ଖାର୍ତୁମ,୨୧।୧: ନର୍ଥ ଆଫିକ୍ରାର ସୁଦାନରେ ଥିବା ଏକ ଚିଡିଆଘରର ଦୃଶ୍ୟ ଏବେ ସମସ୍ତଙ୍କୁ ବ୍ୟଥିତ କରିଛି। ସିଂହ ଜଙ୍ଗଲର ରାଜା ହୋଇଥିବା ବେଳେ ସୁଦାନର ଖାର୍ତୁମରେ ଥିବା ଏକ ଚିଡିଆଖାନାରେ ଏମାନେ ଯେମିତି ଅସହାୟ ହୋଇପଡିଛନ୍ତି। ଏମିତି କିଛି ଫଟୋ ଏବେ ଭାଇରାଲ ହେବାରେ ଲାଗିଛି। କୁହାଯାଉଛି ଏହି ଚିଡିଆଖାନାରେ ୫ ସିଂହ କୁପୋଷଣର ଶିକାର ହୋଇଛନ୍ତି। ଅବଶ୍ୟ ଫଟୋରେ ଏହା ସ୍ପଷ୍ଟ ବାରିହୋଇ ପଡୁଛି। ଫଟୋରେ ଦେଖାଯାଇଛି ଏମାନଙ୍କ ହାଡ ଯେମିତି ବାହାରକୁ ବାହାରି ଆସିଛି। ଏହି ସିଂହଙ୍କର କିଛି ଫଟୋ ଭାଇରାଲ ହେବା ପରେ ଏବେ ଏମାନଙ୍କୁ ସ୍ଥାନାନ୍ତର କରିବାକୁ ଦାବି କରାଯାଇଥିବା ଜଣାପଡିଛି। ଜଣେ ସୋସିଆଲ ମିଡିଆ ୟୁଜର ଲେଖିଛନ୍ତି ଏମାନଙ୍କୁ ଏମିତି ଜାଗାକୁ ସ୍ଥାନାନ୍ତର କରାଯାଉ ଯେଉଁଠି ଏମାନଙ୍କର ଭଲଭାବେ ଦେଖାଶୁଣା ହୋଇପାରିବ। ଏହି ଚିଡିଆଘର ପ୍ରାଇଭେଟ ଫଣ୍ଡିଂରେ ଚାଲୁଥିବା ବେଳେ ଅଧିକାଂଶ ସମୟରେ ଏମାନଙ୍କୁ ଖାଦ୍ୟ ଯୋଗାଇବା ସମ୍ଭବ ହୋଇ ନ ଥାଏ ବୋଲି ସେଠାକାର ମ୍ୟାନେଜର କହିଛନ୍ତି। ଏହା ବ୍ୟତୀତ ଏବେ ସୁଦାନର ଅର୍ଥବ୍ୟବସ୍ଥା ଖରାପ ଥିବାରୁ ଏଠାକାର ଖାଦ୍ୟ ସାମଗ୍ରୀର ଦାମ୍ ଆକାଶ ଛୁଆଁ ରହିଛି। ତେଣୁ ବନ୍ୟଜୀବଙ୍କୁ ଖାଦ୍ୟ ଯୋଗାଇବା ମଧ୍ୟ କାଠିକର ପାଠ ହେଉଛି। ଏକ ରିପୋର୍ଟ ଅନୁଯାୟୀ, ୧୯୯୩ରୁ ୨୦୧୪ ମଧ୍ୟରେ ଏଠାରେ ସିଂହଙ୍କ ସଂଖ୍ୟା ୪୩ ପ୍ରତିଶତ କମ୍ ହୋଇଯାଇଛି। ସୋସିଆଲ ମିଡିଆରେ ଏହି ସିଂହଙ୍କ ଫଟୋ ଭାଇରାଲ ହେବା ପରେ ରବିବାର ଏମାନଙ୍କୁ ଦେଖିବାକୁ ବହୁଲୋକ ଆସିଥିବା କୁହାଯାଏ।