ଫୁଲବାଣୀ ଅଫିସ, ୮ା୧-ଫୁଲବାଣୀ ସହରରେ ଦୁଇ ଦିନ ହେଲା ଜନସ୍ବାସ୍ଥ୍ୟ ଉପବିଭାଗ ପକ୍ଷରୁ ଜଳ ଯୋଗାଣ ହେଉ ନ ଥିବାରୁ ଲୋକେ ନାହିଁ ନ ଥିବା ଅସୁବିଧା ଭୋଗୁଛନ୍ତି। ନଦୀରୁ ପାଣି ଉଠିବା ପାଇଁ ପମ୍ପ ହାଉସରେ ଥିବା ଦୁଇଟି ମୋଟରରୁ ଗୋଟିଏ ଖରାପ ହେବାରୁ ଏପରି ସ୍ଥିତି ସୃଷ୍ଟି ହୋଇଛି। ବାରମ୍ବାର ଏଭଳି ସମସ୍ୟା ଦେଖାଦେଉଥିବାରୁ ଜନ ଅସନ୍ତୋଷ ବଢ଼ୁଛି। ପ୍ରକଳ୍ପ ହେବାର ୩ ବର୍ଷ ମଧ୍ୟରେ ବହୁବାର ମୋଟର ଖରାପ ହୋଇଛି। ଅନ୍ୟପଟେ ମୋଟରରେ ସମସ୍ୟା ଦେଖାଦେଲେ ତୁରନ୍ତ ନ ସଜାଡ଼ି ସମ୍ପୂର୍ଣ୍ଣ ଅଚଳ ହେବା ପରେ କାମ କରିବାକୁ ୩/୪ ଦିନ ଲଗାଇ ଦେଉଛନ୍ତି।
ଫୁଲବାଣୀକୁ ପାଣି ଯୋଗାଇବା ପାଇଁ ଜିରିଙ୍ଗିପଡା ପାଖରେ ୨୦୧୬ ଅକ୍ଟୋବର ୬ରେ ଏକ ବୃହତ ପ୍ରକଳ୍ପ ଉଦ୍ଘାଟନ ହୋଇଥିଲା। ହେଲେ ବର୍ଷେ ମଧ୍ୟରେ ପିଲା ସାଲୁଙ୍କି ନଦୀରୁ ପାଣି ଉଠାଇବା ପାଇଁ ଲାଗି ଥିବା ମୋଟର ଖରାପ ହେବା ଆରମ୍ଭ ହେଲା। ନୂଆ ମୋଟର ଏତେ ଶୀଘ୍ର କିଭଳି ଖରାପ ହେଉଛି ତାହାର ତଦନ୍ତ କରାଯିବା ଆବଶ୍ୟକ ବୋଲି ବୁଦ୍ଧିଜୀବୀ କହିଛନ୍ତି। ବର୍ଷକୁ ପ୍ରାୟ ୧୦/୧୫ ଥର ମୋଟର ଖରାପ ହେଉଛି। ସ୍ଥାନୀୟ ଅନଭିଜ୍ଞ ମେକାନିକଙ୍କ ଦ୍ୱାରା ଏହାର ମରାମତି କରାଯାଉଛି। ଯାହାଫଳରେ ମୋଟର ଠିକ୍ ହେବା ପରିବର୍ତ୍ତେ ସେଥିରେ ବିଭିନ୍ନ ବୈଷୟିକ ସମସ୍ୟା ବଢ଼ିବାରେ ଲାଗୁଛି। ଏପଟେ ମରାମତି ବାବଦରେ ଯନ୍ତ୍ରୀ ଚଢ଼ା ଦରରେ ବିଲ କରୁଛନ୍ତି। ପାଣି ମିଳୁ ନ ଥିବା ନେଇ ବିଭାଗ କାର୍ଯ୍ୟାଳୟ, ଯନ୍ତ୍ରୀଙ୍କୁ ଫୋନ କଲେ ସେମାନେ ଦୁର୍ବ୍ୟବହାର ପ୍ରଦର୍ଶ କରିବାକୁ କରିବାକୁ ବି ପଛାଉ ନ ଥିବା ଅଭିଯୋଗ ହେଉଛି। ଏ ନେଇ କନିଷ୍ଠ ଯନ୍ତ୍ରୀ ସୁଦେସ୍ନା ସାହୁଙ୍କୁ ପଚାରିବାରୁ ପାଣି ସବୁଆଡେ ଦିଆଯାଉଛି ବୋଲି ପ୍ରଥମେ କହିଥିଲେ। ଦୁଇ ଦିନ ହେଲା ପାଣି ନାହିଁ ପାଣି ମିଳୁନି ବୋଲି କହିବାରୁ ଗୋଟିଏ ମୋଟର ଖରାପ ହୋଇଛି। ସହରର ଅଧା ଅଞ୍ଚଳକୁ ପାଣି ଦିଆଯାଇଛି। ମଙ୍ଗଳବାର ସନ୍ଧ୍ୟା ସୁଦ୍ଧା ପାଣି ଦିଆଯିବ ବୋଲି କହିଥିଲେ।