କୁଜଙ୍ଗ,୧ା୩(ଡି.ଏନ.ଏ.): ଜଗତ୍ସିଂହପୁର ଜିଲାର କୁଜଙ୍ଗ ତହସିଲ କାର୍ଯ୍ୟାଳୟ ସବୁଠାରୁ ଗୁରୁତ୍ୱପୂର୍ଣ୍ଣ। ଏହି ତହସିଲ କାର୍ଯ୍ୟାଳୟ ଅଧୀନରେ ପାରାଦୀପ ଶିଳ୍ପାଞ୍ଚଳ ରହିଛି। ତେଣୁ ତହସିଲ ଅଧୀନ ପାରାଦୀପଗଡ଼, ଭୂତମୁଣ୍ଡାଇ ଓ କୁଜଙ୍ଗ ଆରଆଇ ସର୍କଲ ଜମିଗୁଡ଼ିକର ଚାହିଦା ଯେତିକି ମୂଲ୍ୟ ମଧ୍ୟ ସେହିପରି। ତେବେ ଏସବୁ ଆରଆଇ ସର୍କଲ ଅଧୀନରେ ଶହଶହ ଏକର ମୂଲ୍ୟବାନ ସରକାରୀ ଜମିକୁ ଭିନ୍ନଭିନ୍ନ ତହସିଲଦାର ବିଭିନ୍ନ ଯୋଜନାରେ ଜାଲିଆତି କରି ଅନ୍ୟକୁ ଟେକି ଦେଇଥିବା ଅଭିଯୋଗ ହୋଇଥିଲା। ବିଶେଷକରି ପାରାଦୀପଗଡ଼ ଆରଆଇ ସର୍କଲ ଯେଉଁଥିରେ କି ଶିଳ୍ପାଞ୍ଚଳ ଅର୍ନ୍ତଭୁକ୍ତ। ସେହି ସର୍କଲର କୋଟି କୋଟି ଟଙ୍କାର ମୂଲ୍ୟବାନ ଜମିକୁ ତତ୍କାଳୀନ ତହସିଲଦାରମାନେ ବିଭିନ୍ନ ବ୍ୟକ୍ତି ବିଶେଷଙ୍କଠାରୁ ଲକ୍ଷାଧିକ ଟଙ୍କା ନେଇ ବସୁନ୍ଧରା ଯୋଜନାରେ ପଟ୍ଟା ଦେଇଥିବା ଅଭିଯୋଗ ହୋଇଥିଲା। ଜିଲାପାଳ ସଂଗ୍ରାମ କେଶରୀ ମହାପାତ୍ରଙ୍କ ନିର୍ଦ୍ଦେଶକ୍ରମେ ଜଗତ୍ସିଂହପୁର ଅତିରିକ୍ତ ଜିଲାପାଳ ସଚିଦାନନ୍ଦ ସାହୁ ଓ ଜଗତ୍ସିଂହପୁର ଉପଜିଲାପାଳ ଦାୟିତ୍ୱରେ ଥିବା ଜଗତ୍ସିଂହପୁର ତହସିଲଦାର ମାନସ ରଞ୍ଜନ ଭୋଇଙ୍କ ନେଇ ଗଠିତ ଦୁଇ ଜଣିଆ କମିଟି ଶନିବାର କୁଜଙ୍ଗ ତହସିଲରେ ପହଞ୍ଚତ୍ ତଦନ୍ତ ଆରମ୍ଭ କରିଛନ୍ତି। ଏ ସମ୍ପର୍କରେ ଅତିରିକ୍ତ ଜିଲାପାଳ ସାହୁଙ୍କୁ ପଚାରବାରୁ ସେ କହିଥିଲେ, ତଦନ୍ତ ଆରମ୍ଭ ହୋଇଛି। ତେଣୁ ଅଧିକ କିଛି କହି ହେବନାହିଁ। ତଦନ୍ତପରେ ସବୁ ତଥ୍ୟ ସାର୍ବଜନୀନ କରାଯିବ। କୁଜଙ୍ଗ ତହସିଲରେ ଘଟିଥିବା ଜମି ଦୁର୍ନୀତିର ତଦନ୍ତ ଆରମ୍ଭ ହୋଇଥିବାରୁ ସାଧାରଣରେ ଉତ୍ସୁକତା ପ୍ରକାଶ ପାଇଛି। ତହସିଲ ଅଧୀନରେ ଥିବା ବହୁ ଗୋଚର, ଅନାବାଦୀ, ଜଳାଶୟ ଓ ନଦୀକୁ ମଧ୍ୟ ପ୍ରଭାବଶାଳୀ ବ୍ୟକ୍ତି ଚଞ୍ଚକତାକରି ନିଜନାମରେ ପଟ୍ଟାକରି ନେଇଥିବା ଅଭିଯୋଗ ରହିଛି। କେବଳ ପାରାଦୀପଗଡ଼ ଆରଆଇ ସର୍କଲ ନୁହେଁ ତହସିଲ ଅଧୀନରେ ଥିବା ସମସ୍ତ ଆରଆଇ ସର୍କଲର ତଦନ୍ତ ହେଲେ ଜମି ଜାଲିଆତି ଘଟଣାର ପର୍ଦ୍ଦାଫାଶ ହୋଇପାରିବ ବୋଲି ପୂର୍ବତନ ସମିତି ସଭ୍ୟ କବି ରଞ୍ଜନ ବେହେରା ଦାବି କରିଛନ୍ତି।