ଆନନ୍ଦପୁର,୬ା୬(ସ୍ବ.ପ୍ର.): କେନ୍ଦୁଝର ଜିଲା ଆନନ୍ଦପୁରର ଜନଗହଳିପୂର୍ଣ୍ଣ ବ୍ରିଜଛକରେ ପୌରପ୍ରଶାସନ ପକ୍ଷରୁ ଜବରଦଖଲ ଉଚ୍ଛେଦ କାର୍ଯ୍ୟ ଗୁରୁବାର ତ୍ୱରାନ୍ବିତ ହୋଇଛି। ପୂର୍ବରୁ ଉଚ୍ଛେଦ ପାଇଁ ପ୍ରଶାସନ ପକ୍ଷରୁ ବ୍ୟବସାୟୀମାନଙ୍କୁ ୨୪ ଘଣ୍ଟିିଆ ନୋଟିସ୍ ଦିଆଯାଇଥିଲା। ନୋଟିସ ପାଇବା ପରେ ବ୍ୟବସାୟୀମାନେ ଦୁଇଦିନ ଧରି ନିଜ ନିଜର ବ୍ୟବସାୟ ପ୍ରତିଷ୍ଠାନକୁ ଅନ୍ୟତ୍ର ସ୍ଥାନାନ୍ତର କରିବାରେ ଲାଗିପଡ଼ିଥିଲେ। ନିର୍ଦ୍ଧାରିତ କାର୍ଯ୍ୟସୂଚୀ ଅନୁଯାୟୀ, ଗୁରୁବାର ପୌର ଅଧିକାରୀ ସୀତାଂଶୁ ଶେଖର ସାମଲ, ଆନନ୍ଦପୁର ତହସିଲଦାର ତପନ କୁମାର ନାୟକ, ହାଟଡିହୀ ତହସିଲଦାର ଗାୟତ୍ରୀ ସୋରେନ, ଆନନ୍ଦପୁର ଆଇଆଇସି ଗଗନ ବିହାରୀ ବିଶ୍ୱାଳ ଏବଂ ଦୁଇ ପ୍ଲାଟୁନ୍ ପୋଲିସ ଫୋର୍ସଙ୍କ ଉପସ୍ଥିତିରେ ଜବରଦଖଲ ଉଚ୍ଛେଦ କରାଯାଇଥିଲା। ୩୫ ଜଣଙ୍କୁ ନୋଟିସ୍ ଦିଆଯାଇ ଉଚ୍ଛେଦ କରାଯାଇଥିଲା। ଏହି ଉଚ୍ଛେଦ ପ୍ରକ୍ରିୟାରେ ପାତରଅନ୍ତର ହେଉଥିବା ଅଭିଯୋଗ କରି ବ୍ୟବସାୟୀ ବାପି ଦାସ, ଅଚ୍ୟୁତ ସିଂହ, ସେକ୍ ବାବୁ, ହରେକୃଷ୍ଣ ସାହୁ, ଦୁର୍ଯ୍ୟୋଧନ ବେହେରା, ଦଶରଥ ରାଜ, ନାରାୟଣ ସାହୁ, ସୁଜିତ୍ କୁମାର ସାହୁ, ପ୍ରଦ୍ୟୁମ୍ନ ହଜାରୀ, ମୁରଲୀଧର ମିଶ୍ର, କ୍ଷୀରୋଦ କୁମାର ସିଂହ, କୁନାଲ ସିଂହ, ଗୌରୀଶଙ୍କର ରଣା, ପେଟା ରଣା ପ୍ରମୁଖ ଥଇଥାନ ଦାବିରେ ପୌର କର୍ତ୍ତୃପକ୍ଷଙ୍କୁ ଦାବିପତ୍ର ପ୍ରଦାନ କରିଥିଲେ। ତୁରନ୍ତ ଏ ଦିଗରେ ଧ୍ୟାନ ଦିଆଯାଇ ଯଥା ସମ୍ଭବ ଭେଣ୍ଡିଂଜୋନ୍ ମାଧ୍ୟମରେ ଥଇଥାନ କରାଯିବାକୁ ସାଧାରଣରେ ଦାବି ହୋଇଛି।