ନୂଆଦିଲ୍ଲୀ,୮-୯: ଆସନ୍ତା ପାର୍ବଣ ଋତୁ ସିଜନରେ ଅଖରୋଟ ଦର ଆହୁରି ବଢ଼ିପାରେ। ବର୍ତ୍ତମାନ ଏହାର କିଲୋ ପିଛା ଦର ୯୦୦ ଟଙ୍କା ରହିଛି। ଗତ ମାସକ ମଧ୍ୟରେ ଏହାର ଦରରେ ୩୫% ବୃଦ୍ଧି ଘଟିଛି। ମିଡିଆ ରିପୋର୍ଟ ଅନୁଯାୟୀ ଅନୁଚ୍ଛେଦ ୩୭୦ ପ୍ରତ୍ୟାହାର ପରେ ଜମ୍ମୁ-କଶ୍ମୀରରେ ଯାତାୟତ କଟକଣା ଜାରି କରାଯାଇଛି। ଫଳରେ ଅଖରୋଟ୍ ସମେତ ଅନ୍ୟ ଶୁଖିଲା ଫଳ,ସେଉ, କେଶର ବିକ୍ରି ମାସେ ହେବ ପ୍ରଭାବିତ ହୋଇଛି। କଶ୍ମୀର ଉପତ୍ୟକାରୁ ଏହି ସମସ୍ତ ଶୁଖିଲା ଫଳ(ଡ୍ରାଏ ଫୁଡ୍ସ) ଜମ୍ମୁର ପାଇକାରୀ ମଣ୍ଡିକୁ ଆସିଥାଏ। ସେଠାରୁ ସାରା ଦେଶରେ ଏହାକୁ ଚାଲାଣ କରାଯାଇଥାଏ। ଭାରତରେ ଚାହିଦାର ୯୧ ପ୍ରତିଶତ ଅଖରୋଟ ଉତ୍ପାଦନ କଶ୍ମୀରରେ ହୋଇଥାଏ। ସେହିପରି ଦେଶରେ ମୋଟ ଉତ୍ପାଦିତ ସେଉ ମଧ୍ୟରୁ ୭୦ ପ୍ରତିଶତ କଶ୍ମୀରରେ ହୋଇଥାଏ। ଏଥିସହିତ ୯୦ ପ୍ରତିଶତ ଆଲ୍ମଣ୍ଡ ବାଦାମ, ୯୦ ପ୍ରତିଶତ ଚେରି ଓ କେଶର କଶ୍ମୀରରେ ଉତ୍ପାଦିତ ହୁଏ। ଗୋଟିଏ ବର୍ଷରେ ଏଗୁଡ଼ିକର ମୂଲ୍ୟ ପ୍ରାୟ ୭ ହଜାର କୋଟି ଟଙ୍କା ହେବ। ପ୍ରତିବର୍ଷ କଶ୍ମୀରରେ ୨୩.୫୫ ମେଟ୍ରିକ ଟନ୍ ଫସଲ ଉତ୍ପାଦିତ ହୁଏ। ଏଥିମଧ୍ୟରୁ ୨୦.୩୫ ମେଟ୍ରିକ ଟନ ଫଳ ଚାଷ ହୋଇଥାଏ। ତନ୍ମଧ୍ୟରୁ ୨.୮୦ମେଟ୍ରିକ ଟନ୍ ଶୁଖିଲା ଫଳ ଉତ୍ପାଦିତ ହୁଏ। ପ୍ରାପ୍ତ ସୂଚନାରୁ ଜଣାପଡିଛି ଯେ, ଅଗଷ୍ଟରେ ଅଖରୋଟ ଉତ୍ପାଦନ ହୋଇଥାଏ। ଚଳିତ ବର୍ଷ ଏଥିରେ ୧୫ ଦିନ ବିଳମ୍ବ ହୋଇଛି। ବ୍ୟବସାୟୀଙ୍କ ଚାହିଦା ପୂରଣ ଲାଗି ଏବେ ଆମେରିକା ଓ ଚିଲିରୁ ଅଖରୋଟକୁ ଭାରତ ଆମଦାନୀ କରାଯାଉଛି। ଏହା ଉପରେ ୧୩୨% ଆମଦାନୀ ଶୁଳ୍କ ଆଦାୟ ହେଉଛି। କଶ୍ମୀରରେ ଅଖରୋଟ କେଜି ୭୫୦ ଟଙ୍କା ଥିଲା ବେଳେ ଏବେ ୯୦୦ ଟଙ୍କା ରହିଛି।