆସିବା ଭୟରେ ଲୋକେ ଗରା, ବାଲଟିରେ ପାଣି ରଖି ରାତିରେ ଜଗିରହୁଛନ୍ତି। ତୁରନ୍ତ ଏଥିପ୍ରତି ଜଙ୍ଗଲ ବିଭାଗ ଦୃଷ୍ଟି ଦେବାକୁ ଗ୍ରାମବାସୀ ଦାବି କରିଛନ୍ତି।