ଶ୍ରୀନଗର, ୧୨।୮: କଡ଼ାସୁରକ୍ଷା ଭିତରେ ଜମ୍ମୁ-କଶ୍ମୀରରେ ନିରାଡମ୍ବର ଭାବରେ ଇଦ-ଉଲ-ଜୁହା ପାଳିତ ହୋଇଛି। ମୁଖ୍ୟତଃ ଶ୍ରୀନଗରରେ ଅଧିକ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ଇଦ ଅବସରରେ ରାଜ୍ୟରେ ୬ ଘଣ୍ଟା ପାଇଁ ଢ଼ିଲା ସୁରକ୍ଷା ବ୍ୟବସ୍ଥା ଗ୍ରହଣ କରାଯିବ ବୋଲି ନିଷ୍ପତ୍ତି ନେଇଥିଲେ ସରକାର। ଏହି ଅବସରରେ ଜାତୀୟ ସୁରକ୍ଷା ପରାମର୍ଶଦାତା ଅଜିତ୍ ଡୋଭାଲ୍ ଶ୍ରୀନଗରର ଗଳିକନ୍ଦିରେ ବୁଲିଛନ୍ତି। ଡୋଭାଲ ଅଚାନକ ପୁଓ୍ବାମା, ଲାଲ ଚୌକ ଏବଂ ବେଲଗାମ ସହରରେ ପହଞ୍ଚି ଲୋକଙ୍କ ସହ କଥାବାର୍ତ୍ତା ହୋଇଥିଲେ। ମୁସଲମାନ ସମ୍ପ୍ରଦାୟର ଲୋକମାନେ ସେମାନଙ୍କ ନିକଟବର୍ତ୍ତୀ ମସଜିଦ ଗୁଡ଼ିକୁ ଯାଇ ଇଦ ପ୍ରାର୍ଥନା କରିଛନ୍ତି। ବଡ଼ ବଡ଼ ମସଜିଦ ଗୁଡ଼ିକ ବନ୍ଦ ରହିଥିବା ସୂଚନା ରହିଛି। ସୂଚନାଯୋଗ୍ୟ, ଜମ୍ମୁ କଶ୍ମୀରରୁ ଧାରା ୩୭୦କୁ କେନ୍ଦ୍ର ସରକାର ଗତ ସପ୍ତାହରେ ହଟାଇଛନ୍ତି। ଏହାପରେ ହିଂସା ହୋଇପାରେ ବୋଲି ଆକଳନ କରି ଜମ୍ମୁ କଶ୍ମୀରରେ କର୍ଫ୍ୟୁ ଓ ଧାରା ୧୪୪ ଲାଗୁ କରାଯାଇଛି। ତେବେ ଇଦ ଥିବାରୁ ଶୁକ୍ରବାର ପାଖରୁ ଧାରା ୧୪୪ ରେ ସରକାର କୋହଳ କରିଥିଲେ।