ଭୁବନେଶ୍ୱର, ୬ା୨(ବ୍ୟୁରୋ): ପାଇକନଗରରେ ଚାଲିଥିବା ଜମି ବିବାଦ ଘଟଣାର ସମାଧାନ ଏ ପର୍ଯ୍ୟନ୍ତ ହୋଇପାରୁନାହିଁ। ୫୦୦ରୁ ଊର୍ଦ୍ଧ୍ୱ ପରିବାର ଉକ୍ତ ସରକାରୀ ଜମି ଉପରେ ନିର୍ଭର କରୁଛନ୍ତି। ହେଲେ ବିଲ୍ଡର ଉକ୍ତ ଜମିରେ ନିଜର କନଷ୍ଟ୍ରକଶନ କାର୍ଯ୍ୟ ଜାରି ରଖିଛନ୍ତି। ବୁଧବାର ପୂର୍ବ ବିଲ୍ଡର କାର୍ଯ୍ୟ ଆରମ୍ଭ କରିଥିବା ବେଳେ ପାଇକନଗର ୱେଲଫେୟାର ଆସୋସିଶନ ପକ୍ଷରୁୁ ଏହାକୁ ବିରୋଧ କରାଯିବା ସହ ଏକ ଖବରଦାତା ସମ୍ମିଳନୀରେ ତୀବ୍ର ଅସନ୍ତୋଷ ଜାହିର କରାଯାଇଛି। ପୋଲିସ ପ୍ରଶାସନ ବିଲଡରଙ୍କ ସହ ମିଶି ଜବରଦଖଲ ହେବାକୁ ପ୍ରଶ୍ରୟ ଦେଉଛି ବୋଲି କହିବା ସହ ଯଦି ଏ ନେଇ ତୁରନ୍ତ ସମାଧାନ ନ ହୁଏ ତେବେ ପାଇକନଗରରେ ରହୁଥିବା ୫୦୦ ପରିବାର ରାସ୍ତାକୁ ଓହ୍ଲାଇବେ ବୋଲି ପ୍ରକାଶ କରିଛନ୍ତି।
ପାଇକନଗର ୱେଲଫେୟାର ଆସୋସିଏଶନ୍ର ସମ୍ପାଦକ ସମୀର ନାୟକ କହିଛନ୍ତି, ପାଇକନଗର ମୌଜାର ପ୍ଲଟ ନଂ. ୨୨୬, ୨୨୭, ୨୨୮, ୨୨୯, ୨୩୦, ୨୩୨, ୨୩୩ ପୂର୍ବରୁ ଜଳାଶୟ ଥିଲା। ଏବେ ମଧ୍ୟ ସରକାରୀ ନକ୍ସାରେ ସେଠାରେ ଜଳାଶୟ ଓ ୪.୫ ଫୁଟର ଡ୍ରେନ ଯାଉଛି। ହେଲେ ବିଲ୍ଡର ସୁଧାଂଶୁ ଶେଖର ପାଳ ଉକ୍ତ ଜଳାଶୟକୁ ପୋତି ସେଠାରେ ଜବରଦଖଲ କରିଛନ୍ତି। ଏ ନେଇ ବିଧାନସଭାରେ ପ୍ରଶ୍ନୋତ୍ତର ହେବା ପରେ ସେଠାରୁ ୨୦୦୯ରେ ବିଏମ୍ସି, ବିଡିଏ ପ୍ରଶାସନ ଦ୍ୱାରା ଉଚ୍ଛେଦ କାର୍ଯ୍ୟ କରାଗଲା। ତା’ପରେ ସେ ସେଠାରେ ଥିବା ୨୨୭, ୨୨୮ ପ୍ଲଟକୁ ନିଜର ସ୍ଥିତିବାନ ଜମି ବୋଲି ଦର୍ଶାଇବା ସହ ଉକ୍ତ ଜମିକୁ ଲାଗି ରହିଥିବା ଅନ୍ୟ ପ୍ଲଟଗୁଡିକୁ ମଧ୍ୟ ନିଜର ବତାଉଛନ୍ତି। ଉକ୍ତ ସରକାରୀ ଜମି ଉପରେ ସ୍ଥାନୀୟ ବାସିନ୍ଦା ନିର୍ଭରଯୋଗ୍ୟ ଥିବା ବେଳେ ବିଲ୍ଡର ପାଳ ସେଠାରେ ଜବରଦଖଲ କରୁଛନ୍ତି ବୋଲି ସେ କହିଛନ୍ତି।
ପୂର୍ବରୁ ବିଲ୍ଡଙ୍କର ସହ ବହୁବାର ଜମିକୁ ନେଇ ବିବାଦ ଲାଗି ରହୁଥିଲା, ହେଲେ ୨୦୨୦ ଜାନୁୟାରୀ ୧୭ରେ ନୟାପଲ୍ଲୀ ଥାନାରେ ଉଭୟପକ୍ଷ ବସି ଆଲୋଚନା କରିଥିଲେ। ୩ଦିନ ମଧ୍ୟରେ ଜମି ମାପଚୁପ ହେବ ଓ ଉଭୟପକ୍ଷଙ୍କ ଅମିନ ସେଠାରେ ଉପସ୍ଥିତ ରହି ମାପଚୁପ୍ କରିବା ସହ ମାପାଚୁପ ହେବାର ଗୋଟିଏ ଦିନ ପୂର୍ବରୁ ଉଭୟପକ୍ଷକୁ ଏ ନେଇ ସୂଚନା ଦିଆଯିବ ବୋଲି ନିଷ୍କର୍ସ ପ୍ରକାଶ ପାଇଥିଲା। ହେଲେ ବୁଧବାର ସକାଳ ୯ ଟାରେ ନୟପଲ୍ଲୀ ଥାନାର ଜଣେ ଏସ୍ଆଇ ଫୋନ ଯୋଗେ ଯୋଗାଯୋଗ କରି ଏବେ ହିଁ ମାପଚୁପ ହେବ ବୋଲି କହିଥିଲେ। ତେବେ ପୂର୍ବ ନିଷ୍ପତ୍ତିକୁ ଖାତିର ନ କରି ପୋଲିସ୍ ବିଲଡରଙ୍କ ସହ ମିଶି ମଧ୍ୟାହ୍ନରେ ମାପଚୁପ କରିଥିଲେ। ଯାହାକୁ ଆସୋସିଏଶନ ପକ୍ଷରୁ ସହଯୋଗ କରାଯାଇ ନ ଥିଲା। ଏହି ମାପଚୁପ ସମ୍ପୂର୍ଣ୍ଣ ବେଆଇନ ବୋଲି କହିବା ସହ ଆସୋସିଏଶନ୍ ପକ୍ଷରୁ ଆଉଥରେ ସେଠାରେ ମାପଚୁପ୍ କରିବାକୁ ଦାବି କରାଯାଇଛି।