?????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????????
ଆରଡ଼ି, ୨୬।୮ (ଡି.ଏନ.ଏ.)- ଭଦ୍ରକ ଜିଲା ଚାନ୍ଦବାଲି ବ୍ଲକର ଦୋହରାପାଟଣା ଗଁାର ୮୦ ବର୍ଷୀୟ ବୃଦ୍ଧ ବଟକୃଷ୍ଣ ଜେନା ଏବେ ଏକୁଟିଆ ଅସହାୟ ଅବସ୍ଥାରେ ଦିନ ବିତାଉଛନ୍ତି। ୨୦ ବର୍ଷ ତଳେ ମିଳିଥିବା ଇନ୍ଦିରା ଆବାସ ଭାଙ୍ଗିରୁଜି ଅସୁରକ୍ଷିତ ହୋଇପଡ଼ିଥିଲେ ବି ସେଠାରେ ମୁଣ୍ଡ ଗୁଞ୍ଜି ରହୁଛନ୍ତି। ତିତ୍ଲୀ ବାତ୍ୟାରେ ଘର ଆଜବେଷ୍ଟସ ଭାଙ୍ଗି ଯାଇଥିଲେ ମଧ୍ୟ ଏହାକୁ ମରାମତି କରିପାରି ନାହାନ୍ତି। ଗୋଟିଏ ବଖରା ବିଶିଷ୍ଟ ଘରର ମୁଖ୍ୟ ଦ୍ୱାର କବାଟ ଭାଙ୍ଗିଯାଇଛି। ବର୍ଷା ହେଲେ ଛାତରୁ ପାଣି ଗଳୁଥିବାରୁ ଘରେ ବସିଉଠି ହେଉ ନାହିଁ। ଖାଇବାକୁ ନ ପାଇ ଅଧିକାଂଶ ଦିନ ସେ ଭୋକ ଉପାସରେ ରହୁଛନ୍ତି। ଏଭଳି ଅବସ୍ଥାରେ ଜରାଶ୍ରମ ତାଙ୍କ ପାଇଁ ଶ୍ରେୟସ୍କର ବୋଲି ସେ କହିଛନ୍ତି।
ବୟସର ଅପରାହ୍ନରେ ବଞ୍ଚିବାର ରାହା ଖୋଜୁଥିବା ବଟକୃଷ୍ଣ ଏବେ ସ୍ଥାନୀୟ ସରପଞ୍ଚଙ୍କ ଦ୍ୱାରସ୍ଥ ହୋଇ ତାଙ୍କ ଲାଗି କୌଣସି ଜରାଶ୍ରମର ସୁବିଧା କରାଇ ଦେବାକୁ ଅନୁରୋଧ କରିଛନ୍ତି। ଆଜିକୁ ୨୦ବର୍ଷ ତଳେ ରୋଗରେ ପଡ଼ି ତାଙ୍କ ସ୍ତ୍ରୀ ପ୍ରାଣ ହରାଇବା ପରେ ଦୁଇ ପିଲାଙ୍କ ସହ ପରିବାରକୁ କୌଣସି ପ୍ରକାରେ ଚଳାଇ ଆସୁଥିଲେ। ବାର୍ଦ୍ଧକ୍ୟର ଅସହାୟତା ଆବୋରି ବସିବାରୁ ସେ ଆଉ ଆଗ ଭଳି କାମଧନ୍ଦା କରିପାରୁ ନାହାନ୍ତି। ଦୁଇପୁଅ ନିଜ ପରିବାର ଓ ପେଟପାଟଣା ଚିନ୍ତାରେ ଘାରି ହେଉଥିବାରୁ ବଟକୃଷ୍ଣ ସେମାନଙ୍କ ଉପରେ ବୋଝ ନ ହେବାକୁ ସ୍ଥିର କରି ଏକୁଟିଆ ରହିଆସୁଛନ୍ତି। ବୟସ ବଢ଼ିବା ସାଙ୍ଗକୁ ରୋଗ ଯନ୍ତ୍ରଣା ତାଙ୍କ ଜୀବନକୁ ଅଧିକ ଅସହାୟ କରିଛି। ପାଖରେ କେହି ନ ଥିବାରୁ ସେ ଜରାଶ୍ରମରେ ରହିବାକୁ ସ୍ଥିର କରିଥିବା କହିଛନ୍ତି। ଅନାହାର ଓ ଅର୍ଦ୍ଧାହାରରେ ଦିନ ବିତାଉଥିବା ବଟକୃଷ୍ଣଙ୍କ ସମସ୍ୟା ପ୍ରତି ପ୍ରଶାସନ ଦୃଷ୍ଟି ଦେବାକୁ ସ୍ଥାନୀୟ ଗ୍ରାମବାସୀ ଦାବି କରିଛନ୍ତି।