ଲକ୍ଷ୍ନୌ,୧୭।୧୧(ପି.ଟି.)- ୨୧ ବର୍ଷୀୟ ମିଡିୟମ ପେସର କରିମ ଜନତଙ୍କ ଦମ୍ଦାର ପ୍ରଦର୍ଶନ (୫/୧୧) ସହାୟତାରେ ଆଫଗାନିସ୍ତାନ ଦ୍ୱିତୀୟ ଟି୨୦ ମ୍ୟାଚ୍ରେ ଓ୍ବେଷ୍ଟଇଣ୍ଡିଜକୁ ୪୧ ରନରେ ପରାସ୍ତ କରିଛି। ଶନିବାର ଏଠାରେ ଖେଳାଯାଇଥିବା ମ୍ୟାଚ୍ରେ ଟସ୍ ଜିତି ଆଫଗାନିସ୍ତାନ ପ୍ରଥମେ ବ୍ୟାଟିଂ କରି ୭ ଉଇକେଟ ହରାଇ ୧୪୭ ରନ ସଂଗ୍ରହ କରିଥିଲା। ଦଳ ତରଫରୁ ହଜରାତୁଲ୍ଲା ଜଜାଇ ୨୬, କରିମ ଜନତ ୨୬, ଗୁଲବଦିନ ନାଇବ ୨୪, ନାଜିବୁଲ୍ଲା ଜଡ୍ରାନ ଅପରାଜିତ ୨୦ ରନ ସଂଗ୍ରହ କରିଥିଲେ। ବୋଲିଂରେ ଓ୍ବେଷ୍ଟଇଣ୍ଡିଜ ତରଫରୁ କେସରିକ ଓ୍ବିଲିୟମ୍ସ ୩, ଜାସନ ହୋଲ୍ଡର ଓ କିମୋ ପଲ୍ ୨ଟି ଲେଖାଏ ଉଇକେଟ ହାସଲ କରିଥିଲେ। ଜବାବରେ ଓ୍ବେଷ୍ଟଇଣ୍ଡିଜ୍ ୮ ଉଇକେଟ ହରାଇ ୧୦୬ ରନରେ ସୀମିତ ରହି ମ୍ୟାଚ୍ ହାତଛଡ଼ା କରିଥିଲା। ଏଥି ସହିତ ୨ ମ୍ୟାଚ୍ ବିଶିଷ୍ଟ ଏହି ସିରିଜ ଏବେ ୧-୧ ସମାନସ୍ତରରେ ପହଞ୍ଚିଛି। ମାତ୍ର ୧୧ ରନ ଦେଇ ମୂଲ୍ୟବାନ ୫ ଉଇକେଟ ଅକ୍ତିଆର କରିଥିବା ଜନତ ପ୍ଲେୟାର ଅଫ୍ ଦି ମ୍ୟାଚ୍ ବିବେଚିତ ହୋଇଥିଲେ।
ପଛରେ ବ୍ୟାଟିଂ କରିଥିବା ଓ୍ବେଷ୍ଟଇଣ୍ଡିଜ ତରଫରୁ ଉଇକେଟକିପର ଦୀନେଶ ରାମଦିନ ଅପରାଜିତ ୨୪ ରନ କରିଥିବା ବେଳେ ବାକି ସବୁ ବ୍ୟାଟ୍ସମ୍ୟାନ ବିଫଳ ହୋଇଥିଲେ। ବୋଲିଂରେ ଆଫଗାନିସ୍ତାନ ତରଫରୁ ଜନତ ସର୍ବାଧିକ ୫, ନବୀନ-ଉଲ- ହକ, ରସିଦ ଖାଁ ଓ ଗୁଲବଦିନ ନାଇବ ଗୋଟିଏ ଲେଖାଏ ଉଇକେଟ ପାଇଥିଲେ। ପୂର୍ବରୁ ଅନୁଷ୍ଠିତ ପ୍ରଥମ ଟି୨୦ରେ ଓ୍ବେଷ୍ଟଇଣ୍ଡିଜ ୩୦ ରନରେ ବିଜୟୀ ହୋଇଥିଲା।
ସଂକ୍ଷିପ୍ତ ସ୍କୋର:
ଆଫଗାନିସ୍ତାନ ୨୦ ଓଭରରେ ୧୪୭/୭
(ଜଜାଇ- ୨୬, ଜନତ- ୨୬, ନାଇବ- ୨୪, ଜଡ୍ରାନ- ୨୦, ଓ୍ବିଲିୟମ୍ସ- ୩/ ୨୩, ହୋଲ୍ଡର- ୨/୨୩, ପଲ- ୨/୨୮)।
ଓ୍ବେଷ୍ଟଇଣ୍ଡିଜ୍ ୨୦ ଓଭରରେ ୧୦୬/୮
(ରାମଦୀନ- ୨୪*, ଜନତ- ୫/୧୧)।