ଛତ୍ରପୁର, ୧୬।୧୦(ଡି.ଏନ.ଏ.)-ଛତ୍ରପୁର ସାହାରା ଇଣ୍ଡିଆ କାର୍ଯ୍ୟାଳୟ ଜମାଅର୍ଥ ଫେରାଉ ନ ଥିବା ନେଇ ଜଣେ ଜମାକାରୀ ଜିଲାପାଳଙ୍କ ନିକଟରେ ଅଭିଯୋଗ କରିଛନ୍ତି। ସୂଚନା ଥାଉକି, ଗଞ୍ଜାମ ବ୍ଲକ ବଡକାଇଁଚପୁର ଗ୍ରାମର ବିଦେଶୀ ବେହେରା ଜଣେ ଏଜେଣ୍ଟଙ୍କ ଜରିଆରେ ୨୦ ହଜାର ଟଙ୍କା ଜମା କରିଥିଲେ। ଯେଉଁ ଅର୍ଥ ନଭେମ୍ବର ମାସରେ ମାଚ୍ୟୁରିଟି ହୋଇଯାଇଥିଲେ ବି ତାଙ୍କୁ ସାହାରା କାର୍ଯ୍ୟାଳୟ ଟଙ୍କା ଦେଉନଥିବା ନେଇ ଜିଲାପାଳ ବିଜୟ ଅମୃତା କୁଲାଙ୍ଗେଙ୍କୁ ଜଣାଇଥିଲେ। ତାଙ୍କୁ ସାହାରା ଇଣ୍ଡିଆ ଠାରୁ ୪୫ ହଜାର ୨୮୦ ଟଙ୍କା ପାଇବାକୁ ଅଛି। ଟଙ୍କା ଅଭାବରୁ ସେ ୨ଦିନ ହେଲା ଖାଇ ନ ଥିବା ଜିଲାପାଳଙ୍କୁ କହିଥିଲେ। ଜିଲାପାଳ ଛତ୍ରପୁର ସାହାରା କାର୍ଯ୍ୟାଳୟ ଅଧିକାରୀଙ୍କୁ ଡକାଇ ତାଙ୍କୁ ତୁରନ୍ତ ଅର୍ଥ ଫେରାଇ ଏହାର ସମାଧାନ କରିବାକୁ କହିଥିଲେ। ଟଙ୍କା ନ ଫେରାଇଲେ ଦୃଢ କାର୍ଯ୍ୟାନୁଷ୍ଠାନ ନିଆଯିବ ବୋଲି ଜିଲାପାଳ ତାଗିଦ କରିଥିଲେ। ବର୍ତ୍ତମାନ ସାହାର ଇଣ୍ଡିଆ ଜମାକାରୀଙ୍କୁ ସେମାନଙ୍କ ମାଚ୍ୟୁରିଟି ଟଙ୍କା ଫେରାଇବା ବିଳମ୍ବ ହେଉଛି, ଏଣୁ ଡିସେମ୍ବରରେ ଟଙ୍କା ଦେବୁବୋଲି ଉକ୍ତ ଅଧିକାରୀ ଜିଲାପାଳଙ୍କୁ କହିଥିଲେ ବି ଜିଲାପାଳ ଏଥିରେ ସହମତି ନ ହୋଇ ଖୁବ୍ଶୀଘ୍ର ଟଙ୍କା ଫେରାଇବାବୁ ନିର୍ଦ୍ଦେଶ ଦେଇଥିଲେ।