ଅନୁଗୋଳ ଅଫିସ,୪ା୬ – ଦୀର୍ଘବର୍ଷ ଧରି ଜବରଦଖଲରେ ଥିବା ମତ୍ସ୍ୟ ବିଭାଗର କେତେକ ପୋଖରୀ ମଙ୍ଗଳବାର ଦଖଲମୁକ୍ତ ହୋଇଛି। ଏହାପରେ ବୁଧବାର ଅନୁଗୋଳ ମତ୍ସ୍ୟ ବିଭାଗ ଉକ୍ତ ପୋଖରୀରୁ ମାଛ ମାରିଥିବା ସୂଚନା ମିଳିଛି।
ପ୍ରକାଶ ଯେ, ଅନୁଗୋଳ ସହର ମଦନମୋହନପଡାରେ ମତ୍ସ୍ୟ ବିଭାଗର ପୋଖରୀ ରହିଛି। ୨୦୦୪ରେ ତାହାକୁ ଜଣେ ବ୍ୟକ୍ତିଙ୍କୁ ଲିଜ୍ ଆକାରରେ ଦିଆଯାଇଥିଲା। ୨୦୧୮ରେ ଲିଜ୍ ଅବଧି ଶେଷ ହୋଇଥିଲା। କିନ୍ତୁ ଲିଜ୍ଧାରୀଙ୍କ ମୃତ୍ୟୁ ପରେ ତାଙ୍କ ପରିବାର ଉକ୍ତ ସରକାରୀ ପୋଖରୀକୁ ନିଜ ଅକ୍ତିଆରରେ ରଖିଥିଲେ। ପୋଖରୀ ଫେରାଇ ଆଣିବାକୁ ଉଦ୍ୟମ କରିଥିଲେ ବି ମତ୍ସ୍ୟ ବିଭାଗ ବିଫଳ ହୋଇଥିଲା। ତେବେ ଗତ ମାସରେ ମତ୍ସ୍ୟ ବିଭାଗ ନିର୍ଦ୍ଦେଶକ ସ୍ମୃତିରଞ୍ଜନ ପ୍ରଧାନ ଅନୁଗୋଳ ଗସ୍ତରେ ଆସିଥିବା ବେଳେ ଏ ସମ୍ପର୍କରେ ଜାଣି ସମାଧାନ ପାଇଁ ଜିଲାପାଳ ମନୋଜ କୁମାର ମହାନ୍ତିଙ୍କ ସହ ଆଲୋଚନା କରିଥିଲେ। ଜିଲାପାଳ ଏହାର ସମାଧାନ ଉପଜିଲାପାଳ ବାସୁଦେବ ଶତପଥୀଙ୍କ କୋର୍ଟରେ କରିବାକୁ ନିର୍ଦ୍ଦେଶ ଦେଇଥିଲେ। ଉପଜିଲାପାଳ ଏହାର ସମାଧାନ କରିବା ସହ ପୋଖରୀରୁ ମାଛ ମାରିବାକୁ ମତ୍ସ୍ୟ ବିଭାଗକୁ ନିର୍ଦ୍ଦେଶ ଦେଇଥିଲେ। ଏଥିସହ ସୁରକ୍ଷା ପାଇଁ ଏସ୍ପିଙ୍କ ଅନୁମତି ମାଗିଥିଲେ। ବୁଧବାର ମାଜିଷ୍ଟ୍ରେଟଙ୍କ ସହ ଗୋଟିଏ ପ୍ଲାଟୁନ ଫୋର୍ସ ଉପସ୍ଥିତିରେ ମାଛ ମରାଯାଇଥିଲା। ପୋଖରୀ ଜବରଦଖଲ ମୁକ୍ତ ହୋଇଥିବାରୁ ଜାଅଁଳ ଉତ୍ପାଦନ କରାଯିବ ବୋଲି ମତ୍ସ୍ୟ ବିଭାଗ ଡେପୁଟି ଡାଇରେକ୍ଟର ଶାନ୍ତନୁ ସାହୁ କହିଛନ୍ତି। ସେହିପରି ଜବରଦଖଲ କରିଥିବା ପରିବାରବର୍ଗ ମତ୍ସ୍ୟ ବିଭାଗକୁ ୨୬ ଲକ୍ଷ ଏକ ହଜାର ୫୫୫ ଟଙ୍କା ଭରଣ କରିବେ ବୋଲି ଜଣାପଡିଛି।