ବାରିପଦା ଅଫିସ,୬ା୧୧- ମୟୂରଭଞ୍ଜ ଜିଲା ବାରିପଦା ବନଖଣ୍ଡ ପକ୍ଷରୁ ଗତ ୨୯ ଅକ୍ଟୋବରରେ କୁଳିଅଣା ଥାନା ଅଧୀନ ଅସନଯୋଡା ନିକଟସ୍ଥ ଏକ ଢାବାରୁ ୧୮ କିଗ୍ରା ଓଜନର ଏକ ବଜ୍ରକାପ୍ତା ଜବତ କରାଯାଇଥିଲା। ଏହି ବଜ୍ରକାପ୍ତାକୁ ପିଠାବଟା ରେଞ୍ଜ କାର୍ଯ୍ୟାଳୟରେ ସ୍ବତନ୍ତ୍ର ଘରେ ରଖାଯାଇଥିଲା। ମାତ୍ର ମଙ୍ଗଳବାର ସକାଳୁ ଏହା କେଉଁଆଡ଼େ ଗାଏବ ହୋଇଯାଇଛି। ବାରିପଦା ବନଖଣ୍ଡ ଅଧିକାରୀ ସ୍ବୟମ ମଲିକଙ୍କ ସୂଚନା ଅନୁଯାୟୀ, ଜବତ ହେବା ପରେ ବଜ୍ରକାପ୍ତାର ସ୍ବତନ୍ତ୍ର ଦେଖାଶୁଣା କରାଯାଉଥିଲା। ଜବତ ହେବାର ଦୁଇଦିନ ପରେ ଏହା ଏକ ଶାବକକୁ ଜନ୍ମ ଦେଇଥିଲା। ଏହି ଶାବକର ମଧ୍ୟ ଗତ ସୋମବାର ମୃତ୍ୟୁ ହୋଇଯାଇଥିଲା। ବଜ୍ରକାପ୍ତାକୁ ନନ୍ଦନକାନନ ପଠାଇବା ପାଇଁ ବିଭାଗୀୟ ନିର୍ଦ୍ଦେଶ ଥିଲା। ତେବେ ୭ ଦିନ ଏଠାରେ ରଖିବା ପାଇଁ ନନ୍ଦନକାନନ କର୍ତ୍ତୃପକ୍ଷ ଜଣାଇଥିଲେ। ଫଳରେ ସ୍ବତନ୍ତ୍ର ଘର ତିଆରି କରାଯାଇ ଏହାକୁ ରଖାଯାଇଥିଲା। ସୋମବାର ରାତି ପର୍ଯ୍ୟନ୍ତ କର୍ମଚାରୀମାନେ ଏହାକୁ ଦେଖିଛନ୍ତି। ହେଲେ ମଙ୍ଗଳବାର ସକାଳୁ ଏହା କେଉଁଆଡ଼େ ଚାଲିଯାଇଛି। ପୋଲିସର ଡଗ ସ୍କ୍ବାଡ ଆଣି ଏହାକୁ ଖୋଜାଖୋଜି କରାଯାଇଥିଲା। ଏହା ରାତ୍ରିଚର ପ୍ରାଣୀ ହୋଇଥିବାରୁ ଏହାକୁ ପୁନର୍ବାର ରାତିରେ ଖୋଜାଯିବ। ଜବତ ହେବାର ପ୍ରାୟ ୨୦ ଦିନ ପୂର୍ବରୁ ଚାଲାଣକାରୀମାନେ ଏହାକୁ ଆବଦ୍ଧ କରି ରଖିଥିଲେ। ଉଲ୍ଲେଖଯୋଗ୍ୟ ଯେ,ବାଦାମପାହାଡ଼ ଅଞ୍ଚଳରୁ ଏହି ବଜ୍ରକାପ୍ତା ଚାଲାଣ କରାଯାଉଥିଲା। ଦୁଇଟି ଗାଡ଼ିରେ ୧୦ରୁ ଊର୍ଦ୍ଧ୍ୱ ଚାଲାଣକାରୀ ବାରିପଦା ହୋଇ କଲିକତା ଯିବା ଯୋଜନା କରିଥିଲେ। ସେଠାରେ ଏହି ବଜ୍ରକାପ୍ତାକୁ ବିକ୍ରି କରିବାର ଯୋଜନା ହୋଇଥିଲା। ତେବେ ଅସନଯୋଡା ଢାବାଠାରେ ଚାଲାଣକାରୀମାନେ ଖାଉଥିବାବେଳେ ବନ ବିଭାଗର ଏକ ଟିମ ଚଢ଼ାଉ କରିଥିଲା। ସେମାନଙ୍କ ମଧ୍ୟରୁ ୪ ଜଣଙ୍କୁ ଗିରଫ କରିଥିବାବେଳେ ବଜ୍ରକାପ୍ତା ସହିତ ୨ ଟି ଚାରିଚକିଆ ଯାନ ଜବତ କରିଥିଲା।