ଜଳେଶ୍ୱର, ୨୫ା୫(ସ୍ବ.ପ୍ର.)-ବାଲେଶ୍ୱର ଜିଲା ଜଳେଶ୍ୱର-ଦୀଘା ରାଜ୍ୟ ରାଜପଥ ନୂଆବଜାର ଲେଭଲ କ୍ରସିଂଠାରେ ନିର୍ମାଣ ଚାଲିଥିବା ଓଭରବ୍ରିଜ୍ କାମ ଜମି ଅଧିଗ୍ରହଣ ପାଇଁ ଅଟକି ରହିଛି। ଏହାର ମୋଟ ୨୮ଟି ପିଲର ମଧ୍ୟରୁ ୪ଟି ପିଲର ରେଳବାଇ ପକ୍ଷରୁ ନିର୍ମାଣ କରିବାର ଯୋଜନା ରହିଛି। ଏହି ୪ଟି ପିଲର ମଧ୍ୟରୁ ୩ଟି ରେଳବାଇ ସ୍ଥାନରେ ହେଉଥିବା ବେଳେ ୧୪ନଂ. ପିଲର ଲାଗି ଜମି ଅଧିଗ୍ରହଣ ଆବଶ୍ୟକ। କିନ୍ତୁ ପ୍ରଶାସନର ଟାଳଟୁଳ ନୀତି ଯୋଗୁ ତାହା ଅଦ୍ୟାବଧି ହୋଇପାରିନାହିଁ ବୋଲି ରବିବାର ରେଳବାଇ ଖଡଗପୁର ଡିଭିଜନର ନିର୍ବାହୀଯନ୍ତ୍ରୀ ଏସ୍ପି ତ୍ରିପାଠୀ ସୂଚନା ଦେଇଛନ୍ତି।
ଏହି ଓଭରବ୍ରିଜ୍ ନିର୍ମାଣ ଲାଗି ଦାବି ହୋଇ ଆସୁଥିବା ବେଳେ ୨୦୧୦ ମସିହାରେ ରେଳବାଇ ପକ୍ଷରୁ ସବୁଜସଂକେତ ମିଳିଥିଲା। ପିପିପି ମୋଡରେ ମୋଟ ୬୦କୋଟି ଟଙ୍କା ବ୍ୟୟରେ ଓଭରବ୍ରିଜ୍ ନିର୍ମାଣ ଲାଗି ଭିତ୍ତିପ୍ରସ୍ତର ସ୍ଥାପନ ହୋଇଥିଲା। ଏହି ଓଭରବ୍ରିଜ୍ ନିର୍ମାଣ ଲାଗି ବିଶେଷ ସରକାରୀ ଜାଗା ଆବଶ୍ୟକ ପଡୁ ନ ଥିଲେ ମଧ୍ୟ ମାତ୍ର ୨ଏକର ଜମି ଅଧିଗ୍ରହଣ ଲାଗି ସରକାର ବିଜ୍ଞାପନ ପ୍ରକାଶ କରିଥିଲେ। ଏହି ପ୍ରକଳ୍ପ ୧୦ା୯ା୨୦୨୦ରେ ଶେଷ କଥା, ହେଲେ କାର୍ଯ୍ୟର ମାତ୍ର ୪୦ଭାଗ ଶେଷ ହୋଇ ନାହିଁ। ଏବେ ବି ବଡବଜାରରୁ ନୂଆବଜାରକୁ ଯିବା ଲାଗି ଦୀର୍ଘ ସମୟ ପର୍ଯ୍ୟନ୍ତ ଲେଭଲକ୍ରସିଂ ନିକଟରେ ଖରା ବର୍ଷାରେ ଅପେକ୍ଷା କରିବାକୁ ପଡୁଛି। ଜମି ଅଧିଗ୍ରହଣ ହୋଇ ନ ଥିବାରୁ ଏହି କାର୍ଯ୍ୟ କେବେ ଶେଷ ହେବ ତାହା ପ୍ରଶ୍ନବାଚୀ ସୃଷ୍ଟି କରିଛି। ପୂର୍ତ୍ତବିଭାଗ ପକ୍ଷରୁ ଡାଇଭରସନ ରୋଡ ନିର୍ମାଣ ହୋଇ ନ ଥିବାରୁ ସାଧାରଣ ଲୋକ ଓ ଯାନବାହନ ଯିବାଆସିବାରେ ସମସ୍ୟା ଉପୁଜୁଛି। ଅତିଶୀଘ୍ର ଜମି ହସ୍ତାନ୍ତର କରିବା ଲାଗି ରେଳବାଇ ପକ୍ଷରୁ ପୂର୍ତ୍ତ ବିଭାଗ ମୁଖ୍ୟ ସଚିବ ଓ ବାଲେଶ୍ୱର ଜିଲାପାଳଙ୍କୁ ଲିଖିତ ଭାବେ ଜଣାଇ ଦିଆଯାଇଥିବା ତ୍ରିପାଠୀ ସୂଚନା ଦେଇଛନ୍ତି। ଦୀର୍ଘ ୨ମାସ ଲକ୍ଡାଉନ ପରେ ରେଳବିଭାଗ ପକ୍ଷରୁ ଓଭରବ୍ରିଜ୍ କାମ ଆରମ୍ଭ ପାଇଁ ପ୍ରସ୍ତୁତି ଚାଲିଥିବା ପୂର୍ତ୍ତବିଭାଗ ପକ୍ଷରୁ କୌଣସି ପ୍ରସ୍ତୁତି ଦେଖିବାକୁ ମିଳିନାହିଁ। ଏ ସମ୍ପର୍କରେ ପିଡବ୍ଲ୍ୟୁଡି ସହକାରୀ ନିର୍ବାହୀ ଅଧିକାରୀ ଅଶୋକ କୁମାର ପଣ୍ଡାଙ୍କୁ ପଚରାଯିବାରୁ ସେ କହିଛନ୍ତି ଯେ, ଲକ୍ଡାଉନ ଯୋଗୁ ଆନ୍ଧ୍ରରୁ ଶ୍ରମିକମାନେ ଆସିପାରି ନାହାନ୍ତି। ସେଥିପାଇଁ କାର୍ଯ୍ୟ ବିଳମ୍ବ ହେଉଛି। ସରକାର ଜମି ଅଧିଗ୍ରହଣ ଲାଗି ଚେଷ୍ଟା ଜାରି ରଖିଛନ୍ତି। ଖୁବ୍ ଶୀଘ୍ର କାର୍ଯ୍ୟ ଆରମ୍ଭ ହେବ।