ରଘୁନାଥପୁର, ୧୧। ୭ (ଡି.ଏନ.ଏ.)- ଜାତୀୟ ସ୍ବାସ୍ଥ୍ୟମିଶନ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଆନୁକୂଲ୍ୟରେ ରଘୁନାଥପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପକ୍ଷରୁ ଜୁଲାଇ ୧୧ରୁ ୨୪ ତାରିଖ ପର୍ଯ୍ୟନ୍ତ ଜନସଂଖ୍ୟା ସ୍ଥିରିକରଣ ପକ୍ଷ ପାଳନ ଅବସରରେ ଏକ ସଚେତନତା ରଥର ଶୁଭାରମ୍ଭ ଗୁରୁବାର ହୋଇଯାଇଛି। ଏହାଛଡା ବିଶ୍ୱ ଜନସଂଖ୍ୟା ଦିବସ ଉପଲକ୍ଷେ ପିଏଚଇଓ ରାନୁ ମହାପାତ୍ରଙ୍କ ପୌରୋହିତ୍ୟରେ ଏକ ସଚେତନତା ଧର୍ମୀ ବୈଠକ ଅନୁଷ୍ଠିତ ହୋଇଥିଲା। ଏଥିରେ ମୁଖ୍ୟ ଚିକିତ୍ସାଧିକାରୀ ଡା. ସୁକାନ୍ତ କୁମାର ଦଳାଇ ଅତିଥି ଭାବେ ଉପସ୍ଥିତ ହୋଇ ଜନସଂଖ୍ୟା ସ୍ଥିରିକରଣ ପକ୍ଷ ପାଳନର ଉଦ୍ଦେଶ୍ୟ ଓ ଗୁରୁତ୍ୱକୁ ଉପଲବ୍ଧ କରି ସମସ୍ତ ମେଡିକାଲ ଷ୍ଟାଫ, ଜନସାଧାରଣଙ୍କ ମନରେ ସଚେତନତାର ମଞ୍ଜି ବୁଣି ପାରିଲେ ଏହା ସଫଳ ହୋଇପାରିବ ବୋଲି ମତପ୍ରକାଶ କରିଥିଲେ। ପରିବାର ନିୟୋଜନ ଏକ ମାନସିକ ଅଧିକାର। ପ୍ରତ୍ୟେକ ଦମ୍ପତି ର୍ଗ ନିରୋଧକ ପଦ୍ଧତି ଅପଣାଇ ସ୍ବାସ୍ଥ୍ୟକେନ୍ଦ୍ରରେ ମିଳୁଥିବା ବିଭିନ୍ନ ପ୍ରକାର ପରିବାର ନିୟୋଜନ ସେବା ସମ୍ପର୍କରେ ପ୍ରଥମେ ଅବଗତ ହେବା ଜରୁରୀ ଅଟେ। ଅନ୍ତରା, ଛାୟା ଭଳି ଇଞ୍ଜକସନଓ ଔଷଧ ବ୍ୟବହାର କରିବା ସହ ପ୍ରସବ ପରବର୍ତ୍ତୀ ଆଇୟୁସିଡି, ମହିଳା ଓ ପୁରୁଷ ବନ୍ଧ୍ୟାକରଣ ଭଳି ସ୍ଥାୟୀ ପଦ୍ଧତି କରାଇବା ସମ୍ପର୍କରେ ପିଏଚଇଓ ମହାପାତ୍ର ପରାମର୍ଶ ରଖିଥିଲେ। ଆଶା ଓ ମହିଳା ସ୍ବାସ୍ଥ୍ୟକର୍ମୀଙ୍କଠାରୁ ସୂଚନା ସଂଗ୍ରହ, ପ୍ରଥମ ସନ୍ତାନର ୩ ବର୍ଷ ପରେ ଦ୍ୱିତୀୟ ନିଷ୍ପତ୍ତି ଓ ସର୍ବପରେ ପ୍ରତ୍ୟେକ ଦମ୍ପତି ଦାୟିତ୍ୱର ସହ ନିଜ ସନ୍ତାନଙ୍କୁ ଗଢି ତୋଳିବା ପାଇଁ ବୈଠକରେ ଆହ୍ବାନ ଦିଆଯାଇଥିଲା। ଡା. ପ୍ରଭାସ କୁମା ତ୍ରିପାଠୀଙ୍କ ସମେତ ମହିଳା ସ୍ବାସ୍ଥ୍ୟକର୍ମୀ, ପୁରୁଷ ସ୍ବାସ୍ଥ୍ୟକର୍ମୀ ଆଶା ଓ ସମସ୍ତ କର୍ମଚାରୀ ଉପସ୍ଥିତ ଥିଲେ। ମୁଖ୍ୟ ଚିକିତ୍ସାଧିକାରୀ ଦଳାଇ ପତାକା ଦେଖାଇ ସଚେତନତା ରଥ ପରିଭମଣର ଶୁଭାରମ୍ଭ କରିଥିଲେ।
