ଗୋପାଳପୁର,୭ା୧୧-ଜଣେ ମହିଳାଙ୍କ ନାଁରେ ଜମି କିଣିବା ପାଇଁ ସମ୍ପର୍କୀୟ ଭାଇ ମହିଳାଙ୍କଠାରୁ ୧୫ ଲକ୍ଷ ଟଙ୍କା ନେଇଥିଲେ। ପରେ ଜମି କିଣି ସମ୍ପୃକ୍ତା ମହିଳାଙ୍କ ନାଁରେ ନ କରି ନିଜ ଭଣଜାଙ୍କ ନାଁରେ କରି ଦେଇଥିଲେ। ଏ ନେଇ ଦୀର୍ଘ ୧୦ ବର୍ଷ ପରେ ମହିଳା ଜଣକ ଗତ ଏକ ସପ୍ତାହ ତଳେ ବ୍ରହ୍ମପୁର ଏସ୍ପି ପିନାକ ମିଶ୍ରଙ୍କଠାରେ ଅଭିଯୋଗ କରିଥିଲେ। ପୋଲିସର ହସ୍ତକ୍ଷେପପରେ ମହିଳା ଜମି ପାଇଛନ୍ତି।
ଯେ, ଗୋପାଳପୁର ଥାନା କରାପଲ୍ଲୀ ଗ୍ରାମର କାମେଶ୍ୱରୀ (୫୫)ଙ୍କ ସ୍ବାମୀ ଭାରତୀୟ ସେନା ବାହିନୀରେ ଯବାନ ରୂପେ କାର୍ଯ୍ୟ କରୁଥିଲେ। କାର୍ଯ୍ୟରତ ଥିବାବେଳେ ତାଙ୍କ ସ୍ବାମୀ ଶହୀଦ ହୋଇଯାଇଥିଲେ। ଏଥିପାଇଁ କାମେଶ୍ୱରୀଙ୍କୁ ୨୫ ଲକ୍ଷ ଟଙ୍କା ଆର୍ଥିକ ସହାୟତା ମିଳିଥିଲା। ସେତେବେଳେ ତାଙ୍କ ସମ୍ପର୍କୀୟ ଭାଇ ପୁରୁଷୋତ୍ତମ ସାହୁ ଏକ ଜମି ତୁମ ନାମରେ କିଣାଯିବ କହି ଟଙ୍କା ନେଇଥିଲେ। ଜମି କିଣିବା ପରେ ତାଙ୍କ ଭଣଜା ଅନୀଲ ସାହୁଙ୍କ ନାମରେ କରି ଦେଇଥିଲେ, ଏବଂ ତୁମର ସମୟ ଭଲ ନାହିଁ ବୋଲି କାମେଶ୍ୱରୀଙ୍କୁ କହି ବାରମ୍ବାର ଭଣ୍ଡେଇ ଚାଲିଥିଲେ। ୧୦ ବର୍ଷ ପରେ ମହିଳା ଜଣକ ବ୍ରହ୍ମପୁର ଏସ୍ପିଙ୍କୁ ଜଣାଇବା ପରେ ସେ ଗୋପାଳପୁର ଥାନାକୁ ତଦନ୍ତ ପାଇଁ ନିର୍ଦ୍ଦେଶ ଦେଇଥିଲେ। ଗୋପାଳପୁର ପୋଲିସ ଏହାର ତଦନ୍ତ କରି ଉଭୟ ପକ୍ଷକୁ ଡାକିଥିଲା। ଅନିଲ ଓ ପୁରୁଷୋତ୍ତମ ନିଜ ଭୁଲ ମାନି ଉକ୍ତ ଜାଗାକୁ କାମେଶ୍ୱରୀଙ୍କ ନାମରେ ରେଜିଷ୍ଟ୍ରେଶନ କରିଛନ୍ତି।