ଆଗ୍ରା, ୧୧।୯: ଉତ୍ତର ପ୍ରଦେଶରେ ଏକ ଅଜବ ଘଟଣା ସାମ୍ନାକୁ ଆସିଛି। ଜରିମାନା ଦେବା ଭୟରେ ନାବାଳକ ପୁଅକୁ କୋଠରୀରେ ବନ୍ଦ କରି ରଖିଛନ୍ତି ପିତା। ନୂଆ ମୋଟର ଯାନ ଆଇନ ଲାଗୁ ହେବା ପରେ ଦେଶବ୍ୟାପୀ ଟ୍ରାଫିକ ବ୍ୟବସ୍ଥାକୁ କଡ଼ାକଡ଼ି ପାଳନ କରାଯାଉଛି। ଦେଶର ବିଭିନ୍ନ ସ୍ଥାନରେ ଚେକିଂ କରାଯାଇ ବେଆଇନ ଗାଡ଼ି ଚାଳକମାନଙ୍କୁ ମୋଟା ଅଙ୍କର ଜରିମାନା ଲଗାଯାଉଛି। ଏହି ଭୟରେ ଲୋକମାନେ ଗାଡି ଧରି ବାହାରକୁ ଯିବାକୁ ଡରୁଛନ୍ତି। ସୂଚନାଯୋଗ୍ୟ, ଜଶଓ୍ବନ୍ତପୁର ଅଞ୍ଚଳରେ ରହୁଥିବା ଧର୍ମ ସିଂଙ୍କ ନାବାଳକ ପୁଅ ମୁକେଶ୍ ୨ ବର୍ଷ ତଳେ ଜିଦ୍ ଧରି ଏକ ବାଇକ୍ କିଣିଥିଲେ। ଧର୍ମ କାମକୁ ଯିବାପରେ ଘରେ କାହା କଥା ନ ମାନି ମୁକେଶ ବାଇକ୍ ଧରି ବୁଲନ୍ତି। ତେବେ ନୂଆ ମୋଟର ଯାନ ଆଇନ ଲାଗୁ ହେବା ପରେ ଭୟରେ ପୁଅକୁ ଘରେ ବନ୍ଦ କରି ରଖିବା ସହ ସହ ଗାଡି ଚାବି ଧରି ଧର୍ମ କାମକୁ ପଳାଉଥିଲେ। ମୁକେଶ ନିଜ ସାଙ୍ଗମାନଙ୍କୁ ଏକଥା କହିଥିଲେ। ସେମାନେ ଥାନାରେ ସୂଚନା ଦେବାପରେ ପୋଲିସ୍ ମୁକେଶଙ୍କୁ ଉଦ୍ଧାର କରିଥିଲା। ଉଭୟ ବାପ ଏବଂ ପୁଅକୁ ଥାନାକୁ ନେଇ ବୁଝାସୁଝା କରିବା ପରେ ମାମଲାଟି ଶାନ୍ତ ପଡିଥିଲା।