ନୂଆଦିଲ୍ଲୀ,୨୫-୧୦ (ପି.ଟି.):ଜମ୍ମୁ-କଶ୍ମୀରରେ ଆଉ କେତେଦିନ କଟକଣା ଜାରି ରଖିବାକୁ ଚାହାନ୍ତି ବୋଲି ସୁପ୍ରିମକୋର୍ଟ ରାଜ୍ୟ ପ୍ରଶାସନକୁ ପ୍ରଶ୍ନ କରିଛନ୍ତି। ଅଗଷ୍ଟ ୫ରେ ଉକ୍ତ ରାଜ୍ୟରୁ ସମ୍ବିଧାନର ଅନୁଚ୍ଛେଦ ୩୭୦ ଉଚ୍ଛେଦ ହେବା ଦିନଠାରୁ ବିଭିନ୍ନ କଟକଣା ଲାଗୁ ହୋଇଛି। ପରିବହନ ଓ ଯୋଗାଯୋଗ ଉପରେ ଲାଗିଥିବା କଟକଣାକୁ ଚ୍ୟାଲେଞ୍ଜ କରି ସୁପ୍ରିମକୋର୍ଟରେ ଏକାଧିକ ପିଟିଶନ ଦାଏର ହୋଇଥିଲା। ଏହାର ଶୁଣାଣି କରି ସର୍ବୋଚ୍ଚ ଅଦାଲତ କହିଛନ୍ତି ଜାତୀୟ ସ୍ବାର୍ଥ ଲାଗି କର୍ତ୍ତୃପକ୍ଷ କଟକଣା ଲାଗୁ କରିପାରିବେ। କିନ୍ତୁ ଏହାର ସମୀକ୍ଷା ହେବା ଆବଶ୍ୟକ। ସ୍ପଷ୍ଟ ଉତ୍ତର ସହ ସମସ୍ୟା ସମାଧାନର ଅନ୍ୟ ପଦ୍ଧତି ବାହାର କରିବାକୁ ଜଷ୍ଟିସ୍ ଏନ୍.ଭି. ରମାନାଙ୍କ ଅଧ୍ୟକ୍ଷତାରେ ଜଷ୍ଟିସ ଆର୍. ସୁଭାଷ ରେଡ୍ଡୀ ଏବଂ ବି.ଆର୍. ଗଭାଇଙ୍କୁ ନେଇ ଗଠିତ ଖଣ୍ଡପୀଠ କେନ୍ଦ୍ର ଓ ରାଜ୍ୟ ପ୍ରଶାସନ ପକ୍ଷରୁ ଆଟର୍ନି ଜେନେରାଲ କେ.କେ. ବେଣୁଗୋପାଳ ଓ ସଲିସିଟର ଜେନେରାଲ ତୁଷାର ହେହେଟ୍ଟାଙ୍କୁ କହିଥିଲେ। ପ୍ରତିଦିନ ଜମ୍ମୁ-କଶ୍ମୀର ସ୍ଥିତିର ସମୀକ୍ଷା ହେଉଛି ଏବଂ ପାଖାପାଖି ୯୯ ପ୍ରତିଶତ ଅଞ୍ଚଳରୁ କଟକଣା ହଟିଲାଣି ବୋଲି ମେହେଟ୍ଟା ଖଣ୍ଡପୀଠଙ୍କୁ ଜଣାଇଥିଲେ। ପିଟିଶନରଙ୍କ ପକ୍ଷର ଓକିଲ ବ୍ରିନ୍ଦା ଗ୍ରୋଭର ଏହାର ପ୍ରତିବାଦ କରିଥିଲେ। ଉପତ୍ୟକାରେ ଏବେ ବି ଇଣ୍ଟରନେଟ ସଂଯୋଗ ଦିଆଯାଇ ନ ଥିବା ସେ କହିଥିଲେ।