କୋଲକାତା,୩୦।୧୦: ମଙ୍ଗଳବାର ଜମ୍ମୁ-କଶ୍ମୀରର କୁଲଗାମ ଜିଲାରେ ୫ ଜଣ ଶ୍ରମିକଙ୍କୁ ହତ୍ୟା କରିଛନ୍ତି ଆତଙ୍କବାଦୀ। ଏମାନେ ସମସ୍ତେ ପଶ୍ଚିମବଙ୍ଗର ମୁର୍ଶିଦାବାଦରୁ କଶ୍ମୀର ଯାଇ ପଥର କାରିଗର କାମ କରୁଥିଲେ। ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ମୃତକଙ୍କ ପରିବାରକୁ ସମବେଦନା ଜଣାଇବା ସହ ଘଟଣାକୁ ନିନ୍ଦା କରିଛନ୍ତି। ଏଭଳି ପରିସ୍ଥିତି ଆମେ ସମସ୍ତେ ମୃତ ପରିବାରଙ୍କ ସହ ଅଛୁ ବୋଲି ସେ କହିଛନ୍ତି। ଜମ୍ମୁ ପୋଲିସର ସୂଚନା ଅନୁଯାୟୀ କୁଲଗାମ ଜିଲାର କୁତ୍ରୁସା ଗାଁରେ ଏହି ଅଣ କଶ୍ମୀରୀ ଶ୍ରମିକମାନେ କାମ କରୁଥିଲେ। ଆତଙ୍କବାଦୀ ମାନେ ଏହି ଗାଁକୁ ଆସି ପ୍ରଥମେ ଗୁଳି ବର୍ଷଣ କରିଥିଲେ। ଏହାପରେ ଅଣ କଶ୍ମୀରୀ ଶ୍ରମିକଙ୍କୁ ଅପହରଣ କରି ନେଇ ହତ୍ୟା କରିଥିଲେ। ମୃତ ଶ୍ରମିକମାନେ ମାସେ ତଳେ ରୋଜଗାର ଆଶାରେ କଶ୍ମୀରକୁ କାମ କରିବାକୁ ଆସିଥିଲେ। ନିକଟରେ ମୃତ ଶ୍ରମିକମାନେ ତାଙ୍କ ଗାଁରେ ଧାନ ରୋଇ ଆସିଥିଲେ। ଧାନ ପାଚିବାକୁ ୩ ମାସ ସମୟ ଲାଗିବ। ଏହି ସମୟରେ ମଜୁରୀ ଲାଗି କିଛି ଟଙ୍କା ରୋଜଗାର କରିବା ଲକ୍ଷ୍ୟରେ ଆସିଥିଲେ ସେମାନେ। ସୂଚନାଯୋଗ୍ୟ, ନଭେମ୍ବର ୧ରୁ ଜମ୍ମୁ କଶ୍ମୀର ରାଜ୍ୟ ମାନ୍ୟତା ହରାଇ କେନ୍ଦ୍ର ଶାସିତ ଅଞ୍ଚଳର ମାନ୍ୟତା ପାଇବ। ଏହି ସମୟରେ ଆତଙ୍କବାଦୀ ଆକ୍ରମଣ ଆଶଙ୍କା ରହିଥିବା ଜଣାପଡ଼ିଛି। ଏ ନେଇ ହାଇଆଲର୍ଟ ଜାରି କରାଯାଇଛି।