ଆଠମଲ୍ଲିକ, ୩୦।୭(ଡି.ଏନ.ଏ.)ଜନସାଧାରଣଙ୍କ ଚିତ୍ତବିନୋଦନ ଏବଂ ଅଞ୍ଚଳର ସୌନ୍ଦର୍ଯ୍ୟ ବୃଦ୍ଧି କରିବାକୁ ଆଠମଲ୍ଲିକ ସହର ପ୍ରବେଶ ଦ୍ୱାରରେ ନିର୍ମାଣ ହୋଇଥିଲା ଗାନ୍ଧୀପାର୍କ। ହେଲେ ପରିଚାଳନାଗତ ଅବ୍ୟବସ୍ଥାରୁ ଏହା ଏବେ ଜରାଜୀର୍ଣ୍ଣ ହୋଇପଡ଼ିଛି। ଏକଦା ସହରବାସୀଙ୍କୁ ଆକୃଷ୍ଟ କରୁଥିବା ଉକ୍ତ ପାର୍କକୁ ଏବେ ଲୋକେ ଆଡ଼ ଆଖିରେ ଚାହୁଁନାହାନ୍ତି।
ଆଠମଲ୍ଲିକ ଏନ୍ଏସି କାର୍ଯ୍ୟାଳୟଠାରୁ ମାତ୍ର ୩୦ ମିଟର ଦୂରରେ ଏହି ପାର୍କ ଜଙ୍ଗଲର ଭ୍ରମ ସୃଷ୍ଟି କରୁଛି। ପାର୍କ ଭିତରେ ଅନାବନା ଗଛ ଉଠି ସୌନ୍ଦର୍ଯ୍ୟ ନଷ୍ଟ କରୁଛି। ଦୀର୍ଘଦିନ ହେଲା ସ୍ପ୍ରିଙ୍କ୍ଲର୍ ଅଚଳ ହୋଇପଡ଼ିଛି। ୨ଲକ୍ଷ ୮୫ ହଜାର ଟଙ୍କା ବ୍ୟୟରେ ନିର୍ମାଣଧୀନ ଥଣ୍ଡା ପାନୀୟ ଜଳ ପ୍ରକଳ୍ପ କାମ ବିଳମ୍ବିତ ହେଉଛି। ଆବଶ୍ୟକ ବିଦ୍ୟୁତ୍ ସଂଯୋଗ ନ ଥିବାରୁ ପାର୍କ ଏବେ ଅସାମାଜିକଙ୍କ ଆଡ୍ଡାସ୍ଥଳୀ ପାଲଟିଛି। ଏନ୍ଏସି କର୍ତ୍ତୃପକ୍ଷ ଦୃଷ୍ଟି ଦେଉ ନ ଥିବାରୁ ପାର୍କ ଚାରିପଟେ ଅଟୋରିକ୍ସା, ବସ୍ଗୁଡ଼ିକ ମନଇଚ୍ଛା ପାର୍କିଂ କରାଯାଉଛି। ଏହାକୁ ନେଇ ଟ୍ରାଫିକ୍ ସମସ୍ୟା ଉପୁଜୁଛି। ପାର୍କ ପାଚେରି କାନ୍ଥକୁ ଲାଗି ଏକ ବେସରକାରୀ ସଂସ୍ଥା ପକ୍ଷରୁ ଚିପ୍ସ ଗଦା କରାଯାଇଥିଲା। ଫଳରେ ପାଚେରି ଭାଙ୍ଗି ନଷ୍ଟ ହୋଇଯାଇଥିବା ସ୍ଥାନୀୟ ବାସିନ୍ଦା ଅଭିଯୋଗ କରିଛନ୍ତି। ଏଥିପ୍ରତି ପ୍ରଶାସନ ତୁରନ୍ତ ଦୃଷ୍ଟି ଦେବାକୁ ଦାବି ହେଉଛି।
ଏ ନେଇ ଉପଜିଲାପାଳ ତଥା ଏନଏସି ପ୍ରଶାସକ ସୁବାସ ଚନ୍ଦ୍ର ରାୟ କୁହନ୍ତି, ଗାନ୍ଧୀପାର୍କର ନବୀକରଣ ପାଇଁ ଅର୍ଥ ବ୍ୟବସ୍ଥା ହୋଇସାରିଛି। ଖୁବ୍ଶୀଘ୍ର କାର୍ଯ୍ୟ ଆରମ୍ଭ ହେବ। ଅଭିଯୋଗ ଆସିଲେ ଦୋଷୀ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।