ଭାପୁର, ୧୪।୭(ଡି.ଏନ୍.ଏ.) – ଢେଙ୍କାନାଳ ଜିଲା ଓଡ଼ାପଡ଼ା ବ୍ଲକ ଗୋବିନ୍ଦପ୍ରସାଦରେ ରାସ୍ତା ଜବରଦଖଲ କାରଣରୁ ତିଆରି ହୋଇପାରୁନି ଡ୍ରେନ୍। ସାମାନ୍ୟ ବର୍ଷାରେ ମୁଖ୍ୟ ରାସ୍ତାରେ ଲହଡ଼ି ଭାଙ୍ଗୁଛି ପାଣି। ବାରମ୍ବାର ପ୍ରଶାସନ ନିକଟରେ ଗୁହାରି କରିବା ସତ୍ତ୍ୱେ ପଦକ୍ଷେପ ନିଆଯାଉନାହିଁ। ଫଳରେ ଗ୍ରାମବାସୀ ପାଣି କାଦୁଅରେ ନାହିଁ ନ ଥିବା ହୀନସ୍ତା ହେଉଛନ୍ତି।
ଗୋବିନ୍ଦପ୍ରସାଦ ଗ୍ରାମର ମୋଟ ଜନସଂଖ୍ୟା ପାଖାପାଖି ୩୫୦୦। ଭୌଗୋଳିକ ଦୃଷ୍ଟିକୋଣରେ ଗ୍ରାମଟି ସାପୁଆ ନଦୀ ଆଡ଼କୁ ଗଡ଼ାଣିଆ। ଫଳରେ ଦୀର୍ଘ ୧ କିମି ବିଶିଷ୍ଟ ଗ୍ରାମ୍ୟରାସ୍ତା ଦେଇ ବର୍ଷାଜଳ ନିଷ୍କାସିତ ହୋଇଥାଏ। ହେଲେ କେତେଜଣ ଗ୍ରାମବାସୀ ରାସ୍ତା ଉପରେ ଜବରଦଖଲ କରି ଘର ନିର୍ମାଣ କରିଛନ୍ତି। ରାସ୍ତା ଅତ୍ୟନ୍ତ ସଙ୍କୁଚିତ ହୋଇପଡ଼ିଥିବାରୁ ଡ୍ରେନ୍ ନିର୍ମାଣ ହୋଇପାରୁନାହିଁ। କାଦୁଅ ପଚପଚ ରାସ୍ତାରେ ଛାତ୍ରୀଛାତ୍ରମାନେ ସ୍କୁଲ ଯାଉଛନ୍ତି। ଅନେକ ସମୟରେ ସେମାନେ ଖାଲଖମାରେ ପଡ଼ି ଆହତ ହେଉଛନ୍ତି। ଯୋଜନାବଦ୍ଧ ଭାବେ ଢଳେଇ ରାସ୍ତା ତିଆରି ହୋଇ ନ ଥିବାରୁ ଉଚ୍ଚାନିଚା ରହିଛି। ଫଳରେ ଉକ୍ତ ସ୍ଥାନରେ ପାଣି ଜମି ରହି ଝର ସୃଷ୍ଟି ହେଉଛି। ୨-୩ ମାସ ଯାଏ ଝର ପାଣି ସନ୍ତସନ୍ତିଆ ପରିବେଶ ସୃଷ୍ଟି କରୁଛି। ସମସ୍ୟାର ସ୍ଥାୟୀ ସମାଧାନ ପାଇଁ ୨୦୧୭ରେ ଗ୍ରାମବାସୀ ଜବରଦଖଲ ହଟାଇବାକୁ ଜିଲା ପ୍ରଶାସନ ନିକଟରେ ଗୁହାରି କରିଥିଲେ। ହେଲେ ଦୀର୍ଘ ୨ବର୍ଷ ପରେ ବି ଏହାର ସମାଧାନର ବାଟ ବାହାରି ପାରିନାହିଁ। ସବୁଆଡ଼ୁ ନିରାଶ ହେବା ପରେ ପୁନର୍ବାର ୨୦୧୯ ଜାନୁୟାରୀରେ ପ୍ରଶାସନର ଦ୍ୱାରସ୍ଥ ହୋଇଥିଲେ ଗ୍ରାମବାସୀ। ତଥାପି ପ୍ରଶାସନିକ ଅଧିକାରୀ ସମସ୍ୟାକୁ ଅତ୍ୟନ୍ତ ହାଲ୍କା ଭାବେ ନେଉଥିବା ସେମାନେ ଅଭିଯୋଗ କରିଛନ୍ତି।
ଏ ନେଇ ସରପଞ୍ଚ ଜିତୁରଞ୍ଜନ ଜେନା କୁହନ୍ତି, ରାସ୍ତା ସମ୍ପ୍ରସାରଣରେ ପ୍ରମୁଖ ସମସ୍ୟା ଜବରଦଖଲ। ଜବରଦଖଲ ହଟାଗଲେ ସମାଧାନର ବାଟ ବାହାରିପାରିବ। ଘଟିପିରି ଆର୍ଆଇ ଇତିଶ୍ରୀ ପ୍ରିୟଦର୍ଶିନୀ କୁହନ୍ତି, ଏ ନେଇ କୌଣସି ଅଭିଯୋଗ ଆସିନାହିଁ। ବିଧିବଦ୍ଧ ଭାବେ ଅଭିଯୋଗ ହେଲେ କିମ୍ବା ଉପରିସ୍ଥ ଅଧିକାରୀଙ୍କଠାରୁ ନିର୍ଦ୍ଦେଶ ଆସିଲେ ପଦକ୍ଷେପ ନିଆଯିବ।