ଶ୍ରୀନଗର,୧୮।୧: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ୩୬ ଜଣ ମନ୍ତ୍ରୀଙ୍କର ଶନିବାରଠାରୁ ଏକ ସପ୍ତାହ ବ୍ୟାପି ଜମ୍ମୁ-କଶ୍ମୀର ଗସ୍ତ ଆରମ୍ଭ ହୋଇଛି। ମନ୍ତ୍ରୀମାନେ ଜମ୍ମୁ-କଶ୍ମୀରରେ ମୋଦିଙ୍କ ବିକାଶ ମୂଳକ କାର୍ଯ୍ୟର ପ୍ରଚାର କରିବେ। ଏହି ସମୟ ମଧ୍ୟରେ ମନ୍ତ୍ରୀମାନେ ଜମ୍ମୁ-କଶ୍ମୀରର ୬୦ଟ ଅଞ୍ଚଳରେ ପ୍ରଚାର ଅଭିଯାନ ଜାରି ରଖିବେ। ମନ୍ତ୍ରୀ ଅଲଗା ଅଲଗା ଭାବେ ଗସ୍ତ କରିବେ। ଶନିବାର କେନ୍ଦ୍ରୀୟ ମନ୍ତ୍ରୀ ଅର୍ଜୁନ ରାମ ମେଘଓ୍ବାଲଓ ଅଶ୍ୱନୀ ଚୌବେ ସାମ୍ବା ଜିଲା ଗସ୍ତ କରିବେ। ସେହିପରି ଜିତେନ୍ଦ୍ର ସିଂ ଜମ୍ମୁ ଜିଲାରେ ମୋଦିଙ୍କ ବିକାଶ ମୂଳକ କାର୍ଯ୍ୟ ସମ୍ପର୍କରେ ପ୍ରଚାର କରିବେ। ରବିବାର ସ୍ମୃତି ଇରାନୀ ରିସାଇର କଟରା ଏବଂ ପନ୍ଥଲ ଗସ୍ତ କରିବେ। ସେହିପରି ମହେନ୍ଦ୍ର ନାଥ ପାଣ୍ଡେ ଜମ୍ମୁର ଦନସାଲ ଗସ୍ତ କରିବେ। ଅପରପକ୍ଷରେ ଅନୁରାଗ ଠାକୁର ଜମ୍ମୁର ନଗରୋଟା, ପୀୟୂଷ ଗୋଏଲ ଅଖନୁର୍ ଏବଂ ଆର୍.କେ. ସିଂ ଡୋଡାର ଖେଳାନି ଗସ୍ତରେ ଯିବେ। ସୂଚନାଯୋଗ୍ୟ, ଜମ୍ମୁର ୫୧ଟି ଅଞ୍ଚଳରେ ଏବଂ କଶ୍ମୀରର ୯ଟି ଅଞ୍ଚଳରେ ଏହି ପ୍ରଚାର ଅଭିଯାନ କରାଯିବ।