ବ୍ରହ୍ମପୁର ଅଫିସ,୨୪ା୬-ଗୋଷାଣୀନୂଆଗଁ। ରେ ଥାନା ନୀଳକଣ୍ଠନଗର ସରସ୍ବତୀ ଶିଶୁ ବିଦ୍ୟା ମନ୍ଦିର ସମ୍ମୁଖରେ ଥିବା ଏକ ଜମି ବିବାଦ ଏବେ ଉଗ୍ରରୂପ ନେଇଛି। ଗୋଟିଏ ପଟେ ଜମି ମାଲିକ ନିଜ ଜାଗାରେ କାମ ଆରମ୍ଭ କରିଥିବା ବେଳେ ସେଠାରେ ରହୁଥିବା କିନ୍ନର ଓ ଅନ୍ୟ କେତେଜଣ ଲୋକ ଏହାର ପ୍ରତିବାଦ କରିଥିଲେ। ଫଳରେ ୨ ଗୋଷ୍ଠୀ ମଧ୍ୟରେ ମୁହଁାମୁହିଁ ପରିସ୍ଥିତି ସହ ଘଟଣାସ୍ଥଳରେ ଉତ୍ତେଜନା ଦେଖାଦେଇଥିଲା। ସ୍ଥିତି ନିୟନ୍ତ୍ରଣ ପାଇଁ ବ୍ରହ୍ମପୁର ଏସ୍ଡ଼ିପିଓ ବିଷ୍ଣୁପ୍ରସାଦ ପତିଙ୍କ ନେତୃତ୍ୱରେ ସେଠାରେ ୧ ପ୍ଲାଟୁନ ଫୋର୍ସ ମୁତୟନ କରାଯାଇଛି। ଜମି ମାଲିକାନାକୁ ନେଇ ସୃଷ୍ଟି ହୋଇଥିବା ବିବାଦର ସମାଧାନ ପାଇଁ ଉଦ୍ୟମ ଆରମ୍ଭ ହୋଇଛି। ସେଥିପାଇଁ ପୋଲିସ ଉଭୟ ପକ୍ଷକୁ ଧାରା ୧୦୭ରେ ନୋଟିସ ଜାରି କରିଛି ବୋଲି ଏସ୍ଡ଼ିପିଓ ପତି ସୂଚନା ଦେଇଛନ୍ତି। ସେହିପରି ମାଲିକାନା ସତ୍ତ୍ବେ କାଗଜପତ୍ର ମାଜିଷ୍ଟ୍ରେଟ୍ଙ୍କ ନିକଟରେ ଦାଖଲ ପାଇଁ ଉଭୟ ଗୋଷ୍ଠୀଙ୍କୁ ନିର୍ଦ୍ଦେଶ ଦିଆଯାଇଛି ବୋଲି ସେ କହିଛନ୍ତି। ଅନ୍ୟପଟେ ଘଟଣାସ୍ଥଳରେ ଲାଗି ରହିଥିବା ଚାପା ଉତ୍ତେଜନାକୁ ଦୃଷ୍ଟିରେ ରଖି ପୋଲିସ ସେଠାରେ ୧୪୪ ଧାରା ଜାରି କରିବା ପାଇଁ ବ୍ରହ୍ମପୁର ଉପ ଜିଲାପାଳଙ୍କ ନିକଟରେ ଆବେଦନ କରିଥିବା ଏସ୍ଡ଼ିପିଓ ପତି ସୂଚନା ଦେଇଛନ୍ତି।
ପ୍ରକାଶଯେ, ବଡବଜାର ଅଞ୍ଚଳର ସତ୍ୟନାରାୟଣ ସୁବୁଦ୍ଧିଙ୍କର ନୀଳକଣ୍ଠନଗର ସରସ୍ବତୀ ଶିଶୁ ବିଦ୍ୟାମନ୍ଦିର ସମ୍ମୁଖରେ ଏକ ଜମି ରହିଛି। ଏଥିରେ ଗୃହ ନିର୍ମାଣ ପାଇଁ ସତ୍ୟନାରାୟଣ ଏକ ସଂସ୍ଥାକୁ ଦାୟିତ୍ୱ ଦେଇଥିଲେ। ସଂସ୍ଥା କର୍ମଚାରୀମାନେ ସେଠାରେ ମଙ୍ଗଳବାର କାମ ଆରମ୍ଭ କରିଥିଲେ। ହେଲେ ସେଠାରେ କିନ୍ନର ଓ କେତେଜଣ ଲୋକ ଘର କରି ରହୁଥିବାରୁ ସେମାନେ ଏହାର ପ୍ରତିବାଦ କରିଥିଲେ। ଫଳରେ ଆମେ ଉଠିବୁ ନାହୁଁ । ଏଥିଯୋଗୁ ଉଭୟ ଗୋଷ୍ଠୀଙ୍କ ମଧ୍ୟରେ ଝଗଡା ହୋଇଥିଲା। ଖବର ପାଇ ପୋଲିସ ପହଞ୍ଚି ଉଭୟଙ୍କୁ ବୁଝାଶୁଝା କରିଥିଲା। ଚାପା ଉତ୍ତେଜନାକୁ ପ୍ରତିହତ କରିବା ପାଇଁ ପୋଲିସ ଜଗି ରହିବା ସହ ପରିସ୍ଥିତି ଉପରେ ଦୃଷ୍ଟି ରଖିଛି।
