ନୂଆଦିଲ୍ଲୀ,୧୮-୮: ସମାଜର ଗରିବ ଶ୍ରେଣୀ ନିକଟରେ ବ୍ୟାଙ୍କକୁ ପହଞ୍ଚାଇବା ଲାଗି ୫ ବର୍ଷ ପୂର୍ବେ ଏନ୍ଡିଏ ସରକାର ଆରମ୍ଭ କରିଥିଲେ ପ୍ରଧାନମନ୍ତ୍ରୀ ଜନଧନ ଯୋଜନା। ଏବେ ଏହି ଯୋଜନା ଅଧୀନରେ ଖୋଲା ଯାଇଥିବା ଆକାଉଣ୍ଟରେ ୧ ଲକ୍ଷ କୋଟି ଟଙ୍କାରୁ ଅଧିକ ଜମା ହୋଇସାରିଲାଣି। ଆର୍ଟିଆଇ ତଥ୍ୟରୁ ଏହା ଜଣାପଡିଛି। ମଧ୍ୟପ୍ରଦେଶର ନିମଚ ଜିଲାର ସାମାଜିକ କର୍ମୀ ଚନ୍ଦ୍ରଶେଖର ଗୌଡ ଆର୍ଟିଆଇ ଅଧୀନରେ ଅର୍ଥ ମନ୍ତ୍ରଣାଳୟ ନିକଟରୁ ଜନଧନ ଯୋଜନା ସମ୍ପର୍କରେ ତଥ୍ୟ ମାଗିଥିଲେ। ପ୍ରାପ୍ତ ତଥ୍ୟ ଅନୁଯାୟୀ ଚଳିତ ବର୍ଷ ଜୁଲାଇ ୧୭ ସୁଦ୍ଧା ଏହି ଯୋଜନା ଅଧୀନରେ ୩୬.୨୫ କୋଟି ବ୍ୟାଙ୍କ ଆକାଉଣ୍ଟ ଖୋଲାଯାଇଛି ଓ ଏଥିରେ ୧,୦୦,୮୩୧ କୋଟି ଟଙ୍କା ଜମା ରହିଛି। ସେହିପରି ୫ ବର୍ଷ ସମ୍ପୂର୍ଣ୍ଣ ହେବା ପରେ ମଧ୍ୟ ୪.୯୯ କୋଟି ଆକାଉଣ୍ଟରେ ଅଦ୍ୟାବଧି କୌଣସି ଅର୍ଥ ଜମା ହୋଇନାହିଁ। ଅର୍ଥାତ୍ ଏହି ଆକାଉଣ୍ଟକୁ ଜିରୋ ବାଲାନ୍ସ ଆକାଉଣ୍ଟ କୁହାଯାଇପାରିବ। ସମ୍ପୂର୍ଣ୍ଣ ଜନଧନ ଆକାଉଣ୍ଟଧାରୀଙ୍କ ମଧ୍ୟରେ ଏଭଳି ଆକାଉଣ୍ଟ ସଂଖ୍ୟା ପ୍ରାୟ ୧୪% ରହିଛି, ଯେଉଁଥିରେ ଟଙ୍କାଟିଏ ମଧ୍ୟ ନାହିଁ। ସୂଚନାଥାଉ କି, ଉକ୍ତ ଯୋଜନାରେ ଖୋଲାଯାଇଥିବା ଆକାଉଣ୍ଟ ପାଇଁ କୌଣସି ବାଲାନ୍ସ ସୀମା ଧାର୍ଯ୍ୟ ହୋଇନାହିଁ। ଅର୍ଥାତ୍ ଯେକୌଣସି ଗରିବ ବ୍ୟକ୍ତି ‘ଜିରୋ ବାଲାନ୍ସ’ରେ ଜନଧନ ଆକାଉଣ୍ଟ ଖୋଲିପାରିବ। ଆକାଉଣ୍ଟରେ ଟଙ୍କାଟିଏ ନ ଥିଲେ ମଧ୍ୟ ଏହା ଚାଲୁ ରହିଥାଏ। ବ୍ୟାଙ୍କ ଏଥିପାଇଁ କୌଣସି ଚାର୍ଜ ଆଦାୟ କରେ ନାହିଁ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏନ୍ଡିଏ ସରକାରଙ୍କ ପ୍ରଥମ ପାଳିରେ କ୍ଷମତାକୁ ଆସିବା ମାତ୍ରେ ୨୦୧୪ରେ ଜନଧନ ଯୋଜନା ସମ୍ପର୍କରେ ସ୍ବାଧୀନତା ଦିବସରେ ଲାଲକିଲାରୁ ଘୋଷଣା କରିଥିଲେ। ଏହି ଯୋଜନାକୁ ଔପଚାରିକ ଭାବେ ସେହିବର୍ଷ ଅଗଷ୍ଟ ୨୮ରୁ ଶୁଭାରମ୍ଭ କରାଯାଇଥିଲା।